ಚಿತ್ರಗಳಲ್ಲಿ: ಮುಂಗಾರು ಮಳೆ... ಹನಿಗಳ ಲೀಲೆ

By Mahesh

Updated: Sunday, June 16, 2013, 18:48 [IST]

ಬೆಂಗಳೂರು, ಜೂ.16: ಹವಾಮಾನ ಇಲಾಖೆ ಜೂನ್ 7ರೊಳಗೆ ರಾಜ್ಯಕ್ಕೆ ಮುಂಗಾರು ಪ್ರವೇಶಿಸಲಿದೆ ಈ ಮುಂಚೆ ಅಂದಾಜು ಮಾಡಿತ್ತು. ಆದರೆ, ಜೂ.16ರ ವೇಳೆಗೆ ಕರ್ನಾಟಕದ ಅರ್ಧ ಭಾಗ ಮಾತ್ರ ಒದ್ದೆ ಮುದ್ದೆಯಾಗಿದೆ. ಕಳೆದ ಮೂರು ದಿನಗಳಿಂದ ಆರಬ್ಬಿ ಸಮುದ್ರದಲ್ಲಿ ತಟಸ್ಥವಾಗಿದ್ದ ಮುಂಗಾರು ಮಾರುತಗಳು ನಿಧಾನವಾಗಿ ಬಂಗಾಳಕೊಲ್ಲಿಯ ದಕ್ಷಿಣ ಭಾಗ, ಮಧ್ಯಭಾಗ ಮತ್ತು ಈಶಾನ್ಯ ಭಾಗದತ್ತ ಚಲಿಸಲಾರಂಭಿಸಿವೆ.

ಜೂನ್ 3ಕ್ಕೆ ಕೇರಳ ಪ್ರವೇಶಿಸಿದ ಮುಂಗಾರು ಜೂನ್ 5ರ ವೇಳೆಗೆ ಕರ್ನಾಟಕ ಪ್ರವೇಶಿಸಬೇಕಿತ್ತು. ಆದರೆ, ಅರಬ್ಬಿ ಸಮುದ್ರದಿಂದ ಬಂಗಾಳಕೊಲ್ಲಿ ಪ್ರವೇಶಿಸುವ ಮುಂಗಾರು ಮಾರುತಗಳು ತಟಸ್ಥವಾಗಿದ್ದರಿಂದ ರಾಜ್ಯಕ್ಕೆ ಮುಂಗಾರು ಪ್ರವೇಶ ಕೊಂಚ ವಿಳಂಬವಾಯಿತು.

ಮಲೆನಾಡು, ಕರಾವಳಿ ಒದ್ದೆ: ನಿರೀಕ್ಷೆಯಂತೆ ಮಲೆನಾಡು ಹಾಗೂ ಕರಾವಳಿ ಭಾಗದಲ್ಲಿ ಭರ್ಜರಿ ಮಳೆಯಾಗಿದೆ. ಸುಮಾರು 3.5 ಟಿಎಂಸಿ ಅಡಿ ನೀರು ಇಟ್ಟುಕೊಂಡಿರುವ ಗಾಜನೂರಿನ ತುಂಗಾ ಅಣೆಕಟ್ಟು ಭರ್ತಿಯಾಗಿದೆ. ಮಂಗಳೂರಿನ ಕಡಲ್ಕೊರೆತ ಮುಂದುವರೆದಿದೆ.

ಬೆಂಗಳೂರು, ಕನಕಪುರ, ಮಂಡ್ಯ, ಮೈಸೂರು ಭಾಗಗಳು ಸೇರಿದಂತೆ ರಾಜ್ಯದಲ್ಲಿ ಜೂನ್ ಮೊದಲ ವಾರ ಬೀಳಬೇಕಿದ್ದ ಮುಂಗಾರು ಮಳೆ ಸರಿಯಾಗಿ ಬಿದ್ದಿಲ್ಲ.

ಕುಡಿಯುವ ನೀರಿನ ಸಮಸ್ಯೆಗೆ ಪರ್ಯಾಯ ಮಾರ್ಗಗಳನ್ನು ಕಂಡುಕೊಳ್ಳಲು ಸೂಚಿಸಲಾಗಿದೆ ಎಂದು ಸಚಿವ ಎಂಬಿ ಪಾಟೀಲ್ ಹೇಳಿದ್ದಾರೆ.

ದೆಹಲಿಯಲ್ಲಿ ಮಳೆ ಕೊಂಚ ಬ್ರೇಕ್ ತೆಗೆದುಕೊಂಡಿದ್ದು ಜೂ.29ರ ವೇಳೆಗೆ ಮತ್ತೆ ಆರ್ಭಟಿಸುವ ಸೂಚನೆ ಸಿಕ್ಕಿದೆ. ಶುಕ್ರವಾರ 5.5 ಮಿ.ಮೀ ಮಳೆಗೆ ದೆಹಲಿ ನೆತ್ತಿ ಕೊಂಚ ತಣ್ಣಗಾಗಿದೆ. ಮುಂಬೈನಂತೆ ದೆಹಲಿಯಲ್ಲೂ ಮಳೆಯಿಂದ ಟ್ರಾಫಿಕ್ ಜಾಮ್ ಹೆಚ್ಚಾಗುತ್ತಿದೆ. ಮಳೆ ಚಿತ್ರಗಳನ್ನು ನೋಡಿ..