ಸೌದಿ ಅರೇಬಿಯಾ: ಮಹಿಳೆಯರಿಗಾಗಿಯೇ ಪ್ರತ್ಯೇಕ ನಗರ
ಸೌದಿ ಇಂಡಸ್ಟ್ರಿಯಲ್ ಪ್ರಾಪರ್ಟಿ ಅಥಾರಿಟಿ ಈ ಮಹತ್ವಾಕಾಂಕ್ಷಿ ನಗರ ನಿರ್ಮಾಣಕ್ಕೆ ಮುಂದಿನ ವರ್ಷ ಚಾಲನೆ ನೀಡಲಿದೆ. ಇಂತಹ all-women ನಗರವನ್ನು ಅತ್ಯಾಧುನಿಕ ರೀತಿಯಲ್ಲಿ ನಿರ್ಮಿಸಲು ಈಗಾಗಲೇ ರೂಪುರೇಶೆಗಳು ಸಿದ್ಧಗೊಂಡಿವೆ. ಅತಿ ಕಠಿಣವಾದ ಇಸ್ಲಾಂ ಧರ್ಮದ ಕಾನೂನು ಆಚರಣೆಗಳಿಗೆ ಯಾವುದೇ ಚ್ಯುತಿ ಬಾರದ ಹಾಗೆ ಮಹಿಳೆಯರು ಇಲ್ಲಿ ಕೆಲಸ ಕಾರ್ಯಗಳಲ್ಲಿ ತೊಡಗಬಹುದಾಗಿದೆ.
ಅಪರಾಧ, ರಾಜಕೀಯ, ಆರ್ಥಿಕತೆ ಮತ್ತು ಇವುಗಳ ಜತೆಗೆ ಸಂಭೋಗ, ನೈರ್ಮಲ್ಯ, ಆಹಾರ ಪದ್ಧತಿ, ಪ್ರಾರ್ಥನೆ ಮತ್ತು ಉಪವಾಸದಂತಹ ಮುಖ್ಯ ವೈಯಕ್ತಿಕ ವಿಷಯಗಳಲ್ಲಿ ಇಸ್ಲಾಂ ಧರ್ಮ ಪಾಲಿಸುವ ಷರಿಯಾ ಕಾನೂನು ಕಟ್ಟಳೆಗಳಿಗೆ ಚ್ಯುತಿ ಬಾರದ ರೀತಿಯಲ್ಲಿ ಈ ಹೊಸ ನಗರದಲ್ಲಿ ಆಡಳಿತವನ್ನು ಜಾರಿಗೆ ತರಲು ಸಿದ್ಧತೆಗಳು ನಡೆದಿವೆ.
ಕುತೂಹಲದ ಸಂಗತಿಯೆಂದರೆ ಸೌದಿ ಅರೇಬಿಯಾದ ಷರಿಯಾ ಕಾನೂನಿನಲ್ಲಿ ಮಹಿಳೆಯರು ಕೆಲಸ ಮಾಡುವುದನ್ನು ನಿಷೇಧಿಸಲಾಗಿದೆ. ಪ್ರಸ್ತುತ ಸೌದಿ ಅರೇಬಿಯಾದದಲ್ಲಿ ಒಟ್ಟಾರೆ ಉದ್ಯೋಗಿಗಳ ಪೈಕಿ ಕೇವಲ ಶೇ. 15ರಷ್ಟು ಮಾತ್ರವೇ ಮಹಿಳೆಯರಿದ್ದಾರೆ.
ದೇಶದ ಸಮಗ್ರ ಅಭಿವೃದ್ಧಿಯಲ್ಲಿ ಮಹಿಳೆಯರೂ ಸಕ್ರಿ ಮತ್ತು ಸಕಾರಾತ್ಮಕ ಪಾತ್ರ ನಿಭಾಯಿಸಬೇಕು ಎಂಬ ಸರಕಾರದ ಧ್ಯೇಯೋದ್ದೇಶದೊಂದಿಗೆ ಈ ಹೊಸ ನಗರ ನಿರ್ಮಾಣಕ್ಕೆ ಕೈಹಾಕಲಾಗಿದೆ. ಆದರೆ ಅದು ನಿಜಕ್ಕೂ ಪುರುಷನ ನೆರಳೂ ಬೀಳದ ನಾಡಾಗುತ್ತದೆಯೇ!?
ಪ್ರಮೀಳಾ ನಗರ ನನಸಾಗುವುದೇ?: ಅವಕಾಶ ದೊರೆತಲ್ಲಿ ಮಹಿಳೆಯರು ಅನೇಕ ಕ್ಷೇತ್ರಗಳಲ್ಲಿ ತಮ್ಮ ಶಕ್ತಿ ಸಾಮರ್ಥ್ಯವನ್ನು ರುಜುವಾತುಪಡಿಸುವಲ್ಲಿ ಯಾವುದೇ ಅನುಮಾನವಿಲ್ಲ. ಅದರಲ್ಲಿ ಆಧುನಿಕ ಕೈಗಾರಿಕೆಗಳು ಮಹಿಳೆಯರಿಗೆ ಹೇಳಿ ಮಾಡಿಸಿದ ಉದ್ಯೋಗ ತಾಣಗಳಾಗಲಿವೆ ಎಂದು ಸೌದಿ ಇಂಡಸ್ಟ್ರಿಯಲ್ ಪ್ರಾಪರ್ಟಿ ಅಥಾರಿಟಿಯ ಉಪ ಮಹಾನಿರ್ದೇಶಕ ಸಲೇ ಅಲ್ ರಶೀದ್ ಅಭಿಪ್ರಾಯಪಟ್ಟಿದ್ದಾರೆ. ಸೌದಿಯ ಅನೇಕ ಭಾಗಗಳಲ್ಲಿ ಈಗಾಗಲೇ ಕೇವಲ ಮಹಿಳೆಯರೇ ಇರುವ ಅನೇಕ ಕೈಗಾರಿಕೆಗಳನ್ನು ನಿರ್ಮಿಸಲಾಗಿದೆ ಎಂದೂ ಅವರು ತಿಳಿಸಿದರು.
2015ರ ಸ್ಥಳೀಯಾಡಳಿತ ಚುನಾವಣೆಗಳಲ್ಲಿ ಮಹಿಳೆಯರು ಮತದಾನ ಮಾಡಲು ಸಶಕ್ತರಾಗಲಿದ್ದು, ಆಡಳಿತದ ಚುಕ್ಕಾಣಿಯನ್ನೂ ಹಿಡಿಯಬಲ್ಲವರಾಗಲಿದ್ದಾರೆ ಎಂದು ದೊರೆ ಅಬ್ದುಲ್ಲಾ ಕಳೆದ ಸೆಪ್ಟೆಂಬರಿನಲ್ಲಿ ಹೇಳಿದ್ದರು. ಅದಕ್ಕೆ ತಕ್ಕಂತೆ ಈಗ ಮಹಿಳೆಯರನ್ನು ಹೆಚ್ಚು ಸಶಕ್ತಗೊಳಿಸಲು ದೊರೆ ಅಬ್ದುಲ್ಲಾ ಆಡಳಿತ ಇಂತಹ ಕ್ರಮಗಳನ್ನು ಕೈಗೊಂಡಿದೆ.
Click it and Unblock the Notifications
Sign in with Google