ಚಿನ್ನಾಭರಣ ಖರೀದಿ ತೆರಿಗೆ ಮಿತಿ ಹೆಚ್ಚಳ: ಪ್ರಣಬ್

ನವದೆಹಲಿ, ಮೇ.7: ಚಿನ್ನಾಭರಣಗಳ ಖರೀದಿ ಮೇಲೆ ವಿಧಿಸಲಾಗಿದ್ದ ಅಬಕಾರಿ ಸುಂಕವನ್ನು ಹಿಂದಕ್ಕೆ ಪಡೆಯಲಾಗಿದೆ ಎಂದು ಆರ್ಥಿಕ ಸಚಿವ ಪ್ರಣಬ್ ಮುಖರ್ಜಿ ಸೋಮವಾರ(ಮೇ.7)ಹೇಳಿದ್ದಾರೆ. 5 ಲಕ್ಷ ರುಪಾಯಿ ತನಕ ತೆರಿಗೆ ಇಲ್ಲದೆ ಖರೀದಿಸುವ ಅವಕಾಶ ಗ್ರಾಹಕರಿಗೆ ಸರ್ಕಾರ ನೀಡುತ್ತಿದೆ. ಈ ಮುಂಚೆ 2 ಲಕ್ಷ ರು ತನಕ ಮಾತ್ರ ಮಿತಿಗೊಳಿಸಲಾಗಿತ್ತು. ಅಕ್ಷಯ ತದಿಗೆ ನಂತರ ಡಲ್ ಆಗಿದ್ದ ಆಭರಣ ಖರೀದಿ ಮತ್ತೆ ಚಿಗಿತುಕೊಳ್ಳುವ ಸಾಧ್ಯತೆಯಿದೆ.

ಬ್ರಾಂಡೆಡ್ ಆಭರಣಗಳ ಮೇಲೆ ಶೇ 1 ರಷ್ಟು ಅಬಕಾರಿ ಸುಂಕ ವಿಧಿಸಲಾಗಿತ್ತು. 2012-13 ಕೇಂದ್ರ ಬಜೆಟ್ ನಲ್ಲಿ ಈ ಸುಂಕ ಪ್ರಮಾಣವನ್ನು ಎಲ್ಲಾ ಬಗೆಯ ಆಭರಣ ಖರೀದಿಗೂ ವಿಸ್ತರಿಸಲಾಗಿತ್ತು. ಇದರಿಂದ ಆಭರಣ ಅಂಗಡಿಗಳಿಗೆ ಭಾರಿ ಹೊಡೆತ ಬಿದ್ದಿತ್ತು.

ಸುಂಕ ಹೇರಿಕೆ ವಿರೋಧಿಸಿ ದೇಶದಾದ್ಯಂತ ಚಿನ್ನದ ವರ್ತಕರು ಪ್ರತಿಭಟನೆ ನಡೆಸಿ ಕೇಂದ್ರ ಸರ್ಕಾರಕ್ಕೆ ಚುರುಕು ಮುಟ್ಟಿಸಿದ್ದರು. ಈಗ ತೆರಿಗೆ ಹೇರಿಕೆ ಹಿಂಪಡೆದಿರುವುದರಿಂದ ವರ್ತಕರು ಸಂತಸಪಟ್ಟಿದ್ದಾರೆ.

Multi Commodity Exchange (MCX)ನಲ್ಲಿ ಮಧ್ಯಾಹ್ನ 10 ಗ್ರಾಂಗೆ 28,946.00 ನಷ್ಟಿದೆ. ದಿನದ ಆರಂಭದಲ್ಲಿ 29,167ರು ನಷ್ಟಿತ್ತು.

ಬೆಳ್ಳಿ ಬೆಲೆ ಪ್ರತಿ ಕೆ.ಜಿಗೆ 56,511 ರು ನಷ್ಟಿದೆ. ದಿನದ ಆರಂಭದಲ್ಲಿ 56,091 ರು.ನಷ್ಟಿತ್ತು. ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಪ್ರತಿ ಔನ್ಸ್ ಚಿನ್ನದ ಬೆಲೆ 1,640 ಡಾಲರ್ ನಷ್ಟಿದೆ.

English summary

Union Finance Minister Pranab Mukherjee said that there will be no excise duty on purchase of jewellery valued Rs 5 lakh against earlier threshold of Rs 2 lakh. This was in response to the debate on the Finance Bill. Jewellers will now heave a sign of relief, as it could now boost sales.