ಕಸಾಪ ಯಜಮಾನ್ಯಕ್ಕೆ ಕನ್ನಡ ಮಾತೆಯರೇ ಇಲ್ವಾ?

ಬೆಂಗಳೂರು, ಮಾ.29: ಕನ್ನಡ ಸಾಹಿತ್ಯ ಪರಿಷತ್ತು ಅಧ್ಯಕ್ಷ ಸ್ಥಾನ ಅಲಂಕರಿಸಲು ಭುವನೇಶ್ವರಿಗಳ ಅರ್ಥಾತ್ ಕನ್ನಡ ಮಾತೆಯರ ಕೊರತೆ ಎದ್ದುಕಾಣುತ್ತಿದೆ. ಸೋಜಿಗವೆಂದರೆ, ಕಸಾಪ ಅಸ್ತಿತ್ವಕ್ಕೆ ಬಂದು 97 ವರ್ಷ ಸಂದಿದ್ದರೂ ಅಧ್ಯಕ್ಷಗಿರಿಗೆ ಮಹಿಳೆಯರು ಚುನಾಯಿತರಾಗುತ್ತಿಲ್ಲ. ಈ ಬಾರಿಯೂ ಕನ್ನಡತಿಯರು ಯಾರೂ ಚುನಾವಣಾ ಕಣದತ್ತ ಹೆಜ್ಜೆಹಾಕಿಲ್ಲ.

ಅಂದಹಾಗೆ, ಕಸಾಪ ಅಧ್ಯಕ್ಷ ಸ್ಥಾನಕ್ಕೆ ಸ್ಪರ್ಧಿಸಿದ್ದ ಏಕೈಕ ಮಹಿಳೆಯೆಂದರೆ ಸಾಹಿತಿ ಪ್ರೊ. ನಾರಾಯಣಮ್ಮ. 2004ರ ಚುನಾವಣೆಯಲ್ಲಿ ಇವರು ಚಂಪಾ ವಿರುದ್ಧ ಸ್ಪರ್ಧಿಸಿ, ಸೋತಿದ್ದರು. ಮುಂದೆ 2008ರಲ್ಲಿಯೂ ಬೆಂಗಳೂರು ನಗರ ಘಟಕದ ಅಧ್ಯಕ್ಷ ಸ್ಥಾನಕ್ಕೆ ಸ್ಪರ್ಧಿಸುವ ಧೈರ್ಯ ತೋರಿದ್ದರು. ಈ ಎರಡು ಸಂದರ್ಭಗಳನ್ನು ಹೊರತುಪಡಿಸಿದರೆ ಮಹಿಳೆಯರು ಇದುವರೆಗೆ ಸ್ಪರ್ಧಿಸಿಯೇ ಇಲ್ಲ.

ಮಹಿಳಾ ಸದಸ್ಯರ ಸಂಖ್ಯಾ ಬಲ ಕ್ಷೀಣ: ಕಸಾಪದ ಒಟ್ಟು ಸದಸ್ಯರ ಸಂಖ್ಯೆ 1,08,028. ಅದರಲ್ಲಿ ಪುರುಷರು 90,897 ರಷ್ಟಿದ್ದರೆ ಮಹಿಳೆಯರ ಸಂಖ್ಯೆ ನಗಣ್ಯವೆನಿಸುವಷ್ಟು ಅಂದರೆ 17,131 ರಷ್ಟಿದೆ. ಜಿಲ್ಲಾ ಮಟ್ಟದಲ್ಲೂ ಮಹಿಳೆಯರು ಅಧ್ಯಕ್ಷ ಸ್ಥಾನಕ್ಕೆ ನಿಂತ ಉದಾಹರಣೆಗಳಿಲ್ಲ.

English summary

Kannada Sahithya Parishat which is into 97th year has so far no woman president. Astonishingly, Ka Sa Pa which is going to elect new President on 2012 April 29 has no woman contenders!