ಉಳ್ಳಾಲದಲ್ಲಿ ರೇವ್ ಪಾರ್ಟಿ, ಬಜರಂಗಿಗಳ ದಾಳಿ

Published: Monday, August 15, 2011, 11:41 [IST]

ಮಂಗಳೂರು, ಆ.15: ಮಹಾನಗರಗಳಲ್ಲಿ ಕೇಳಿಬರುತ್ತಿದ್ದ ರೇವ್ ಪಾರ್ಟಿ ಸಂಸ್ಕೃತಿ ಕರಾವಳಿ ಕಡೆಗೂ ಕಾಲಿಟ್ಟಿದೆ. ಮಂಗಳೂರು ಸಮೀಪದ ಉಳ್ಳಾಲದ ರೆಸಾರ್ಟ್ ನಲ್ಲಿ ನಂಗ್ ನಾಚ್ ನಲ್ಲಿ ತೊಡಗಿದ್ದ ಯುವಕ ಯುವತಿಯರನ್ನು ಪೊಲೀಸರು ವಶಕ್ಕೆ ತೆಗೆದುಕೊಂಡಿದ್ದಾರೆ. ಅಲ್ಲಿ ಡ್ರಗ್ಸ್, ಡ್ರಿಂಕ್ಸ್ ಸೇರಿದಂತೆ ಮಾದಕ ದ್ರವ್ಯಗಳು ಪತ್ತೆಯಾಗಿವೆ ಎಂದು ವರದಿಗಳು ಹೇಳಿವೆ.

ಉಳ್ಳಾಲದ ಖಾಸಗಿ ರೆಸಾರ್ಟ್ ನಲ್ಲಿ ಹುಟ್ಟುಹಬ್ಬದ ಹೆಸರಲ್ಲಿ ಹುಡುಗ ಹುಡುಗಿಯರು ನಂಗ್ ನಾಚ್ ನಲ್ಲಿ ತೊಡಗಿದ್ದರು. ಈ ಸುದ್ದಿ ತಿಳಿದ ಸ್ಥಳೀಯ ಬಜರಂಗದಳದ ಕಾರ್ಯಕರ್ತರು ಬೆಳಗಿನ ಜಾವ ದಾಳಿ ಮಾಡಿದ್ದಾರೆ.

ವ್ಯಕ್ತಿಯೊಬ್ಬರು ಹುಟ್ಟುಹಬ್ಬ ಆಚರಣೆಗೆಂದು ರೆಸಾರ್ಟ್ ಕಾದಿರಿಸಿದ್ದರು. ಆದರೆ ತಡರಾತ್ರಿವರೆಗೂ ಯುವಕ-ಯುವತಿಯರು ಮಜಾ ಉಡಾಯಿಸುತ್ತಿರುವ ಮಾಹಿತಿ ಪಡೆದ ಬಜರಂಗದಳದ ಕಾರ್ಯಕರ್ತರು ಏಕಾಏಕಿ ದಾಳಿ ನಡೆಸಿ ಕಂಗೆಡಿಸಿದರೆನ್ನಲಾಗಿದೆ.

ಈ ದಾಳಿ ಸುದಿ ತಿಳಿಯುತ್ತಿದ್ದಂತೆಯೇ ಸ್ಥಳಕ್ಕೆ ಧಾವಿಸಿ ಬಂದ ಉಳ್ಳಾಲ ಪೊಲೀಸರು ಸುಮಾರು 20ಕ್ಕೂ ಹೆಚ್ಚು ದ್ವಿಚಕ್ರವಾಹನಗಳ ಸಹಿತ ಯುವಕರನ್ನು ವಶಕ್ಕೆ ತೆಗೆದುಕೊಂಡಿರುವುದಾಗಿ ತಿಳಿದು ಬಂದಿದೆ.

Published On August 15, 2011