ಮೈಸೂರು: ಕಾಡಾನೆ ದಾಳಿಗೆ ಒಬ್ಬ ಬಲಿ

ಮೈಸೂರು ಜೂ 8: ನಗರದ ವಿವಿಧೆಡೆ ಕಾಡನೆಗಳ ದಾಳಿಗೆ ಸಿಕ್ಕು ಅಪಾರ ಹಾನಿ ಸಂಭವಿಸಿದೆ. ಇಂದು ಬೆಳಗ್ಗೆಯಿಂದಲೂ ಅಡ್ಡಾದಿಡ್ಡಿ ತಿರುಗಾಡಿ ಎಲ್ಲವನ್ನು ಧ್ವಂಸಗೊಳಿಸುತ್ತಿರುವ ಪುಂಡಾನೆಗಳ ಆಕ್ರೋಶಕ್ಕೆ ಒಬ್ಬ ವ್ಯಕ್ತಿ ಬಲಿಯಾಗಿದ್ದಾನೆ. ಹತ್ತಕ್ಕೂ ಹೆಚ್ಚು ಜನ ತೀವ್ರವಾಗಿ ಗಾಯಗೊಂಡಿದ್ದಾರೆ. ಹಲವಾರು ವಾಹನಗಳು ಜಖಂಗೊಂಡಿದೆ. ಆನೆಗಳನ್ನು ನಿಯಂತ್ರಿಸಲು ನಾಲ್ಕು ಸುತ್ತು ಅರವಳಿಕೆ ಚುಚ್ಚುಮದ್ದು ನೀಡಲಾಗಿದೆ. ಆನೆಗಳ ಇರುವ ಪ್ರದೇಶದಲ್ಲಿ ನಿಷೇಧಾಜ್ಞೆ ಜಾರಿಗೊಳಿಸಲಾಗಿದೆ.

ಅರವಳಿಕೆ ಡೋಸ್ ಗಳಿಗೆ ಬಗ್ಗದ ಆನೆಗಳನ್ನು ಹಿಡಿದು ಹತೋಟಿಗೆ ತರಲು ಕೊನೆ ಪ್ರಯತ್ನ ಎಂಬಂತೆ ಪಳಗಿದ ಆನೆಗಳನ್ನು ಬಳಸಲು ಅರಣ್ಯ ಇಲಾಖೆ ಸಿಬ್ಬಂದಿ ಯೋಚಿಸಿದ್ದಾರೆ. ನಾಗರಹೊಳೆಯಿಂದ ಅರ್ಜುನ, ತಿತಿಮತಿ ಅರಣ್ಯದಿಂದ ಅಭಿಮನ್ಯು, ಕೆ ಗುಡಿಯಿಂದ ಗಜೇಂದ್ರ ಶ್ರೀರಾಮ ಆನೆಗಳನ್ನು ಕರೆಸಿಕೊಳ್ಳಲಾಗಿದೆ. ಮನೆಯಿಂದ ಹೊರಕ್ಕೆ ಬರದಂತೆ ಸಾರ್ವಜನಿಕ ಸೂಚಿಸಲಾಗಿದ್ದು, ಅನೇಕ ಕಡೆ ಆನೆ ನೋಡಲು ಸೇರಿದ್ದ ಜನಜಂಗುಳಿಯನ್ನು ಚದುರಿಸಲು ಪೊಲೀಸರು ಲಾಠಿ ಪ್ರಹಾರ ನಡೆಸಿದ್ದಾರೆ.

ಆನೆ ನಡೆದಿದ್ದೇ ದಾರಿ: ಇಂದು ಮುಂಜಾನೆ ಸುಮಾರು 5 ಗಂಟೆ ವೇಳೆಗೆ ಬಂಬೂ ಬಜಾರ್ ಬಳಿ ಕಾಣಿಸಿಕೊಂಡ ಒಂದು ಆನೆ ನಂತರ ಸರಸ್ವತಿ ಪುರಂ, ದೋಭಿಘಾಟ್ ಮುಂತಾದ ಕಡೆ ತನ್ನ ದಾಂದಲೆ ನಡೆಸಿದೆ. ಇನ್ನೊಂದು ಆನೆ ನಗರದ ಹೊರವಲಯದ ನಾಯ್ಡು ಫಾರ್ಮ್ ಹೌಸ್ ನಲ್ಲಿ ಬೀಡುಬಿಟ್ಟಿದೆ.

ಸೋವು ನೋವು : ಮನೆ ಹತ್ತಿರ ಆನೆ ಬಂದಿದೆ ಎಂದು ಖುಷಿಯಿಂದ ನೋಡಲು ಓಡೋಡಿ ಬಂದ ರೇಣುಕಾಪ್ರಸಾದ್(55) ಎಂಬ ವ್ಯಕ್ತಿಯನ್ನು ಕಾಡಾನೆ ಭೀಕರವಾಗಿ ಕೊಂದಿದೆ. ಇನ್ನೊಂದು ಆನೆ ಸಯ್ಯಾಜಿರಾವ್ ರಸ್ತೆ ಬಳಿ ನಿಂತಿದ್ದ ಹಸುವಿನ ಮೇಲೆ ತನ್ನ ಬಲ ಪ್ರಯೋಗ ಮಾಡಿ ಮಾರಾಣಾಂತಿಕವಾಗಿ ಹಲ್ಲೆಗೊಳಿಸಿದೆ.

English summary

Two wild elephants went on rampage in Mysore city today. Elephants have entered through Bamboo Bazaar area have trampled a security guard Renuka Prasad to death.