ಮುಂದಿನ ವರ್ಷ ಲಂಡನ್ ರಾಜಕುಮಾರನ ಲಗ್ನ

ಲಂಡನ್, ನ. 18 : ಬ್ರಿಟಿಷ್ ಸಿಂಹಾಸನದ ಎರಡನೇ ಉತ್ತರಾಧಿಕಾರಿಯಾದ ರಾಜಕುಮಾರ ವಿಲಿಯಂ ಮುಂದಿನ ವರ್ಷ ತಮ್ಮ ದೀರ್ಘ ಕಾಲದ ಗೆಳತಿ ಕೇಟ್ ಮಿಡ್ಲ್‌ ಟನ್‌ ಳನ್ನು ವರಿಸಲಿದ್ದಾರೆ.

ಈ ಶತಮಾನದ ಬಹುನಿರೀಕ್ಷೆಯ ವಿಲಿಯಂ-ಕೇಟ್ ವಿವಾಹವು, 1981ರಲ್ಲಿ ಅದ್ದೂರಿಯಾಗಿ ನಡೆದ ಪ್ರಿನ್ಸ್ ಚಾರ್ಲ್ಸ್ ಹಾಗೂ ರಾಜಕುಮಾರಿ ಡಯಾನ ಮದುವೆ ನೆನಪುಗಳನ್ನು ಮತ್ತೆ ತರಿಸುವ ಸಾಧ್ಯತೆ ಇದೆ. ವಿಲಿಯಂ ಅವರು ಪ್ರಿನ್ಸ್ ಚಾರ್ಲ್ಸ್ ಅವರ ಹಿರಿಯ ಪುತ್ರನಾಗಿದ್ದಾರೆ. ವಿಲಿಯಂ ಹಾಗೂ ಕೇಟ್ ಇಬ್ಬರೂ 28 ವರ್ಷದವರಾಗಿದ್ದಾರೆ.

ವಿಲಿಯಂ-ಕೇಟ್ ವಿವಾಹವು 2011ರಲ್ಲಿ ಬೇಸಿಗೆ ಅಥವಾ ವಸಂತ ಋತುವಿನಲ್ಲಿ ಲಂಡನ್‌ನಲ್ಲಿ ನಡೆಯಲಿದೆಯೆಂದು ರಾಜಮನೆತನದ ಮೂಲಗಳು ತಿಳಿಸಿವೆ. ಅಕ್ಟೋಬರ್ ನಲ್ಲಿ ವಿಲಿಯಂ ಹಾಗೂ ಕೇಟ್ ಕೆನ್ಯಾಕ್ಕೆ ಖಾಸಗಿ ಪ್ರವಾಸದಲ್ಲಿದ್ದ ಸಂದರ್ಭದಲ್ಲಿ ಇವರಿಬ್ಬರು ವಿವಾಹವಾಗುವ ನಿರ್ಧಾರಕ್ಕೆ ಬಂದಿದ್ದರು ಎಂದು ಬ್ರಿಟಿಷ್ ಮಾಧ್ಯಮಗಳು ವರದಿ ಮಾಡಿವೆ.