ದೆಹಲಿ ಕಟ್ಟಡ ಕುಸಿತದಲ್ಲಿ ಆರು ಜನರ ಸಾವು

ನವದೆಹಲಿ, ಜು. 14 : ಗುರುವಾರ ನಸುಕಿನಲ್ಲಿ ಎರಡಂತಸ್ತಿನ ಹಳೆ ಕಟ್ಟಡ ಕುಸಿದು ನವದೆಹಲಿಯಲ್ಲಿ ಆರು ಜನ ಅಸುನೀಗಿದ್ದಾರೆ. ಕಟ್ಟಡದಡಿಯಲ್ಲಿ ಅನೇಕರು ಇನ್ನೂ ಸಿಲುಕಿಕೊಂಡಿದ್ದಾರೆ.

ಉಸ್ಮಾನಪುರ ಬಳಿಯ ಬ್ರಹ್ಮಪುರಿ ಎಂಬಲ್ಲಿ ಬೆಳಗಿನ ಜಾವ 4.25 ಗಂಟೆಗೆ ಕಟ್ಟಡ ಕುಸಿದಿದೆ. ಅಗ್ನಿಶಾಮಕ ದಳ ಸ್ಥಳಕ್ಕೆ ಧಾವಿಸಿದ್ದು ಕಟ್ಟಡದ ಅವಶೇಷದಡಿಯಲ್ಲಿ ಸಿಲುಕಿರುವವರನ್ನು ಹೊರತೆಗೆಯುವ ಕಾರ್ಯದಲ್ಲಿ ನಿರತರಾಗಿದ್ದಾರೆ.

ಮೂವರು ಮಹಿಳೆಯರು ಮತ್ತು ಮೂವರು ಪುರುಷರ ದೇಹಗಳನ್ನು ಹೊರತೆಗೆಯಲಾಗಿದೆ. ನಸುಕಿನಲ್ಲಿ ಕಟ್ಟಡ ಕುಸಿತ ಸಂಭವಿಸಿರುವುದರಿಂದ ಮರಣ ಹೊಂದಿದವರ ಸಂಖ್ಯೆ ಇನ್ನೂ ಹೆಚ್ಚಾಗಿರಬಹುದೆಂದು ಅಂದಾಜಿಸಲಾಗಿದೆ.