ಚಂದ್ರಯಾನ-1ನೌಕೆ ಸಂಪರ್ಕ ಕಡಿತ: ಇಸ್ರೋ

ಬೆಂಗಳೂರು, ಆ.29: ಭಾರತದ ಮಹತ್ವದ ಬಾಹ್ಯಾಕಾಶ ಯೋಜನೆ ಚಂದ್ರಯಾನ-1ಗೆ ಭಾರಿ ಹೊಡೆತ ಬಿದ್ದಿದೆ. ಚಂದ್ರಯಾನ ನೌಕೆ ಶುಕ್ರವಾರ ಮಧ್ಯರಾತ್ರಿ 1.30 ರಿಂದ ತನ್ನ ಸಂಪರ್ಕ ಕಡಿದುಕೊಂಡಿದೆ. ಬ್ಯಾಲಾಳು ಕೇಂದ್ರಕ್ಕೆ ರೇಡಿಯೋ ತರಂಗಗಳು ಸಂಪರ್ಕ ಕಳೆದುಕೊಂಡಿದೆ. ಆದರೆ, ಮೂನ್ ಮಿಷನ್ ಈಗಾಗಲೇ ಶೇ.90 ರಷ್ಟು ಮಾಹಿತಿ ರವಾನೆ ಮಾಡಿದೆ. ಈಗ ತಪ್ಪಿರುವ ಸಂಪರ್ಕವನ್ನು ಪುನಃ ಸ್ಥಾಪಿಸುವುದು ಕಷ್ಟಕರ ಎಂದು ಇಸ್ರೋ ವಿಜ್ಞಾನಿ ಸತೀಶ್ ಹೇಳಿದ್ದಾರೆ.

ಮಧ್ಯರಾತ್ರಿ 12.25 ಕ್ಕೆ ಕೊನೆಯ ಸಂದೇಶವನ್ನು ಪಡೆಯಲಾಗಿದೆ ಎಂದು ಬ್ಯಾಲಾಳು ಬಾಹ್ಯಾಕಾಶ ಕೇಂದ್ರ ದಾಖಲಿಸಿದೆ. ಟೆಲಿಮೆಟ್ರಿ ಮಾಹಿತಿ ಸಂಗ್ರಹ ಹಾಗೂ ಚಂದ್ರಯಾನ ನೌಕೆಗೆ ಒದಗಿರಬಹುದಾದ ತೊಂದರೆಯ ಬಗ್ಗೆ ತಿಳಿಯುವ ಕಾರ್ಯದಲ್ಲಿ ವಿಜ್ಞಾನಿಗಳು ನಿರತರಾಗಿದ್ದಾರೆ.

ಅಕ್ಟೋಬರ್22,2008 ರಂದು ಶ್ರೀಹರಿಕೋಟದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ಚಂದ್ರಯಾನ -1ಕ್ಕೆ ಚಾಲನೆ ದೊರೆಯಿತು. ನೌಕೆ ಈಗಾಗಲೆ 312 ದಿನಗಳ ಕಾಲ ಚಂದ್ರನ ಸುತ್ತ ತಿರುಗಾಟ ಪೂರೈಸಿದೆ. ಅಗತ್ಯವಾದ ಅಗಾಧ ಪ್ರಮಾಣದ ಮಾಹಿತಿಯನ್ನು ರವಾನಿಸಿದೆ.ಮುಂದಿನ ಚಂದ್ರಯಾನ ಯೋಜನೆಯನ್ನು 2012 ರಲ್ಲಿ ಪ್ರಾರಂಭಿಸುವ ಸಾಧ್ಯತೆಯಿದೆ. ಒಟ್ಟಾರೆ ಭಾರತದ ಪ್ರಥಮ ಚಂದ್ರಯಾನ ಯೋಜನೆ ತೃಪ್ತಿಕರವಾಗಿದೆ ಎಂದು ಇಸ್ರೋ ಅಧ್ಯಕ್ಷ ಮಾಧವನ್ ನಾಯರ್ ಇತ್ತೀಚೆಗೆ ಹೇಳಿದ್ದರು.

(ದಟ್ಸ್ ಕನ್ನಡವಾರ್ತೆ)