ಬೆಂಗಳೂರು ಜಾಣೆಯರಿಗೆ ಒಬಾಮಾ ಶಹಬ್ಬಾಸ್

ಬೆಂಗಳೂರು, ಜು. 9 : ಬೆಂಗಳೂರು ಸಿಲಿಕಾನ್ ಕಣಿವೆಯಲ್ಲಿ ಹಗಲು ಇರುಳೆನ್ನದೆ ದುಡಿಯುವ ಮಹಿಳೆಯರ ಸಂಖ್ಯೆ ಅಪಾರವಾಗಿದೆ. ಒಂದು ಕಡೆ ತುಂಬಿದ ಮನೆಯ ಮನೆಗೆಲಸಗಳು, ಮಕ್ಕಳನ್ನು ಸಾಕಿಸಲಹುವ ಹೊಣೆ, ತಿಂಗಳು ತಿಂಗಳು ಸಾಲಮರುಪಾವತಿಯ ಜವಾಬ್ದಾರಿಗಳ ಜತೆಗೆ 6 ಗಂಟೆಗೆ ಅಲಾರಾಂ ಇಟ್ಟುಕೊಂಡು ಎದ್ದು ಅಡುಗೆ ಮಾಡಿ ಎಲ್ಲರಿಗೆ ಕೊಟ್ಟು ತಾನು ಒಂದು ಡಬ್ಬಿಯಲ್ಲಿ ಊಟ ಕಟ್ಟಿಕೊಂಡು ಸಮಯಕ್ಕೆ ಸರಿಯಾಗಿ ಆಫೀಸು ತಲಪುವ ಜೀವನ ಎತ್ತಿನ ಗಾಡಿಯನ್ನು ಅವಳು ನಿತ್ಯ ಓಡಿಸಲೇಬೇಕು.

ಇವಳ ಕಷ್ಟ ಕಾರ್ಪಣ್ಯಗಳು ನಾನಾ ಬಗೆ. ಸಂಸಾರ ಸಾಗರ ವರ್ಸ್ಸಸ್ ಪ್ರಾಜೆಕ್ಟ್ ಡೆಡ್ ಲೈನ್ಸ್. ಎಷ್ಟೋ ಮನೆಗಳಲ್ಲಿ "ಅವಳಿಗೆ 60 ಸಾವಿರ ಸಂಬಳ ಬರತ್ತಂತೆ ಇನ್ನೇನು ಬೇಕು" ಎಂದು ಕಾಮೆಂಟು ಹೊಡೀತಾರೇ ಹೊರತು ಎರಡು ತಿಂಗಳು ಸೆಬಾಟಿಕಲ್ ತೊಗೊಳೇ, ನಾನು ನೋಡ್ಕೋತೀನಿ ಎಂದು ಹೇಳುವ ಗಂಡ ಅಥವಾ ಅಣ್ಣತಮ್ಮಂದಿರು ಸಿಗುವುದು ವಿರಳ. ಕಡೆಯಪಕ್ಷ, ಅಯ್ಯೋ ಹೆಣ್ಣುಹೆಂಗಸು ಎಷ್ಟು ಕಷ್ಟ ಪಡ್ತಾಳೆ ನೋಡ್ರೀ ಎಂಬ ಮೆಚ್ಚುಗೆ ಮಾತುಗಳಿಗೂ ಬರಗಾಲ.

ಕರ್ನಾಟಕದ ಸಾಫ್ಟ್ ವೇರ್ ಮಹಿಳೆಯರ ಮಾನಸಿಕ ತುಮುಲಗಳು ಮನೆಯವರಿಗೆ ಅರ್ಥವಾಗದಿದ್ದರೂ ದೂರದ ಅಮೆರಿಕಾದಲ್ಲಿರುವ ಅಣ್ಣ ಒಬಾಮರಿಗೆ ಅದು ಹೇಗೋ ಗೊತ್ತಾಗಿಬಿಟ್ಟಿದೆ. ಮೊನ್ನೆ ಮಾಡಿದ ಒಂದು ಭಾಷಣದಲ್ಲಿ ಒಬಾಮಾ ಹೀಗೆ ಹೇಳಿದ್ದಾರೆ. "ಅಂತರ್ಜಾಲ ಸಂಪರ್ಕ ಹೊಂದಿರುವ ಬೆಂಗಳೂರಿನ ಓರ್ವ ಯುವತಿ ಇವತ್ತು ಜಗತ್ತಿನಲ್ಲಿ ಯಾರೊಂದಿಗೆ ಬೇಕಿದ್ದರೂ ಸಮರ್ಥವಾದ ಸ್ಪರ್ಧೆಗೆ ನಿಲ್ಲಬಲ್ಲಳು!"

ಜಾಗತಿಕ ಮಾರುಕಟ್ಟೆಯಲ್ಲಿ ಸಂಭವಿಸುತ್ತಿರುವ ಕಲ್ಲವಿಲ್ಲಗಳನ್ನು ಸೂಕ್ಷವಾಗಿ ಪ್ರಸ್ತಾಪಿಸಿದ ಅಮೆರಿಕಾದ ಅಧ್ಯಕ್ಷರು 'ಜಾಗರೂಕತೆಯನ್ನು ಗಾಳಿಗೆ ತೂರಿ ವ್ಯವಹಾರ ಮಾಡಿದರೆ, ನಿಯಂತ್ರಣವಿಲ್ಲದೆ ಕೆಲಸಕಾರ್ಯಗಳಲ್ಲಿ ತೊಡಗಿಕೊಂಡರೆ ಅಪಾಯ ಕಟ್ಟಿಟ್ಟ ಬುತ್ತಿ' ಎಂದು ಎಚ್ಚರಿಸಿದರು. ನಡೆಯುವ ನೆಲದ ಮೇಲೆ ಕಣ್ಣಿಲ್ಲದಿದ್ದರೆ ಎಡಹುವುದು ತಪ್ಪುವುದಿಲ್ಲ. ಎಲ್ಲಿ ಹೆಜ್ಜೆ ಇಟ್ಟರೂ ಅಷ್ಟೆ, ಮಿಸ್ಸಿಸ್ಸಿಪ್ಪಿ ಆದರೂ ಅಷ್ಟೆ ಓಲ್ಗಾ ಆದರೂ ಅಷ್ಟೆ ಎಂದು ಮಾರ್ಮಿಕವಾಗಿ ನುಡಿದರು.

ಭಾರತ ಮತ್ತು ಚೀನದಂತಹ ರಾಷ್ಟ್ರಗಳು ಅಭಿವೃದ್ಧಿ ಹೊಂದಬೇಕು. ಅದರಿಂದ ಅಮೆರಿಕಾ ಹಾಗೂ ಪಶ್ಚಿಮ ದೇಶಗಳೂ ಅಭಿವೃದ್ಧಿಯಾಗುತ್ತವೆ. ಇಂಥ ಅಭಿವೃದ್ಧಿ ಚಕ್ರ ಸುತ್ತಲಾರಂಭಿಸಿದರೆ ಎಲ್ಲರಿಗೂ ಒಳಿತಾಗುವುದು ಎಂದು ಒಬಾಮಾ ಅಭಿಪ್ರಾಯಪಟ್ಟರು. ಭಾರತದಲ್ಲಿ ಸಂಪತ್ತು ಹೆಚ್ಚಾದರೆ ಅದು ಅಮೆರಿಕಾದ ಹೊಸ ಮಾರುಕಟ್ಟೆಯ ಬಾಗಿಲುಗಳನ್ನು ತೆರೆಯುತ್ತದೆ ಎಂದು ಹೇಳುವುದನ್ನು ಅವರು ಮರೆಯಲಿಲ್ಲ.

(ದಟ್ಸ್ ಕನ್ನಡ ವಾರ್ತೆ)