ಸಲಿಂಗಕಾಮಿಗಳ ವಿಶೇಷ ಹಬ್ಬಕ್ಕೆ ಬೆಂಗಳೂರು ಸಿಂಗಾರ

ಬೆಂಗಳೂರು, ಜೂ. 20 : ಮಡಿವಂತಿಕೆಯ ಮುಸುಕು ಹೊದ್ದಿರುವ ಭಾರತದಲ್ಲಿ, ಬದಲಾಗುತ್ತಿರುವ ಕಾಲಘಟ್ಟದಲ್ಲಿ ಕೂಡ ಸಲಿಂಗಕಾಮ ಸಮಾಜದಲ್ಲಿ ಅಸಹ್ಯ ಹುಟ್ಟಿರುವ, ಬಹಿಷ್ಕೃತ ಕ್ರಿಯೆಯೇ. ಆದರೆ, ಕಾಲ ಬದಲಾಗುತ್ತಿದೆ, ಸಮಾಜ ಕೂಡ ನಿಧಾನವಾಗಿ ಕಣ್ಣು ತೆರೆಯುತ್ತಿದೆ. ಸಲಿಂಗಕಾಮಿಗಳು ತಮಗೆ ದಕ್ಕಬೇಕಾದ ಹಕ್ಕನ್ನು ಆಗ್ರಹಿಸಿ ಅವಿತುಕೊಂಡಿದ್ದ ಚಿಪ್ಪಿನಿಂದ ಹೊರಬರುತ್ತಿದ್ದಾರೆ.

ಸಮಾಜ ಏನೆನ್ನುತ್ತದೋ ಎಂಬ ಹೆದರಿಕೆಯ ಗೂಡಿನಿಂದ ಹೊರಬಂದು ತಮಗೂ ಸಮಾಜದಲ್ಲಿ ತಲೆಯೆತ್ತಿ ಜೀವಿಸಲು ಅವಕಾಶ ಕೊಡಿ ಎಂದು ಕೂಗಿ ಹೇಳಲು ಸಲಿಂಗಕಾಮಿಗಳು, ದ್ವಿಲಿಂಗಕಾಮಿ, ಖೋಜಾಗಳು, ಲೈಂಗಿಕ ಅಲ್ಪಸಂಖ್ಯಾತರು ಬೆಂಗಳೂರಿನಲ್ಲಿ ವಿಶೇಷ ಹಬ್ಬಕ್ಕೆ ಸದ್ದಿಲ್ಲದೆ ಸಜ್ಜಾಗುತ್ತಿದ್ದಾರೆ.

ಜೂನ್ 21 (ಭಾನುವಾರ)ದಿಂದ ಆರಂಭವಾಗಲಿರುವ ಸಲಿಂಗಕಾಮಿಗಳ ಹಬ್ಬ ಜೂನ್ 28ರವರೆಗೆ ಒಂದು ವಾರ ಅದ್ಧೂರಿಯಿಂದ ಜರುಗಲಿದೆ. ಹಬ್ಬದ ಕೊನೆಯಲ್ಲಿ ಸಲಿಂಗಕಾಮಿಗಳು, ಖೋಜಾಗಳು, ಲೈಂಗಿಕ ಅಲ್ಪಸಂಖ್ಯಾತರು ನಗರದಾದ್ಯಂತ ಮೆರವಣಿಗೆ ನಡೆಸಲಿದ್ದಾರೆ. ಸಮಾಜದಲ್ಲಿ ಗೌರವಯುತವಾಗಿ ಬದುಕುವ ಲೈಂಗಿಕ ಅಲ್ಪಸಂಖ್ಯಾತರ ಹಕ್ಕಿನ ಬಗ್ಗೆ ಜಾಗೃತಿ ಮೂಡಿಸುವ ಉದ್ದೇಶದಿಂದ ಮೆರವಣಿಗೆ ಹಮ್ಮಿಕೊಳ್ಳಲಾಗಿದೆ.

ಈ ಹಬ್ಬ ಇಲ್ಲಿ ನಡೆಯುತ್ತಿರುವುದು ಎರಡನೇ ಬಾರಿ. ಈ ಬಾರಿ ಯಶಸ್ವಿಯಾದರೆ ದೆಹಲಿ, ಕೊಲ್ಕತಾ, ಚೆನ್ನೈ ಮತ್ತು ಭುವನೇಶ್ವರಗಳಲ್ಲಿ ಕೂಡ ಹಬ್ಬ ನಡೆಸುವ ಉದ್ದೇಶವನ್ನು ಆಯೋಜಕರು ಇಟ್ಟುಕೊಂಡಿದ್ದಾರೆ. ಲೈಂಗಿಕ ಕಾರ್ಯಕರ್ತರು ಮತ್ತು ಲೈಂಗಿಕ ಅಲ್ಪಸಂಖ್ಯಾತರ ಒಕ್ಕೂಟ (CSMR) ಈ ಹಬ್ಬವನ್ನು ಆಯೋಜಿಸಿದೆ. ಕಳೆದ ವರ್ಷ ಮೆರವಣಿಗೆಯಲ್ಲಿ 600 ಜನರು ಭಾಗವಹಿಸಿದ್ದರೆ ಈ ಬಾರಿ 1500 ಜನ ಭಾಗವಹಿಸಲಿದ್ದಾರೆ ಎಂದು ಒಕ್ಕೂಟದ ಸದಸ್ಯ ಸಿದ್ದಾರ್ಥ್ ನರೇನ್ ಹೇಳಿದ್ದಾರೆ.

ಸಲಿಂಗಕಾಮಿಗಳು ಮತ್ತು ಲೈಂಗಿಕ ಕಾರ್ಯಕರ್ತರ ನಡುವೆ ಕ್ರಿಕೆಟ್ ಪಂದ್ಯ, ವಿಚಾರ ಸಂಕಿರಣ, ಚಿತ್ರ ಪ್ರದರ್ಶನ, ನಾಟಕ, ನೃತ್ಯ, ಕಥೆ ಹೇಳುವುದು ಮತ್ತು, ಧರ್ಮ ಹಾಗು ಲೈಂಗಿಕತೆ ಕುರಿತಂತೆ ಉಪನ್ಯಾಸಗಳು ನಗರದಾದ್ಯಂತ ನಡೆಯಲಿವೆ. ಬಸವನಗುಡಿಯ ನ್ಯಾಷನಲ್ ಕಾಲೇಜಿನಿಂದ ಪ್ರಾರಂಭವಾಗುವ ಮೆರವಣಿಗೆ ಸಜ್ಜನ್ ರಾವ್ ವೃತ್ತ, ಮಿನರ್ವಾ ವೃತ್ತ, ಜೆಸಿ ರಸ್ತೆ ಮುಖಾಂತರ ಪುಟ್ಟಣ್ಣ ಚೆಟ್ಟಿ ಪುರಭವನದಲ್ಲಿ ಕೊನೆಯಾಗಲಿದೆ.

(ಏಜೆನ್ಸೀಸ್)