ಟಿಸಿಎಸ್ ಮುಖ್ಯಸ್ಥರ ಸಂಭಾವನೆ ಕೋಟಿ ಕೋಟಿ

ನವದೆಹಲಿ, ಜೂ. 8 : ಜಾಗತಿಕ ಆರ್ಥಿಕ ಹಿಂಜರಿತದಿಂದಾಗಿ ಅನೇಕ ಜನ ಉದ್ಯೋಗ ಕಡಿತ, ಸಂಬಳ ಕಡಿತದಂತ ಕತ್ತರಿ ಪ್ರಯೋಗಕ್ಕೆ ಒಳಗಾಗಿದ್ದರೆ, ದೇಶದ ಪ್ರತಿಷ್ಠಿತ ಐಟಿ ಸಂಸ್ಥೆ ಟಿಸಿಎಸ್ ತನ್ನ ಉನ್ನತಾಧಿಕಾರಿಗಳಿಗೆ 1 ಕೋಟಿಗಿಂತಲೂ ಅಧಿಕ ಮೊತ್ತದ ವಾರ್ಷಿಕ ವೇತನ ನೀಡುತ್ತಿದೆ. ಇದರಿಂದಾಗಿ ಇನ್ನಷ್ಟು ನೇಮಕವಾಗಬೇಕಿರುವ ನೂತನ ಮುಖ್ಯನಿರ್ವಹಣಾಧಿಕಾರಿ ಕೂಡ ಈ ಹಿಂದಿನ ಸಿಇಓಗಿಂತ ಹೆಚ್ಚಿನ ಮೊತ್ತದ ವೇತನವನ್ನು ಪಡೆದುಕೊಳ್ಳಲಿದ್ದಾರೆ.

2008-09 ನೇ ಸಾಲಿನಲ್ಲಿ ಸಂಸ್ಥೆಯ ಪ್ರಮುಖ ಹುದ್ದೆಯಲ್ಲಿರುವವರು ಹಾಗೂ ನಿರ್ದೇಶಕ ಮಂಡಳಿ ಸದಸ್ಯರು 12.80 ಕೋಟಿ ರುಪಾಯಿ ಸಂಭಾವನೆ ಪಡೆದಿದ್ದಾರೆ. ಈ ಹಿಂದಿನ ವರ್ಷದಲ್ಲಿ ಅವರ ವೇತನ 11.08 ಕೋಟಿ ರುಪಾಯಿ ಆಗಿತ್ತು. ಟಿಸಿಎಸ್ ವಾರ್ಷಿಕ ವರದಿಯ ಪ್ರಕಾರ, ರಾಮದೊರೈ 4.1 ಕೋಟಿ ರುಪಾಯಿ ವೇತನದೊಂದಿಗೆ ಮೊದಲಿಗರಾಗಿದ್ದರೆ, ಸಿಒಒ ಎನ್ ಚಂದ್ರಶೇಖರನ್ ಅವರು ಪಡೆದಿರುವ ವೇತನ 1.92 ಕೋಟಿ ರುಪಾಯಿ. ಕಾರ್ಯಕಾರಿ ನಿರ್ದೇಶಕ ಫಿರೋಜ್ ವಂದ್ರೆವಾಲಾ ಅತ್ಯಧಿಕ ಪ್ರಮಾಣ ಅಂದರೆ ಶೇ. 41 ರಷ್ಟು ಹೆಚ್ಚಳ ಪಡೆದಿದ್ದು, ಅವರ ವೇತನ 1 ರಿಂದ 1.40 ಕೋಟಿಗೆ ಏರಿದೆ.

ಇವರಿಬ್ಬರ ಸಂಬಳ ಹೆಚ್ಚಾಗಿದ್ದರಿಂದ ಪ್ರತಿಯೊಬ್ಬ ಸಿಬ್ಬಂದಿ ವೆಚ್ಚ ಕೂಡಾ ಶೇ 25 ರಷ್ಟು ಹೆಚ್ಚಾಗಿದೆ. ಇದೇ ವೇಳೆ ಟಿಸಿಎಸ್ ನ ನಾನ್ ಎಕ್ಸಿಕ್ಯೂಟಿವ್ ಚೇರಮನ್ ರತ್ನ ಟಾಟಾ ಅವರ ಸಂಭಾವನೆ ಹೆಚ್ಚಾಗಿಲ್ಲ. ವೇತನ, ಕಮೀಷನ್ ಹಾಗೂ ಶುಲ್ಕ ಸೇರಿ 55.60 ಲಕ್ಷ ರುಪಾಯಿ ಪಡೆಯುತ್ತಿದ್ದಾರೆ.

(ಏಜನ್ಸೀಸ್)