ನ್ಯಾನೋ ಕಾರು ಬಿಡುಗಡೆ ಮಾಡಿದ ರತನ್ ಟಾಟಾ

ಮುಂಬೈ, ಮಾ. 23 : ಮಧ್ಯಮ ವರ್ಗದ ಜನ ತೀವ್ರ ಕುತೂಹಲದಿಂದ ಕಾಯುತ್ತಿರುವ ಟಾಟಾ ನ್ಯಾನೋ ಕಾರನ್ನು ಟಾಟಾ ಕಂಪನಿಯ ಮುಖ್ಯಸ್ಥ ರತನ್ ಟಾಟಾ ಇಂದು ಅಧಿಕೃತವಾಗಿ ಮಾರುಕಟ್ಟೆ ಬಿಡುಗಡೆ ಮಾಡಿದರು. ಏಪ್ರಿಲ್ 9 ರಿಂದ 25ರ ವರೆಗೆ ಟಾಟಾ ನ್ಯಾನೋ ಕಾರಿನ ಬುಕ್ಕಿಂಗ್ ಆರಂಭವಾಗುತ್ತಿದ್ದು, 2,999 ರುಪಾಯಿಗಳನ್ನು ನೀಡಿ ಬುಕ್ಕಿಂಗ್ ಮಾಡಿಕೊಳ್ಳಬಹುದು. ಮಧ್ಯಮ ವರ್ಗದ ಜನರು ಇದರ ಸದುಪಯೋಗ ಪಡೆದುಕೊಳ್ಳಬೇಕು ಎಂದು ರತನ್ ಟಾಟಾ ತಿಳಿಸಿದರು.

ಮುಂಬೈನ ತಾಜ್ ಹೋಟೆಲ್ ನಲ್ಲಿ ಪತ್ರಿಕಾಗೋಷ್ಠಿ ನಡೆಸಿ ಈ ವಿಷಯವನ್ನು ಅವರು ತಿಳಿಸಿದರು. ಬುಕ್ಕಿಂಗ್ ಫಾರಂಗೆ 300 ರುಪಾಯಿಗಳನ್ನು ಪಡೆಯಲಾಗುತ್ತಿದೆ. ಕಾರಿನ ಬೆಲೆ 1 ಲಕ್ಷ ರುಪಾಯಿ ಆಗಿದ್ದು, ರಸ್ತೆಗೆ ಬರುವ ಹೊತ್ತಿಗೆ 1.20 ರಿಂದ 1.30 ಲಕ್ಷ ರುಪಾಯಿಗಳನ್ನು ನೀಡಬೇಕಾಗುತ್ತದೆ. 18 ತಿಂಗಳು ವಾರೆಂಟಿ ಇಲ್ಲವೇ 20 ಸಾವಿರ ಕಿ ಮೀ ಬಳಕೆ ವರೆಗೂ ವಾರೆಂಟಿ ನೀಡಲಾಗುತ್ತಿದೆ. ಈ ವರ್ಷ 1 ಲಕ್ಷ ಕಾರನ್ನು ಹೊರತರುವ ಯೋಜನೆ ಇದ್ದು, ಈಗಾಗಲೇ ದೇಶದ 1 ಸಾವಿರ ನಗರಗಳಲ್ಲಿ ಸುಮಾರು 30 ಸಾವಿರಕ್ಕೊ ಹೆಚ್ಚು ಕಾರುಗಳು ಬುಕ್ ಆಗಿವೆ ಎಂದರು.

ನ್ಯಾನೋ ಕಾರಿನಲ್ಲಿ ಮೂರು ಬಗೆಯಲ್ಲಿದ್ದು, ಸ್ಟ್ಯಾಂಡರ್ಡ್, ಸಿಎಕ್ಸ ಮತ್ತು ಎಲ್ ಎಕ್ಸ್ ಎಂಬ ಹೆಸರಿನ ನ್ಯಾನೋ ಕಾರುಗಳನ್ನು ಬಿಡುಗಡೆ ಮಾಡಲಾಗುವುದು. ಜುಲೈ ತಿಂಗಳಿನಿಂದ ಕಾರಿನ ಮಾರಾಟ ಆರಂಭವಾಗುವುದು. ಪ್ರತಿ ಲೀಟರ್ ಗೆ 24 ಕಿ ಮೀ ಮೈಲೇಜ್ ನೀಡಲಿದೆ ಎಂದು ಟಾಟಾ ಹೇಳಿದರು.

(ದಟ್ಸ್ ಕನ್ನಡ ವಾರ್ತೆ)