ಎಲ್ಪಿಜಿ ಕಿಟ್ ಜೋಡಣೆಗೆ ಸಹಾಯಧನ

ಬೆಂಗಳೂರು, ಫೆ.6: ಪರಿಸರ ಮಾಲಿನ್ಯವನ್ನು ಮಿತಿಗೊಳಿಸುವ ದೃಷ್ಟಿಯಿಂದ ಆಟೋರಿಕ್ಷಾ, ಕ್ಯಾಬ್ ವಾಹನಗಳಿಗೆ ಎಲ್.ಪಿ.ಜಿ. ಕಿಟ್ ಜೋಡಣೆಗಳಿಗೆ ಸರ್ಕಾರದ ವತಿಯಿಂದ ಸಹಾಯಧನ ನೀಡುವ ಮೂಲಕ ಉತ್ತೇಜಿಸಲಾಗುತ್ತಿದೆ.

ಬೆಂಗಳೂರು ನಗರದಲ್ಲಿ ನೋಂದಣೆಯಾಗಿ ರಹದಾರಿ ಹೊಂದಿದ್ದ ಎಲ್ಲಾ ಆಟೋರಿಕ್ಷಾ ಕ್ಯಾಬ್‌ಗಳಿಗೆ ಎಲ್.ಪಿ.ಜಿ. ಕಿಟ್ ಜೋಡಣೆ ಮಾಡಿಕೊಂಡು ದ್ವಿ ಇಂಧನ ವ್ಯವಸ್ಥೆಗೆ ಪರಿವರ್ತನೆ ಮಾಡಿಕೊಂಡ ಆಟೋರಿಕ್ಷಾ ಮಾಲೀಕರುಗಳಿಗೆ 2005 ರಿಂದ ಈಚೆಗೆ ರು.2000 ದಂತೆ ಸಹಾಯಧನ ನೀಡಲಾಗಿದೆ.

ಈ ಯೋಜನೆಯನ್ನು 2008-09ನೇ ಸಾಲಿಗೆ ರಾಜ್ಯದ ಇತರೆ ನಗರಗಳಿಗೆ ವಿಸ್ತರಿಸಿದೆ. ರಾಜ್ಯದ ಪ್ರಮುಖ ಜಿಲ್ಲೆ ಹಾಗೂ ತಾಲ್ಲೂಕುಗಳಲ್ಲಿ ರಿ-ಫಿಲ್ಲಿಂಗ್ ಸೌಲಭ್ಯ ಮತ್ತು ರೆಟ್ರೋಫಿಂಟ್‌ಮೆಂಟ್ ಕೇಂದ್ರಗಳು ಇರುವ ನಗರಗಳಾದ ಮೈಸೂರು, ಹುಬ್ಬಳ್ಳಿ-ಧಾರವಾಡ, ಬೆಳಗಾವಿ, ಗುಲ್ಬರ್ಗಾ, ಮಂಗಳೂರು, ಉಡುಪಿ, ತುಮಕೂರು, ದಾವಣಗೆರೆ, ಶಿವಮೊಗ್ಗ, ಹಾಸನ ಮತ್ತು ಪುತ್ತೂರು ಇಲ್ಲಿ ಆಟೋರಿಕ್ಷಾ ಕ್ಯಾಬ್ ವಾಹನಗಳಿಗೆ ಅಧಿಕೃತ ಕಿಟ್‌ಗಳನ್ನು ಅಳವಡಿಸಿಕೊಂಡ, ವಾಹನ ನೋಂದಣೆ ಪುಸ್ತಕದಲ್ಲಿ ದ್ವಿ ಇಂಧನ ವ್ಯವಸ್ಥೆಯನ್ನು ನಮೂದಿಸಿಕೊಂಡಂತಹ ಆಟೋರಿಕ್ಷಾ ಮಾಲೀಕರುಗಳಿಗೂ ರು.2000 ಸಹಾಯಧನ ನೀಡಲು ಸರ್ಕಾರದ ಆದೇಶವಾಗಿದೆ.

ಈ ಪ್ರಯೋಜನವನ್ನು ಆಟೋರಿಕ್ಷಾ ಕ್ಯಾಬ್ ಮಾಲೀಕರುಗಳು ಪಡೆಯಲು ಕೋರಿದೆ. ಹೆಚ್ಚಿನ ಮಾಹಿತಿಗಾಗಿ ಸಂಬಂಧಪಟ್ಟ ಪ್ರಾದೇಶಿಕ ಸಾರಿಗೆ ಅಧಿಕಾರಿಗಳನ್ನು ಸಂಪರ್ಕಿಸಲು ಕೋರಿದೆ.

(ದಟ್ಸ್ ಕನ್ನಡ ವಾರ್ತೆ)