ಗುರುವಾರ ಪೆಟ್ರೋಲ್ ಡೀಸೆಲ್ ಬೆಲೆ ಇಳಿಕೆ

ನವದೆಹಲಿ, ಜ. 14 : ಪೆಟ್ರೋಲ್, ಡೀಸೆಲ್, ಎಲ್ ಪಿಜಿ ಬೆಲೆ ಇಳಿಕೆ ಇಂದಾಗುವುದೋ, ನಾಳೆಯಾಗುವುದೋ, ಎಂದಾಗುವುದೋ ಎಂದು ಚಾತಕ ಪಕ್ಷಿಗಳಂತೆ ಕಾಯುತ್ತಿದ್ದ ದೇಶದ ಸಾಮಾನ್ಯ ಜನತೆಗೆ ಜನವರಿ 15ರಂದು ಗುರುವಾರ ಸಿಹಿ ಉತ್ತರ ಸಿಗಲಿದೆ.

ಪೆಟ್ರೋಲ್ ಬೆಲೆ ಲೀಟರಿಗೆ 5 ರು., ಡೀಸೆಲ್ ಬೆಲೆ 3 ರು. ಮತ್ತು ಎಲ್ ಪಿಜಿ ಬೆಲೆ ಪ್ರತಿ ಸಿಲಿಂಡರ್ ಗೆ 25 ರು. ಇಳಿಯುವುದು ಖಚಿತವಾಗಿದೆ. ಬೆಲೆ ಇಳಿಕೆಯೊಂದಿಗೆ ಇವುಗಳನ್ನು ಆಡಳಿತಾತ್ಮಕ ನಿಯಂತ್ರಣದಿಂದ ಹೊರಗಿಡಲು ಕೇಂದ್ರ ಸರ್ಕಾರ ನಿರ್ಧರಿಸಿದೆ. ಈ ಕುರಿತಂತೆ ಅಂತಿಮ ನಿರ್ಧಾರ ಕೈಗೊಳ್ಳಲು ಕೇಂದ್ರ ಸಂಪುಟ ಗುರುವಾರ ಸಭೆ ಸೇರಲಿದೆ.

ರಾಜ್ಯಗಳ ಹಿಡಿತದಲ್ಲಿರುವ ಪೆಟ್ರೋಲ್ ಕಂಪನಿಗಳು ಸದ್ಯಕ್ಕೆ ಪೆಟ್ರೋಲ್ ಮಾರಾಟದಿಂದ ಪ್ರತಿ ಲೀಟರಿಗೆ 9.70 ರು., ಡೀಸೆಲ್ ನಿಂದ 3.70 ರು. ಲಾಭ ಮಾಡಿಕೊಳ್ಳುತ್ತಿವೆ. ಆದರೆ ಸಿಲಿಂಡರ್ ನಿಂದ 31.70 ರು. ಮತ್ತು ಕೆರೋಸಿನ್ ನಿಂದ 11.69 ರು. ನಷ್ಟ ಅನುಭವಿಸುತ್ತಿವೆ. ಸಿಲಿಂಡರ್ ಮತ್ತು ಕೆರೋಸಿನ್ ನಿಂದ ಆದ ನಷ್ಟವನ್ನು ಸರಿದೂಗಿಸಲು ಪ್ರಸಕ್ತ ವರ್ಷದಲ್ಲಿ 30 ಸಾವಿರ ಕೋಟಿಯಷ್ಟು ಹೆಚ್ಚಿನ ತೈಲ ಬಾಂಡ್ ಗಳನ್ನು ವಿತರಿಸಲು ನಿರ್ಧರಿಸಿದೆ.

ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಪ್ರತಿ ಬ್ಯಾರೆಲ್ ಗೆ 40 ಡಾಲರಿಗಿಂತ ಕೆಳಗಿ ಇಳಿದಿದ್ದು, ಕಳೆದ ಡಿಸೆಂಬರಿನಲ್ಲಿ ತೈಲೋತ್ಪನ್ನಗಳ ಬೆಲೆ ಕೇಂದ್ರ ಇಳಿಸಿತ್ತು.

(ಏಜೆನ್ಸೀಸ್)