ಒಲಿಂಪಿಕ್ಸ್ : ರಷ್ಯಾದ ಎಲೆನಾ ನೂತನ ವಿಶ್ವದಾಖಲೆ
ಬೀಜಿಂಗ್, ಆ. 19 : ರಷ್ಯಾದ ಎಲೆನಾ ಇಸಿನ್ ಬಯೆವಾ ಅವರು ಪೋಲ್ ವಾಲ್ಟಿಂಗ್ ಸ್ಪರ್ಧೆಯಲ್ಲಿ ತಮ್ಮದೇ ಹಳೆಯ ದಾಖಲೆಯನ್ನು ಮುರಿದು ನೂತನ ವಿಶ್ವದಾಖಲೆ ಬರೆಯುವ ಮೂಲಕ ಒಲಿಂಪಿಕ್ಸ್ ಕ್ರೀಡಾಕೂಟದಲ್ಲಿ ಚಿನ್ನ ಪದಕ ಗಳಿಸಿದ್ದಾರೆ.
ಮಂಗಳವಾರ ನಡೆದ ಸ್ಪರ್ಧೆಯಲ್ಲಿ ರಷ್ಯಾದ ಪೋಲ್ ವಾಲ್ಟಿಂಗ್ ಪಟು 26ರ ಹರೆಯದ ಎಲೆನಾ ಇಸಿನ್ ಬಯೆವಾ ಅವರು 5.05 ಮೀ ಎತ್ತರ ಸ್ಪರ್ಧೆಯಲ್ಲಿ ಗೆಲುವು ಸಾಧಿಸುವ ಮೂಲಕ ತಮ್ಮದೇ ಹಳೆಯ ದಾಖಲೆಯನ್ನು ಮುರಿದರು. ಕಳೆದ ವರ್ಷ ಮೊನಾಕೂದಲ್ಲಿ ನಡೆದ ಪೋಲ್ ವಾಲ್ಟಿಂಗ್ ಸ್ಪರ್ಧೆಯಲ್ಲಿ 5.04 ಎತ್ತರ ಜಿಗಿದು ಪ್ರಶಸ್ತಿ ಪಡೆದುಕೊಂಡಿದ್ದರು. ಕಳೆದ ನಾಲ್ಕು ವರ್ಷದಿಂದ ಎಲೆನಾ ಇಸಿನ್ ಬಯೆವಾ ಅವರಿಗೆ ಪೋಲ್ ವಾಲ್ಟಿಂಗ್ ಸ್ಪರ್ಧೆಯಲ್ಲಿ ಎದುರಾಳಿಗಳು ಇಲ್ಲದಂತಾಗಿದೆ. 2004 ರಿಂದ ಇವರೆ ಚಿನ್ನದ ಪದಕವನ್ನು ಪಡೆದುಕೊಳ್ಳುತ್ತಿದ್ದಾರೆ.
ಚಿನ್ನದ ಪದಕ ಪಡೆದಿರುವುದಕ್ಕೆ ಸಂತಸ ವ್ಯಕ್ತಪಡಿಸುವ ಎಲೆನಾ ಇಸಿನ್ ಬಯೆವಾ ಅವರು, ಪೋಲ್ ವಾಲ್ಟಿಂಗ್ ಸ್ಪರ್ಧೆಯಲ್ಲಿ ಏಕೈಕ ಆಟಗಾರ್ತಿ ಎಂಬ ಹೆಗ್ಗಳಿಕೆಯನ್ನು ಉಳಿಸಿಕೊಂಡು ಹೋಗುವೆ ಎಂದು ವಿಶ್ವಾಸದಿಂದ ಅವರು ಹೇಳಿದರು.
(ದಟ್ಸ್ ಕನ್ನಡ ವಾರ್ತೆ)
ಒಲಿಂಪಿಕ್ಸ್ :ಲಾಂಗ್ ಜಂಪ್ ಪಟು ಅಂಜು ಹೊರಕ್ಕೆ