ಉದ್ದೀಪನ ಮದ್ದು : ಮತ್ತೆ ಸಂಕಷ್ಟಕ್ಕೆ ಪಾಕ್ ವೇಗಿ

ಜಿನೆವಾ, ಆ. 19 : ಉದ್ದೀಪನ ಮದ್ದು ಸೇವನೆ ಆರೋಪವನ್ನು ಎದುರಿಸುತ್ತಿರುವ ಪಾಕಿಸ್ತಾನದ ವೇಗಿ ಮಹ್ಮದ್ ಆಸೀಫ್ ಅವರ ರಕ್ತದಲ್ಲಿ ನಿಷೇಧಿತ ಮದ್ದು ಇರುವುದು ಸಾಬೀತಾಗಿದೆ. ಈ ಮೂಲಕ ಆಸೀಫ್ ಕ್ರಿಕೆಟ್ ಜೀವನದ ಮೇಲೆ ಭಾರಿ ಪರಿಣಾಮ ಬೀರಿದ್ದು, ಕ್ರಿಕೆಟ್ ನಿಂದ ಆಜೀವ ನಿಷೇಧ ಹೇರುವ ಸಾಧ್ಯತೆಯಿದೆ ಎಂದು ಮೂಲಗಳು ತಿಳಿಸಿವೆ.

ಮಂಗಳವಾರ ನಗರದಲ್ಲಿ ಆಸೀಫ್ ರಕ್ತ ಪರೀಕ್ಷೆ ನಡೆಸಲಾಗಿದ್ದು, ಅವರ ರಕ್ತದಲ್ಲಿ ಉದ್ದೀಪನ ಮದ್ದು ಇರುವುದು ಖಾತ್ರಿಯಾಗಿದೆ. ಎರಡೆರಡು ಭಾರಿ ರಕ್ತ ಪರೀಕ್ಷೆ ಮಾಡಿ ಉದ್ದೀಪನ ಸೇವನೆಯನ್ನು ಖಚಿತಪಡಿಸಿಕೊಳ್ಳಲಾಗಿದೆ ಎಂದು ಮೂಲಗಳು ತಿಳಿಸಿವೆ. ಪಾಕಿಸ್ತಾನ ಕ್ರಿಕೆಟ್ ಬೋರ್ಡ್ ಕ್ರೀಡೆಯಲ್ಲಿ ಮೋಸ, ವಂಚನೆ ಮಾಡುವ ಆಟಗಾರರನ್ನು ರಕ್ಷಿಸುವ ಮಾತೇ ಇಲ್ಲ ಎಂದು ಸ್ಪಷ್ಟಪಡಿಸಿದೆ. ಈ ಹಿನ್ನೆಲೆಯಲ್ಲಿ ಆಸೀಫ್ ಅವರಿಗೆ ಅಂತರಾಷ್ಟ್ರೀಯ ಕ್ರಿಕೆಟ್ ನಿಂದ ಆಜೀವ ನಿಷೇಧ ಹೇರುವ ಸಾಧ್ಯತೆಗಳಿವೆ ಎನ್ನಲಾಗಿದೆ. ಬ್ರಿಟನ್ ಸ್ಪೋರ್ಟ್ಸ್ ಮೆಡಿಶಿನ್ ತಜ್ಞ ಡಾ. ಗ್ರಾಹಂ ಅವರು ಆಸೀಫ್ ಅವರ ರಕ್ತ ಪರೀಕ್ಷೆ ನಡೆಸಿ ಉದ್ದೀಪನ ಮದ್ದು ಇರುವುದನ್ನು ಖಚಿತಪಡಿಸಿದ್ದಾರೆ.

ಭಾರತದಲ್ಲಿ ನಡೆದ ಐಪಿಎಲ್ ಕ್ರಿಕೆಟ್ ಮುಗಿದ ನಂತರ ದುಬೈ ಮೂಲಕ ಪಾಕಿಸ್ತಾನಕ್ಕೆ ತೆರಳುತ್ತಿರುವ ಸಂದರ್ಭದಲ್ಲಿ ವಿಮಾನ ನಿಲ್ದಾಣದಲ್ಲಿ ಉದ್ದೀಪನ ಮದ್ದು ಸೇವನೆ ಹಿನ್ನೆಲೆಯಲ್ಲಿ ಬಂಧನಕ್ಕೆ ಒಳಗಾಗಿ 19 ದಿನ ಜೈಲು ವಾಸ ಅನುಭವಿಸಿದ್ದರು. ಆ ನಂತರ ಇವರ ಅನೇಕ ಸಮಸ್ಯೆಗಳನ್ನು ಎದುರಿಸಬೇಕಾಯಿತು.

(ದಟ್ಸ್ ಕನ್ನಡ ವಾರ್ತೆ)