ಹಿಂಸೆ ಬಿಡಿ, ಮಾತುಕತೆಗೆ ಕೂರಿ: ನಕ್ಸಲ್‌ರಿಗೆ ಧರ್ಮಸಿಂಗ್‌ ಕರೆ

ಹಿಂಸೆ ಬಿಡಿ, ಮಾತುಕತೆಗೆ ಕೂರಿ: ನಕ್ಸಲ್‌ರಿಗೆ ಧರ್ಮಸಿಂಗ್‌ ಕರೆ
ನಕ್ಸಲರು ಹಿಂಸೆಗಿಳಿದರೆ ಸರ್ಕಾರ ಮೂಕ ಪ್ರೇಕ್ಷಕನಾಗಿ ಕುಳಿತುಕೊಳ್ಳಲು ಸಾಧ್ಯವಿಲ್ಲ

ಒಂದೆಡೆ ಪಶ್ಚಿಮ ಘಟ್ಟದ ಅರಣ್ಯ ಪ್ರದೇಶಗಳಲ್ಲಿ ನಕ್ಸಲರಿಗಾಗಿ ಪೊಲೀಸರು ಜಾಲಾಡತೊಡಗಿದ್ದರೆ, ಇ್ನನೊಂದೆಡೆ ನಕ್ಸಲರೊಂದಿಗೆ ಮಾತುಕತೆಗೆ ಸಿದ್ಧ ಎಂದು ಮುಖ್ಯಮಂತ್ರಿ ಧರ್ಮಸಿಂಗ್‌ ಬೆಂಗಳೂರಿನಲ್ಲಿ ಪ್ರಕಟಿಸಿದ್ದಾರೆ.

ನಕ್ಸಲರೊಂದಿಗೆ ಮಾತುಕತೆಗೆ ನಾವು ಸಿದ್ಧ . ಆದರೆ ನಕ್ಸಲರು ಹಿಂಸೆಗಿಳಿದರೆ ಸರ್ಕಾರ ಮೂಕ ಪ್ರೇಕ್ಷಕನಾಗಿ ಕುಳಿತುಕೊಳ್ಳಲು ಸಾಧ್ಯವಿಲ್ಲ ಎಂದು ಅ.13ರಂದು ಸುದ್ದಿಗಾರರೊಂದಿಗೆ ಮಾತನಾಡಿದ ಮುಖ್ಯಮಂತ್ರಿ ಧರ್ಮಸಿಂಗ್‌ ಹೇಳಿದರು.

ನಕ್ಸಲ್‌ ಸಮಸ್ಯೆಯನ್ನು ಸಾಮಾಜಿಯ ಸಮಸ್ಯೆಯನ್ನಾಗಿ ಪರಿಗಣಿಸಲು ಸರ್ಕಾರ ಯೋಚಿಸುತ್ತಿದೆ. ಆ ಕಾರಣದಿಂದಲೇ ಅವರೊಂದಿಗೆ ಮಾತುಕತೆಗೆ ಸಿದ್ಧವಿದೆ ಎಂದ ಧರ್ಮಸಿಂಗ್‌, ಈ ಹಿನ್ನೆಲೆಯಲ್ಲಿ ಆಂಧ್ರ ಸರ್ಕಾರ ಹಾಗೂ ನಕ್ಸಲ್‌ ನಾಯಕರೊಡನೆ ನಡೆಯುತ್ತಿರುವ ಮಾತುಕತೆಯನ್ನು ಉದಾಹರಿಸಿದರು.

ಜನರ ಹಿತಾಸಕ್ತಿಯನ್ನು ರಕ್ಷಿಸುವುದು ಸರ್ಕಾರದ ಪ್ರಾಥಮಿಕ ಕರ್ತವ್ಯ ಎಂದು ಸ್ಪಷ್ಟಪಡಿಸಿದ ಧರ್ಮಸಿಂಗ್‌- ನಕ್ಸಲರು ಮೊದಲು ಹಿಂಸಾತ್ಮಕ ಚಟುವಟಿಕೆಗಳನ್ನು ನಿಲ್ಲಿಸಬೇಕು ಎಂದು ಕರೆ ನೀಡಿದರು.

ಆಗುಂಬೆ ಬಳಿಯ ಬರ್ಕಾಣ ಜಲಪಾತದಿಂದ 5 ಕಿಮೀ ದೂರದಲ್ಲಿ ಅ. 11ರಂದು ನಕ್ಸಲರು ಹಾಗೂ ಪೊಲೀಸರ ನಡುವೆ ಗುಂಡಿನ ಚಕಮಕಿ ನಡೆದಿತ್ತು . ಈ ಚಕಮಕಿಯಲ್ಲಿ ನಕ್ಸಲ್‌ ಗುಂಪಿನಲ್ಲಿ ಸಾವುನೋವು ಉಂಟಾಗಿರಬಹುದು ಎಂದು ಊಹಿಸಲಾಗಿದೆ.

(ಪಿಟಿಐ)

ಮುಖಪುಟ / ಧರ್ಮ-ಕಾರಣ