ಬೆಂಗಳೂರಲ್ಲಿ ಮಳೆ! 4 ದಶಕದ ಜುಲೈ ಪಟ್ಟೀಲಿ 2004ರ ಜುಲೈ ನಂ.1

ಬೆಂಗಳೂರಲ್ಲಿ ಮಳೆ! 4 ದಶಕದ ಜುಲೈ ಪಟ್ಟೀಲಿ 2004ರ ಜುಲೈ ನಂ.1
ಜುಲೈ ಪ್ರಥಮಾರ್ಧದಲ್ಲಿ 246.6 ಮಿಮೀ ದಾಖಲೆ ಮಳೆ

ತುಂಬಿದ ಕೆರೆಗಳಿಂದಾಗಿ ಬೆಂಗಳೂರೆಂಬ ಮಹಾನಗರಿಯಲ್ಲಿ ಗಂಗಾವತರಣ ಉಂಟಾಗಿರುವ ಸಂದರ್ಭದಲ್ಲಿ , ಮಳೆಯ ಮುಸುಕು ಮಹಾನಗರಿಯ ಮೇಲೆ ಮುಂದುವರೆದಿದೆ. ಮತ್ತೊಂದು ವಿಷಯ. ಈ ಜುಲೈ ತಿಂಗಳ ಮೊದಲ ಭಾಗದಲ್ಲಿ ಸುರಿದಿರುವ ಮಳೆ ದಾಖಲೆಯ ಮಳೆಯಂತೆ !

ಕಳೆದ 40 ವರ್ಷಗಳ ಜುಲೈ ತಿಂಗಳುಗಳ ಪೈಕಿ 2004 ರ ಜುಲೈ ದಾಖಲೆ ಮಳೆಯ ದಾಖಲೆ ತನ್ನದಾಗಿಸಿಕೊಂಡಿದೆ. ಈ ವರ್ಷ ಜುಲೈ ತಿಂಗಳ ಮೊದಲ ಭಾಗದಲ್ಲೇ 246.6 ಮಿಮೀ ಮಳೆ ಬೆಂಗಳೂರಲ್ಲಿ ಸುರಿದಿದೆ. 40 ವರ್ಷಗಳ ಹಿಂದೆ, 1964ರಲ್ಲಿ 285.6 ಮಿಮೀ ಮಳೆ ಸುರಿದಿತ್ತು .

ಜುಲೈನ ಎರಡನೇ ಭಾಗದಲ್ಲೂ ಮಳೆ ಮುಂದುವರಿಯುತ್ತಾ ? ಈ ಬಗ್ಗೆ ಹವಾಮಾನ ಇಲಾಖೆ ಅಂಥ ಆಶಾಭಾವವನ್ನೇನೂ ಹೊಂದಿಲ್ಲ . ಇಲಾಖೆ ನಿರ್ದೇಶಕ ಡಾ.ಎ.ಎಲ್‌.ಕೊಪ್ಪರ್‌ ಹೇಳುತ್ತಾರೆ :

ಜುಲೈ ತಿಂಗಳ ದ್ವಿತೀಯಾರ್ಧದಲ್ಲಿ ಮಳೆ ಅಷ್ಟಾಗಿ ಇರದು. ಒಣ ವಾತಾವರಣವೇ ನಗರಕ್ಕೆ ಮಾಮೂಲು. ಹಾಗೆ ನೋಡುವುದಾದರೆ ಜುಲೈ ತಿಂಗಳು ಒದ್ದೆ ತಿಂಗಳೇನೂ ಅಲ್ಲ . ಈ ಸಲ ಸಂಪ್ರದಾಯಕ್ಕೆ ವಿರುದ್ಧವಾಗಿ ಕರ್ನಾಟಕದಲ್ಲಿ ಮಾನ್ಸೂನ್‌ ಚಿಗುರಿಕೊಂಡಿದೆ. ಇದಕ್ಕೆ ಬಂಗಾಳಕೊಲ್ಲಿಯಲ್ಲಿ ಉಂಟಾದ ವಾಯುಭಾರ ವ್ಯತ್ಯಾಸವೇ ಕಾರಣ.

ಕಳೆದೊಂದು ವಾರದಲ್ಲಿ ಬೆಂಗಳೂರಿನಲ್ಲಿ ಬಿದ್ದಿರುವ ಮಳೆಯ ಪ್ರಮಾಣವೆಷ್ಟು ಗೊತ್ತಾ ?

ಜುಲೈ 8- 53.8 ಮೀಮಿ
ಜುಲೈ 9- 73.9 ಮಿಮೀ
ಜುಲೈ 10- 50.6 ಮಿಮೀ
ಜುಲೈ 11 - 5-6 ಮಿಮೀ
ಜುಲೈ 12- 43.4 ಮಿಮೀ
ಜುಲೈ 13- 8.8 ಮಿಮೀ
ಜುಲೈ 14- 0.1 ಮಿಮೀ

ಮಳೆ ಮುಸುಕು ಮುಂದುವರೆದಿದೆ. ಈಗಿನದು ತುಂತುರಿನ ಸೊಗಸು.

(ಇನ್ಫೋ ವಾರ್ತೆ)

ಮುಖಪುಟ / ಬೆಂಗಳೂರು ಡೈರಿ