ಹಾಸನ ಹೊರವಲಯದಿ ಪೆಟ್ರೋಲ್‌ ಬಂಕ್‌ ಲೂಟಿ, ಐವರ ಕಗ್ಗೊಲೆ

ಹಾಸನ ಹೊರವಲಯದಿ ಪೆಟ್ರೋಲ್‌ ಬಂಕ್‌ ಲೂಟಿ, ಐವರ ಕಗ್ಗೊಲೆ
60 ಸಾವಿರ ರುಪಾಯಿ ಲೂಟಿ, ಗಾಯಾಳುಗಳು ಜಿಲ್ಲಾ ಆಸ್ಪತ್ರೆಗೆ ದಾಖಲು

ನಗರದ ಹೊರವಲಯದ ರಾಜಘಟ್ಟದ ಬಳಿಯ ಪೆಟ್ರೋಲ್‌ ಬಂಕ್‌ಗೆ ನುಗ್ಗಿರುವ ಡಕಾಯಿತರ ಗುಂಪು, ಐವರನ್ನು ಕೊಂದು 60 ಸಾವಿರ ರುಪಾಯಿಗಳನ್ನು ಅಪಹರಿಸಿದೆ.

ಬೆಂಗಳೂರು-ಮಂಗಳೂರು ಹೆದ್ದಾರಿಯ ಬೈಪಾಸ್‌ ರಸ್ತೆಯಲ್ಲಿನ ಕೌಶಿಕ್‌ ಎಂಟರ್‌ಪ್ರೆೃಸಸ್‌ ಎನ್ನುವ ಪೆಟ್ರೋಲ್‌ಬಂಕ್‌ಗೆ ನುಗ್ಗಿರುವ ಡಕಾಯಿತರ ಗುಂಪು ಈ ದುಷ್ಕೃತ್ಯ ನಡೆಸಿದೆ. ಡಕಾಯಿತರ ಗುಂಪಿನಲ್ಲಿ ಐದು ಮಂದಿ ಇದ್ದರೆಂದು ಪ್ರಾಥಮಿಕ ತನಿಖೆಯ ನಂತರ ಪೊಲೀಸರು ತಿಳಿಸಿದ್ದಾರೆ. ಏ.10, ಶನಿವಾರ ರಾತ್ರಿ 2.30ರ ಸುಮಾರಿಗೆ ಈ ದುಷ್ಕೃತ್ಯ ಸಂಭವಿಸಿದೆ.

ಪೆಟ್ರೋಲ್‌ ಬಂಕ್‌ನ ಮುಂಭಾಗದಲ್ಲಿ ಮಲಗಿದ್ದ ನಂದಕುಮಾರ್‌ (45), ನಟರಾಜ್‌ ಶಾಸ್ತ (35) ಎಂಬುವರನ್ನು ಡಕಾಯಿತರು ಕೊಚ್ಚಿ ಕೊಂದಿದ್ದಾರೆ. ಅದೇ ಸಮಯಕ್ಕೆ ಪೆಟ್ರೋಲ್‌ಗಾಗಿ ಬಂದ ಎನ್‌.ಟಿ.ಕುಮಾರ್‌ (45) ಹಾಗೂ ಸತೀಶ್‌ಕುಮಾರ್‌ (40) ಎನ್ನುವವರೂ ಡಕಾಯಿತರಿಂದ ಇರಿತಕ್ಕೊಳಗಾಗಿದ್ದಾರೆ. ಆನಂತರದ ನತದೃಷ್ಟ - ಕಚೇರಿಯ ಒಳಗೆ ಮಲಗಿದ್ದ ಕಾವಲುಗಾರ ದಿನೇಶ್‌ (20).

ವ್ಯವಸ್ಥಾಪಕಕ ಪುಟ್ಟಣ್ಣ ಹಾಗೂ ಕೆಲಸಗಾರರಾದ ಮಂಜುನಾಥ, ಮಂಜುಶೆಟ್ಟಿ, ಕುಮಾರ್‌ ಎನ್ನುವವರ ಮೇಲೂ ಡಕಾಯಿತರು ಹಲ್ಲೆ ನಡೆಸಿದ್ದು , ಗಾಯಾಳುಗಳು ಹಾಸನದ ಸರ್ಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

(ಇನ್ಫೋ ವಾರ್ತೆ)

ಮುಖಪುಟ / ವಾರ್ತೆಗಳು