ಅಡಿಕೆಯ ಹೋದ ಮಾನ ಮರಳಿ ತಂದುಕೊಡಲು ಕೆಸಿಡಿಸಿ ಸಂಕಲ್ಪ

ಅಡಿಕೆಯ ಹೋದ ಮಾನ ಮರಳಿ ತಂದುಕೊಡಲು ಕೆಸಿಡಿಸಿ ಸಂಕಲ್ಪ
ಬಂಜೆ ಗಿಡಗಳ ಜಾಗದಲ್ಲಿ ಅಧಿಕ ಇಳುವರಿಯ ಗಿಡಗಳ ನಾಟಿ

ಅಡಿಕೆ ಬೆಳೆಯ ಕಳೆದುಹೋದ ಮಾನವನ್ನು ಮರಳಿ ತಂದುಕೊಡಲು ನಿಶ್ಚಯಿಸಿರುವ ಕರ್ನಾಟಕ ಅಡಿಕೆ ಅಭಿವೃದ್ಧಿ ಮಂಡಳಿ (ಕೆಸಿಡಿಸಿ) - ಹೆಚ್ಚು ಇಳುವರಿ ನೀಡುವ ಅಡಿಕೆ ತಳಿಯನ್ನು ಪರಿಚಯಿಸಲು ಉದ್ದೇಶಿಸಿದೆ.

ರಾಜ್ಯದ 1 ಸಾವಿರ ಹೆಕ್ಟೇರ್‌ ಪ್ರದೇಶದಲ್ಲಿ ಅಧಿಕ ಇಳುವರಿಯ ಸುಧಾರಿಸಿದ ಅಡಿಕೆ ಗಿಡಗಳನ್ನು 2004-05 ವಿತ್ತ ವರ್ಷದಲ್ಲಿ ನೆಡಲು ಕೆಸಿಡಿಸಿ ನಿರ್ಧರಿಸಿದೆ ಎಂದು ಮಂಡಳಿಯ ಅಧ್ಯಕ್ಷ ವಿ.ಕಲ್ಲಿಗೆ ತಾರಾನಾಥ್‌ ಶೆಟ್ಟಿ ಸುದ್ದಿಗಾರರಿಗೆ ತಿಳಿಸಿದ್ದಾರೆ.

ಬಂಜೆ ಗಿಡಗಳನ್ನು ಬದಲಿಸಿ, ಆ ಜಾಗದಲ್ಲಿ ಸುಧಾರಿಸಿದ ತಳಿಯ 2 ಲಕ್ಷ ಅಡಿಕೆ ಗಿಡಗಳನ್ನು ನೆಡಲು 1.8 ಕೋಟಿ ರುಪಾಯಿ ವೆಚ್ಚದಲ್ಲಿ ಕೆಸಿಡಿಸಿ ಯೋಜನೆ ರೂಪಿಸಿದೆ. ಈ ಯೋಜನೆ ಜೂನ್‌ ವೇಳೆಗೆ ಕೊನೆಗೊಳ್ಳುವುದು. ಮಂಡಳಿಯ ಬೆಳ್ಳಿಹಬ್ಬದ ಪ್ರಯುಕ್ತ - ಮುಂದಿನ 5 ವರ್ಷಗಳಲ್ಲಿ 5 ಸಾವಿರ ಹೆಕ್ಟೇರ್‌ ಪ್ರದೇಶದಲ್ಲಿ ಅಡಿಕೆ ಗಿಡ ನಾಟಿ ಮಾಡಲು ಉದ್ದೇಶಿಸಲಾಗಿದೆ. ಈ ಯೋಜನೆಗೆ 10.5 ಕೋಟಿ ರುಪಾಯಿ ತಗುಲಲಿದೆ ಎಂದು ತಾರಾನಾಥ್‌ ಹೇಳಿದರು.

ಪ್ರಸಕ್ತ ಹಣಕಾಸು ವರ್ಷದಲ್ಲಿ ಕೆಸಿಡಿಸಿ 2.77 ಕೋಟಿ ರುಪಾಯಿ ನಿವ್ವಳ ಲಾಭ ಗಳಿಸಿದೆ. ಕಳೆದ ವಿತ್ತ ವರ್ಷದಲ್ಲಿ ಈ ಪ್ರಮಾಣ 2.67 ಕೋಟಿ ರುಪಾಯಿಗಳಾಗಿತ್ತು ಎಂದು ಮಂಡಳಿಯ ಲೆಕ್ಕಪತ್ರದ ವಿವರ ನೀಡಿದ ತಾರಾನಾಥ್‌- ಕುಂದಾಪುರ ಬಳಿಯಿರುವ ಫೆನ್ನಿ ಕಾರ್ಖಾನೆಯನ್ನು ಮುಚ್ಚಲು ಕೆಸಿಡಿಸಿ ನಿರ್ಧರಿಸಿದೆ ಎಂದರು.

2002-03ನೇ ಸಾಲಿನಲ್ಲಿ ದೇಶ 1.27 ಲಕ್ಷ ಮೆಟ್ರಿಕ್‌ ಟನ್‌ ಅಡಿಕೆಯ (2006 ಕೋಟಿ ರು.ಮೌಲ್ಯದ) ವಿದೇಶಿ ವಿನಿಮಯ ಸಾಧಿಸಿದೆ ಎಂದು ತಾರಾನಾಥ್‌ ಶೆಟ್ಟಿ ತಿಳಿಸಿದರು.

(ಪಿಟಿಐ)

ಮುಖಪುಟ / ವಾರ್ತೆಗಳು