ರಾಜ್ಯೋತ್ಸವ ಕೊಡುಗೆ-ಕಡುಬಡವರಿಗೆ ಪಡಿತರ ದರದ ದಿನಸಿ

ರಾಜ್ಯೋತ್ಸವ ಕೊಡುಗೆ-ಕಡುಬಡವರಿಗೆ ಪಡಿತರ ದರದ ದಿನಸಿ
ಬಡತನ ರೇಖೆಗಿಂತ ಕೆಳಗಿರುವ 63 ಲಕ್ಷ ಕುಟುಂಬಗಳ ತುತ್ತಿನಚೀಲಕ್ಕೆ ಚಿಂತಿಲ್ಲ

ಬಡತನ ರೇಖೆಗಿಂತ ಕೆಳಗಿರುವ ರಾಜ್ಯದ 63 ಲಕ್ಷ ಕುಟುಂಬಗಳು ರಾಜ್ಯೋತ್ಸವದ ದಿನದಿಂದ ಹಳದಿ ಕಾರ್ಡುಗಳ ತೋರಿಸಿ ಪಡಿತರ ದರದಲ್ಲಿ ಆಹಾರ ಧಾನ್ಯ ಪಡೆಯಲಿದ್ದಾರೆ.

ಆಹಾರ ಮತ್ತು ನಾಗರಿಕ ಪೂರೈಕೆ ಸಚಿವ ರಾಮಲಿಂಗಾ ರೆಡ್ಡಿ ಶುಕ್ರವಾರ (ಅ. 31) ಸುದ್ದಿಗಾರರಿಗೆ ಈ ವಿಷಯ ತಿಳಿಸಿದರು. ಬಡತನ ರೇಖೆಗಿಂತ ಕೆಳಗಿರುವ ಕುಟುಂಬಗಳಿಗೆ ಈಗಾಗಲೇ ಹಸಿರು ಕಾರ್ಡುಗಳ ಬದಲಿಗೆ ಹಳದಿ ಕಾರ್ಡುಗಳನ್ನು ವಿತರಿಸಲಾಗಿದೆ. ಪ್ರತಿ ಕುಟುಂಬಕ್ಕೆ ಮಾಹೆಗೊಮ್ಮೆ 28 ಕಿಲೋ ಅಕ್ಕಿ, 7 ಕಿಲೋ ಗೋಧಿ ಮತ್ತು 10 ಲೀಟರ್‌ ಸೀಮೆಎಣ್ಣೆಯನ್ನು ಪಡಿತರ ದರದಲ್ಲಿ ಕೊಡಲಾಗುವುದು. ಇನ್ನೂ 11 ಲಕ್ಷ ಬಡ ಕುಟುಂಬಗಳ ಅರ್ಜಿಗಳು ವಿಲೇವಾರಿಯಾಗಿಲ್ಲ. ಈ ಪೈಕಿ ಬಡತನ ರೇಖೆಗಿಂತ ಕೆಳಗಿರುವ ಕುಟುಂಬಗಳ ಬಗ್ಗೆ ದೃಢೀಕೃತ ಮಾಹಿತಿ ಪಡೆದ ನಂತರ ತೀರ್ಮಾನ ತೆಗೆದುಕೊಳ್ಳಲಾಗುವುದು ಎಂದರು.

ನಗರದಲ್ಲಿ ವಾರ್ಷಿಕ 17 ಸಾವಿರ ರುಪಾಯಿ ಹಾಗೂ ಹಳ್ಳಿಗಳಲ್ಲಿ ವಾರ್ಷಿಕ 12 ಸಾವಿರ ರುಪಾಯಿ ಆದಾಯ ಇರುವ ಕುಟುಂಬಗಳು ಮಾತ್ರ ಈ ಸೌಲಭ್ಯ ಪಡೆಯಲು ಅರ್ಹವಾಗಿರುತ್ತವೆ. ಕೆಲವು ದಿನಗಳಿಂದ ನಿಲ್ಲಿಸಿರುವ ಪಡಿತರ ದರದಲ್ಲಿ ಧಾನ್ಯ ಹಂಚಿಕೆ ಈಗ ಪುನರಾರಂಭವಾಗುತ್ತಿದೆ. ಬಡ ಜನತೆಗೆ ಇದು ಸರ್ಕಾರದ ರಾಜ್ಯೋತ್ಸವದ ಕೊಡುಗೆ ಎಂದು ರಾಮಲಿಂಗಾ ರೆಡ್ಡಿ ಹೇಳಿದರು.

(ಪಿಟಿಐ)

ಮುಖಪುಟ / ವಾರ್ತೆಗಳು