ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
For Daily Alerts
Oneindia App Download

ನ್ಯೂಜಿಲೆಂಡ್‌ ಪಂದ್ಯದಲ್ಲಿ ನನ್ನ ಬೇರೆಯದೇ ಆಟ ನೋಡಿ- ಶೆವಾಗ್‌

By Staff
|
Google Oneindia Kannada News

ನ್ಯೂಜಿಲೆಂಡ್‌ ಪಂದ್ಯದಲ್ಲಿ ನನ್ನ ಬೇರೆಯದೇ ಆಟ ನೋಡಿ- ಶೆವಾಗ್‌
‘ನಾವ್‌ ಗೆದ್ದೇ ಗೆಲ್ತೀವಿ, ನ್ಯೂಜಿಲೆಂಡನ್ನು ಬಗ್ಗು ಬಡೀತೀವಿ’

ಬೆಂಗಳೂರು : ನಾವು ನ್ಯೂಜಿಲೆಂಡ್‌ ಕ್ರಿಕೆಟ್‌ ತಂಡವನ್ನು ಟೆಸ್ಟ್‌ ಸರಣಿಯಲ್ಲಿ 2- 0 ಅಂತರದಿಂದ ಸೋಲಿಸಿ, ಸೇಡು ತೀರಿಸಿಕೊಳ್ಳುತ್ತೇವೆ ಎಂದು ದೊಡ್ಡ ಹೊಡೆತಗಳ ಆಟಗಾರ ವೀರೇಂದ್ರ ಶೆವಾಗ್‌ ಹಲ್ಲು ಮಸೆದರು.

ಬೆಂಗಳೂರಿನಲ್ಲಿ ನಡೆಯುತ್ತಿರುವ ಕ್ರಿಕೆಟಿಗರ ದೈಹಿಕ ಬಲ ವರ್ಧನೆ ಶಿಬಿರದಲ್ಲಿ ಭಾಗವಹಿಸಿರುವ ಶೆವಾಗ್‌ ಮಂಗಳವಾರ (ಆ.19) ಸುದ್ದಿಗಾರರ ಜೊತೆ ಮಾತಾಡಿದರು. ನ್ಯೂಜಿಲೆಂಡಲ್ಲಿ ನಾವು ಹೇಗೆ ಸೋತಿದ್ದೆವೋ, ಇಲ್ಲಿ ಅವರನ್ನು ಹಾಗೇ ಸೋಲಿಸುತ್ತೇವೆ ಎಂಬುದು ಶೆವಾಗ್‌ ಆತ್ಮವಿಶ್ವಾಸ.

ತಂಡದ ಫಿಸಿಯೋ ಆ್ಯಂಡ್ರೂ ಲೀಪಸ್‌ ಅವರಿಂದ ಸಣ್ಣ ಗಾಯಕ್ಕೆ ಚಿಕಿತ್ಸೆ ಪಡೆಯುತ್ತಿರುವ ಶೆವಾಗ್‌ಗೆ ಟೆಸ್ಟ್‌ ಪಂದ್ಯಗಳಲ್ಲಿ ಮಧ್ಯಮ ಕ್ರಮಾಂಕದಲ್ಲಿ ಬ್ಯಾಟ್‌ ಮಾಡುವಾಸೆ. ಇತ್ತೀಚೆಗೆ ಇಂಗ್ಲೆಂಡಿನ ಕೌಂಟಿ ಕ್ರಿಕೆಟ್‌ ಪಂದ್ಯಗಳನ್ನು ಆಡಿ ಬಂದಿರುವ ಶೆವಾಗ್‌, ಅಲ್ಲಿ ಸಾಕಷ್ಟು ಅನುಭವ ಗಿಟ್ಟಿಸಿಕೊಂಡಿದ್ದಾರೆ. ಅಲ್ಲಿ ತಂಡ ಅಂತರರಾಷ್ಟ್ರೀಯ ಆಟಗಾರರನ್ನು ಬಹುವಾಗಿ ನೆಚ್ಚಿಕೊಳ್ಳುತ್ತದೆ. ವಿಕೆಟ್‌ ಹೋದರೂ ಚಿಂತಿಲ್ಲ ಎಂಬಂತೆ ಆಡುವ ಹಾಗಿರಲಿಲ್ಲ. ಆ ಕಾರಣಕ್ಕೇ ನೆಲಕಚ್ಚಿ ಆಡುವುದಕ್ಕೆ ಅಲ್ಲಿ ಹೆಚ್ಚು ಒತ್ತು ಕೊಟ್ಟೆ ಎನ್ನುವ ಶೆವಾಗ್‌ಗೆ ಇದೇ ತಂತ್ರವನ್ನು ನ್ಯೂಜಿಲೆಂಡ್‌ ವಿರುದ್ಧದ ಪಂದ್ಯಗಳಲ್ಲೂ ಅಳವಡಿಸಿಕೊಳ್ಳುವ ಬಯಕೆ.

ಆಟಗಾರ ಮಿತ್ರರಾದ ಯುವರಾಜ್‌ ಸಿಂಗ್‌ ಮತ್ತು ಮೊಹಮ್ಮದ್‌ ಕೈಫ್‌ ಕೌಂಟಿ ಕ್ರಿಕೆಟ್‌ನಲ್ಲಿ ಅಷ್ಟೇನೂ ಚೆನ್ನಾಗಿ ಆಡಲಿಲ್ಲ, ಯಾಕೆ ಎಂಬ ಪ್ರಶ್ನೆಗೆ ಶೆವಾಗ್‌ ಉತ್ತರಿಸಿದ್ದು ಹೀಗೆ- ಅವರಾಡಿದ ಪಿಚ್‌ಗಳು ಕೆಟ್ಟದಾಗಿದ್ದವು. ಚೆಂಡು ಸರಿಯಾಗಿ ಪುಟಿಯುತ್ತಿರಲಿಲ್ಲ. ಯುವರಾಜ್‌ ಹಾಗೂ ಕೈಫ್‌ ಇಬ್ಬರೂ ಆಟಗಾರರು ಸಮರ್ಥರು. ಇಲ್ಲಿ ಚೆನ್ನಾಗಿ ಆಡುತ್ತಾರೆ ಎಂಬ ವಿಶ್ವಾಸವಿದೆ.

ಗಾಯದಿಂದ ಬೇಗ ಚೇತರಿಸಿಕೊಳ್ಳುತ್ತಿರುವುದಾಗಿ ಹೇಳಿದ ಶೆವಾಗ್‌ ಈ ಸಲ ನನ್ನ ಬೇರೆಯದೇ ಆಟ ತೋರಿಸುತ್ತೇನೆ ಅಂದರು. ಬೆಂಗಳೂರಿನ ಯೋಗ ಹಾಗೂ ವ್ಯಾಯಾಮ ಶಿಬಿರ ಅವರಿಗೆ ಖುಷಿ ಕೊಟ್ಟಿದೆ.

(ಪಿಟಿಐ)

ಮುಖಪುಟ / ವಾರ್ತೆಗಳು

ತಾಜಾ ಸುದ್ದಿ ತಕ್ಷಣ ಪಡೆಯಿರಿ
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X