ಸರ್ಕಾರ ಇಳಿಸಲು ಬಿಜೆಪಿ ಬೆಂಗಳೂರು ಚಲೋ

ಬೆಂಗಳೂರು : ನಾಗಪ್ಪನವರ ಸುರಕ್ಷಿತ ಬಿಡುಗಡೆ ಸೇರಿದಂತೆ ಕಾಂಗ್ರೆಸ್‌ ಸರ್ಕಾರದ ಆಡಳಿತಾತ್ಮಕ ಸೋಲುಗಳನ್ನು ಬೀದಿಗೆ ತರಲು ಬಿಜೆಪಿ ಮುಖಂಡ ಬಿ.ಎಸ್‌.ಯಡಿಯೂರಪ್ಪ ನಿರ್ಧರಿಸಿದ್ದಾರೆ. ಇದಕ್ಕಾಗಿ ಡಿಸೆಂಬರ್‌ 26ನೇ ತಾರೀಕು ಬೃಹತ್‌ ಬೆಂಗಳೂರು ಚಲೋ ಆಯೋಜಿಸಲಾಗಿದೆ.

ಗುರುವಾರ ಸುದ್ದಿಗಾರರಿಗೆ ಯಡಿಯೂರಪ್ಪ ಈ ವಿಷಯ ತಿಳಿಸಿದರು. ಸಂಯುಕ್ತ ಜನತಾದಳದ ಮುಖಂಡ ಎಚ್‌.ನಾಗಪ್ಪನವರನ್ನು ವೀರಪ್ಪನ್‌ ಅಪಹರಿಸಿದಾಗ ಅವರನ್ನು ಸುರಕ್ಷಿತವಾಗಿ ಬಿಡಿಸಿ ತರಲಿಲ್ಲ. ಗುತ್ತಿಗೆದಾರರಿಗೆ ಕೊಡಬೇಕಾಗಿರುವ 1110 ಕೋಟಿ ರುಪಾಯಿಯಷ್ಟು ಬಿಲ್ಲುಗಳು ಹಾಗೇ ಇವೆ. ಅಭಿವೃದ್ಧಿ ಕಾರ್ಯಗಳಿಗಂತೂ ಅಧೋಗತಿ ಬಂದಿದೆ ಎಂದು ಯಡಿಯೂರಪ್ಪ ಆರೋಪಿಸಿದರು.

ಸಾರ್ವಜನಿಕ ಕಾಮಗಾರಿ ಇಲಾಖೆ (ಪಿಡಬ್ಲ್ಯುಡಿ) 360 ಕೋಟಿ ರು., ಸಣ್ಣ ನೀರಾವರಿ ಇಲಾಖೆ 200 ಕೋಟಿ ರು. ಹಾಗೂ ಮಧ್ಯಮ ಮತ್ತು ದೊಡ್ಡ ನೀರಾವರಿ ಇಲಾಖೆ 450 ಕೋಟಿ ರುಪಾಯಿ ಬಿಲ್ಲುಗಳನ್ನು ಗುತ್ತಿಗೆದಾರರಿಗೆ ಬಾಕಿ ಉಳಿಸಿಕೊಂಡಿವೆ. ಇವೆಲ್ಲಾ ಸರ್ಕಾರದ ವೈಫಲ್ಯಗಳನ್ನು ಹಿಡಿದೆತ್ತಿ ತೋರಲು 1 ಲಕ್ಷ ಮಂದಿ ಡಿಸೆಂಬರ್‌ 26ರಂದು ಬೆಂಗಳೂರು ಚಲೋ ನಡೆಸಲಿದ್ದೇವೆ ಎಂದರು.

ಕೊಳ್ಳೇಗಾಲದ ಸಂಯುಕ್ತ ಜನತಾ ದಳ ನಾಯಕ ಪೊನ್ನಾಚಿ ಮಹದೇವ ಸ್ವಾಮಿ ಮತ್ತು ವೀರಪ್ಪನ್‌ ನಡುವೆ ಅದೇನು ಮಾತುಕತೆ, ಹುನ್ನಾರ ನಡೆದಿದೆ ಎಂಬುದನ್ನು ಸರ್ಕಾರ ಬಯಲು ಮಾಡಬೇಕೆಂದು ಯಡಿಯೂರಪ್ಪ ಒತ್ತಾಯಿಸಿದರು.

(ಪಿಟಿಐ)

ಮುಖಪುಟ / ಇವತ್ತು... ಈ ಹೊತ್ತು...