ಅಮೆರಿಕಾದಿಂದ 5 ಸಾವಿರ ಪೌಂಡ್‌ ತೂಕದ ಬಂಕರ್‌ ಬಸ್ಟಿಂಗ್‌ಗಳ ಬಳಕೆ

ವಾಷಿಂಗ್ಟನ್‌: ಬಾಂಬ್‌ ದಾಳಿಯಿಂದ ಸುರಕ್ಷಿತವಾಗಿರಲು ರೂಪಿಸುವ ಕಂದಕಗಳನ್ನು ಉಡಾಯಿಸಬಲ್ಲ ಸಾಮರ್ಥ್ಯದ ಬಂಕರ್‌ ಬಸ್ಟಿಂಗ್‌ ಬಾಂಬ್‌ಗಳನ್ನು ಆಫ್ಘಾನಿಸ್ತಾನದ ಆಯ್ದ ಗುರಿಗಳ ಮೇಲೆ ಪ್ರಯೋಗಿಸಲು ಅಮೆರಿಕ ಯುದ್ಧ ವಿಮಾನಗಳು ಸಿದ್ಧವಾಗಿವೆ.

5 ಸಾವಿರ ಪೌಂಡ್‌ ತೂಕದ ಈ ಬಾಂಬ್‌ಗಳನ್ನು ಆಫ್ಘಾನಿಸ್ತಾನದ ಆಯಕಟ್ಟಿನ ಪ್ರದೇಶಗಳ ಮೇಲೆ ಪ್ರಯೋಗಿಸಲು ಅಮೆರಿಕ ಸೇನಾನಿಗಳು ನಿರ್ಧರಿಸಿದ್ದಾರೆ. ಈಗಾಗಲೇ ಒಂದು ಬಾಂಬನ್ನು ಎಸೆದಿರುವುದಾಗಿಯೂ ಹಿರಿಯ ಅಧಿಕಾರಿಯಾಬ್ಬರು ತಿಳಿಸಿದ್ದಾರೆ. ಆಪ್ಘಾನಿಸ್ತಾನದ ನೈಸರ್ಗಿಕ ಗಿರಿ ಕಂದರಗಳಲ್ಲಿ ಅಡಗಿಕೊಂಡಿದ್ದಾನೆಂದು ನಂಬಲಾಗಿರುವ ಅಂತರರಾಷ್ಟ್ರೀಯ ಪಾತಕಿ ಒಸಾಮ ಬಿನ್‌ ಲ್ಯಾಡೆನ್‌ ಹಾಗೂ ಅವನ ಅನುಚರರನ್ನು ನಾಶಪಡಿಸಲು ಅಮೆರಿಕ ಈ ಬಾಂಬ್‌ಗಳ ಮೊರೆ ಹೋಗಿದೆ.

ಬಂಕರ್‌ ಬಸ್ಟಿಂಗ್‌ ಬಾಂಬ್‌ಗಳು ಮಾತ್ರವಲ್ಲದೆ ನಮ್ಮ ಬಳಿ ಸಾಕಷ್ಟು ಯುದ್ಧತಂತ್ರಗಳಿವೆ. ಜಿಬಿಯು-28 ನಂಥಾ ಭಾರೀ ಬಾಂಬ್‌ಗಳನ್ನೂ ದಾಳಿಯಲ್ಲಿ ಬಳಸಲಾಗುವುದು ಎಂದು ಅಮೆರಿಕಾದ ಹಿರಿಯ ಅಧಿಕಾರಿಯಾಬ್ಬರು ತಿಳಿಸಿದ್ದಾರೆ.

(ಪಿಟಿಐ)