ನೀರು ಬಿಡಲು ಕರ್ನಾಟಕ ತಿರಸ್ಕಾರ;ಕಾವೇರಿ ಪ್ರಾಧಿಕಾರ ಸಭೆ ವಿಫಲ

ನವದೆಹಲಿ : ಕಾವೇರಿ ನದಿಯಿಂದ ಕರ್ನಾಟಕ ತಕ್ಷಣವೇ ನೀರು ಬಿಡುಗಡೆ ಮಾಡಬೇಕೆಂಬ ತಮಿಳುನಾಡಿನ ಒತ್ತಾಯವನ್ನು ಕರ್ನಾಟಕ ತಿರಸ್ಕರಿಸಿದ್ದರಿಂದ ಬುಧವಾರ ದೆಹಲಿಯಲ್ಲಿ ಜರುಗಿದ ಕಾವೇರಿ ನದಿ ಪ್ರಾಧಿಕಾರದ ಸಭೆ ವಿಫಲವಾಯಿತು.

ಪ್ರಧಾನಿ ಹಾಗೂ ಕಾವೇರಿ ನದಿ ಪ್ರಾಧಿಕಾರದ ಅಧ್ಯಕ್ಷ ವಾಜಪೇಯಿ ಅವರ ಹಾಜರಿಯಲ್ಲಿ ನಡೆದ ಸಭೆ ಬಿಕ್ಕಟ್ಟನ್ನು ಬಗೆಹರಿಸುವಲ್ಲಿ ವಿಫಲವಾಯಿತು. ಯಾವುದೇ ಫಲಶ್ರುತಿಯಿಲ್ಲದೆ ಸಭೆ ಮುಕ್ತಾಯವಾದ ಬಗ್ಗೆ ತಮಿಳುನಾಡಿನ ಮುಖ್ಯಮಂತ್ರಿ ಓ.ಪನ್ನೀರ್‌ಸೆಲ್ವಂ ತೀವ್ರ ನಿರಾಶೆ ವ್ಯಕ್ತಪಡಿಸಿದರು.

ರಾಜ್ಯದಲ್ಲಿನ ಬೆಳೆಗಳ ರಕ್ಷಣೆಗಾಗಿ ಕಾವೇರಿ ನೀರು ಬಿಡುಗಡೆ ಮಾಡಲು ಕರ್ನಾಟಕದ ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ ಒಪ್ಪಲಿಲ್ಲ . ಈ ನಿಟ್ಟಿನಲ್ಲಿ ಪ್ರಧಾನಿ ವಾಜಪೇಯಿ ಅವರು ಕೂಡ ಕರ್ನಾಟಕಕ್ಕೆ ಯಾವುದೇ ನಿರ್ದಿಷ್ಟ ನಿರ್ದೇಶನಗಳನ್ನು ನೀಡಲಿಲ್ಲ . ಯಾವುದೇ ಅಧಿಕಾರ ಇಲ್ಲದ ಪ್ರಾಧಿಕಾರದ ಬಗೆಗೆ ತಮಿಳುನಾಡಿಗೆ ನಿರಾಶೆಯಾಗಿದೆ ಎಂದು ಪನ್ನೀರ್‌ಸೆಲ್ವಂ ಹೇಳಿದರು.

ಬೆಳೆಗಳನ್ನು ರಕ್ಷಿಸಲು ಪ್ರತಿದಿನ ಕನಿಷ್ಠ ಒಂದು ಟಿಎಂಸಿ ನೀರು ಬಿಡುಗಡೆ ಮಾಡುವಂತೆ ತಮಿಳುನಾಡು ಸರ್ಕಾರ ಮಾಡಿದ ಮನವಿಯ ಮೇರೆಗೆ ಬುಧವಾರದ ಸಭೆ ಏರ್ಪಾಡಾಗಿತ್ತು . ಆದರೆ, ಕಾವೇರಿ ಜಲಾನಯನ ಪ್ರದೇಶಗಳಲ್ಲಿ ಸ್ವಲ್ಪ ಮಳೆಯಾಗಿರುವುದರಿಂದ ಸದ್ಯಕ್ಕೆ ಆತಂಕ ಪಡುವ ಪ್ರಮೇಯವೇನೂ ಇಲ್ಲವೆಂದು ಕರ್ನಾಟಕ ಪ್ರತಿಪಾದಿಸಿದ್ದನ್ನು ಇಲ್ಲಿ ಸ್ಮರಿಸಬಹುದು.

(ಪಿಟಿಐ)