ಬೆಂಗಳೂರಿನ ವಿಜ್ಞಾನಿ ಪ್ರೊ.ಎಸ್‌.ವಿ.ಭಟ್‌ಗೆ ಪ್ರತಿಷ್ಠಿತ ತಾತಾಚಾರಿ ಪ್ರಶಸ್ತಿ

ಮೈಸೂರು : 2001 ನೇ ಇಸವಿಯ ಪ್ರೊ.ವೈ.ಟಿ.ತಾತಾಚಾರಿ ವಿಜ್ಞಾನ ಪ್ರಶಸ್ತಿಗೆ ಬೆಂಗಳೂರಿನ ಇಂಡಿಯನ್‌ ಇನ್‌ಸ್ಟಿಟ್ಯೂಟ್‌ ಆಫ್‌ ಸೈನ್ಸ್‌ನ ಪ್ರೊ.ಎಸ್‌.ವಿ.ಭಟ್‌ ಹಾಗೂ ದೆಹಲಿ ಐಐಟಿಯ ಪ್ರೊ.ರಾಜಪಾಲ್‌ಸಿಂಗ್‌ ಸಿರೋಹಿ ಆಯ್ಕೆಯಾಗಿದ್ದಾರೆ.

ಪ್ರಸಿದ್ಧ ವಿಜ್ಞಾನಿ ಪ್ರೊ.ತಾತಾಚಾರಿ ಅವರ ನೆನಪಿನಲ್ಲಿ ಭ್ರಮರ ಟ್ರಸ್ಟ್‌ ಮತ್ತು ಅವರ ಪತ್ನಿ ಮಾಧುರಿ ತಾತಾಚಾರಿ ಅವರು ಈ ಪ್ರಶಸ್ತಿ ಸ್ಥಾಪಿಸಿದ್ದಾರೆ. ಸೆಪ್ಟಂಬರ್‌ 6 ರಂದು ಮೈಸೂರಿನಲ್ಲಿ ನಡೆಯುವ ಸಮಾರಂಭದಲ್ಲಿ ರಾಜ್ಯಪಾಲೆ ರಮಾದೇವಿ ಪ್ರಶಸ್ತಿ ಪ್ರದಾನ ಮಾಡುವರು.

ಮೂರು ದಶಕಗಳ ಕಾಲ ನ್ಯೂಕ್ಲಿಯರ್‌ ಮ್ಯಾಗ್ನಟಿಕ್‌ ಕ್ಷೇತ್ರದಲ್ಲಿ ಭಟ್‌ ಅವರು ನಡೆಸಿರುವ ಸಂಶೋಧನೆಗಳನ್ನು ಹಾಗೂ ಅಪ್ಲೈಡ್‌ ಆಪ್ಟಿಕ್‌ ಕ್ಷೇತ್ರದಲ್ಲಿ ಸಿರೋಹಿ ನಡೆಸಿರುವ ಸಂಶೋಧನೆಗಳನ್ನು ಪ್ರಶಸ್ತಿ ನೀಡುವಲ್ಲಿ ಪರಿಗಣಿಸಲಾಗಿದೆ. ನೆನಪಿನ ಫಲಕ ಮತ್ತು ತಲಾ 1 ಲಕ್ಷ ರುಪಾಯಿ ನಗದನ್ನು ಪ್ರಶಸ್ತಿ ಒಳಗೊಂಡಿದೆ.

(ಇನ್ಫೋ ವಾರ್ತೆ)