ಪೀಣ್ಯದಲ್ಲಿ ವದಂತಿಯಿಂದಾದ ಅನಾಹುತ : 50 ವಾಹನಗಳು ಭಸ್ಮ

ಬೆಂಗಳೂರು : ಕೇಂದ್ರ ಸರಕಾರ ಭವಿಷ್ಯನಿಧಿ ಕಾಯಿದೆಗೆ ತಿದ್ದುಪಡಿ ತಂದಿದೆ. 45 ವರ್ಷ ತುಂಬುವ ಮೊದಲು ಕಾರ್ಮಿಕರು ಭವಿಷ್ಯನಿಧಿಯ ಹಣವನ್ನು ವಾಪಸ್‌ ಪಡೆಯುವಂತಿಲ್ಲ ಎಂಬ ವದಂತಿ ಮಂಗಳವಾರ ಪೀಣ್ಯ ಕೈಗಾರಿಕಾ ಪ್ರದೇಶದಲ್ಲಿ ಭಾರಿ ಅನಾಹುತವನ್ನೇ ಉಂಟುಮಾಡಿತು.

ಈ ವದಂತಿಯಿಂದ ರೊಚ್ಚಿಗೆದ್ದ ಇಲ್ಲಿನ ಸಿದ್ಧ ಉಡುಪು ತಯಾರಿಕಾ ಕಾರ್ಖಾನೆಯ ಕಾರ್ಮಿಕರು ಪ್ರತಿಭಟನೆ ಕೈಗೊಂಡು, ಕಲ್ಲುತೂರಾಟ ನಡೆಸಿ, ಬಸ್‌, ಲಾರಿ, ಪೊಲೀಸ್‌ ವ್ಯಾನ್‌ ಸೇರಿದಂತೆ 50ಕ್ಕೂ ಹೆಚ್ಚು ವಾಹನಗಳಿಗೆ ಬೆಂಕಿ ಹಚ್ಚಿದರು. ಪ್ರತಿಭಟನೆ ಹಿಂಸಾರೂಪಕ್ಕೆ ತಿರುಗಿದಾಗ ಪೊಲೀಸರು ಲಾಠಿ ಪ್ರಹಾರ ನಡೆಸಿ, ಆಶ್ರುವಾಯು ಸೆಲ್‌ ಸಿಡಿಸಿದರು.

ಉದ್ರಿಕ್ತ ಗುಂಪಿನ ಕಲ್ಲುತೂರಾಟದಲ್ಲಿ ನಾಲ್ವರು ಪೊಲೀಸರೂ ಸೇರಿದಂತೆ ಹತ್ತಾರು ಮಂದಿ ಗಾಯಗೊಂಡಿದ್ದಾರೆ. ಈ ಘಟನೆಯಿಂದಾಗಿ, ಪೀಣ್ಯ ಕೈಗಾರಿಕಾ ಪ್ರದೇಶ, ಜಾಲಹಳ್ಳಿ, ದಾಸರಹಳ್ಳಿ, ಯಶವಂತಪುರ ಪ್ರದೇಶದಲ್ಲಿ ಉದ್ವಿಗ್ನ ಪರಿಸ್ಥಿತಿ ಉಂಟಾಗಿತ್ತು. ಈ ಭಾಗಗಳಲ್ಲಿ 144ನೇ ವಿಧಿಯನ್ವಯ ಮೂರು ದಿನಗಳ ಕಾಲ ನಿಷೇಧಾಜ್ಞೆ ಜಾರಿಗೊಳಿಸಲಾಗಿದೆ.

ಸಾವಿರಾರು ಸಂಖ್ಯೆಯಲ್ಲಿದ್ದ ಪ್ರತಿಭಟನಾ ನಿರತ ಕಾರ್ಮಿಕರು, ಪೀಣ್ಯ ಎರಡನೇ ಹಂತದಲ್ಲಿರುವ ಭವಿಷ್ಯ ನಿಧಿ ಕಚೇರಿಗೂ ನುಗ್ಗಿ ದಾಂಧಲೆ ಮಾಡಿದರು. ಕೆಲವು ಅಂಗಡಿಗಳಿಗೂ ಅಗ್ನಿಸ್ಪರ್ಶ ಮಾಡಿದರು. ಇದರಿಂದಾಗಿ ಮಂಗಳವಾರ 5-6 ಗಂಟೆಗಳ ಕಾಲ ತುಮಕೂರು ಬೆಂಗಳೂರು ಹೆದ್ದಾರಿಯಲ್ಲಿ ಕೆಲ ಕಾಲ ಸಂಚಾರ ಅಸ್ತವ್ಯಸ್ತವಾಗಿತ್ತು.

ಹೊಸ ವಾಹನಗಳು ಭಸ್ಮ : ಹೊಸ ಟಾಟಾ ಸುಮೋ ವಾಹನಗಳನ್ನು ಸಾಗಿಸುತ್ತಿದ್ದ ಲಾರಿಗಳು ಪ್ರತಿಭಟನಾಕಾರರ ಆಕ್ರೋಶಕ್ಕೆ ತುತ್ತಾದವು. ಲಾರಿಗಳಲ್ಲಿದ್ದ ಸುಮಾರು 30ಕ್ಕೂ ಹೆಚ್ಚು ಹೊಸ ಟಾಟಾ ಸುಮೋ ವಾಹನಗಳು ಸುಟ್ಟು ಕರಕಲಾದವು.

ಪೊಲೀಸರ ಪ್ರಾಥಮಿಕ ವರದಿಗಳ ರೀತ್ಯ 8 ಬಸ್‌ಗಳು, ಒಂದು ಪೊಲೀಸ್‌ ಜೀಪ್‌, 30 ಟಾಟಾ ಸುಮೋ ಹೊಸ ವಾಹನಗಳು, ಖಾಸಗಿ ಬಸ್‌, ನಾಲ್ಕು ವ್ಯಾನ್‌ ಬೆಂಕಿಗಾಹುತಿಯಾಗಿವೆ. ನೂರಾರು ಬಸ್‌ಗಳ ಕಿಟಕಿಗಾಜುಗಳು ಪುಡಿಪುಡಿಯಾಗಿವೆ. ಈ ಸಂಬಂಧ 100 ಮಂದಿಯನ್ನು ಬಂಧಿಸಲಾಗಿದೆ. ಸ್ಥಳಕ್ಕೆ ಹಿರಿಯ ಪೊಲೀಸ್‌ ಅಧಿಕಾರಿಗಳು ಭೇಟಿ ನೀಡಿ ಪರಿಸ್ಥಿತಿಯನ್ನು ಅವಲೋಕಿಸಿದ್ದಾರೆ.

ಸ್ಪಷ್ಟೀಕರಣ : ಕಾರ್ಮಿಕರಿಗೆ 45 ವರ್ಷ ತುಂಬುವವರೆಗೆ ಭವಿಷ್ಯನಿಧಿ ಹಣ ನೀಡುವುದಿಲ್ಲ ಎಂಬ ಯಾವುದೇ ತಿದ್ದುಪಡಿಯನ್ನು ಮಾಡಲಾಗಿಲ್ಲ. ಇಂತಹ ವದಂತಿಗಳಿಗೆ ಕಿವಿಗೊಡಬೇಡಿ ಎಂದು ಬೆಂಗಳೂರಿನ ಭವಿಷ್ಯನಿಧಿಯ ಪ್ರಾದೇಶಿಕ ಆಯುಕ್ತ ಎನ್‌.ಎ. ನಾಯರ್‌ ಮನವಿ ಮಾಡಿದ್ದಾರೆ.

ಯಾವುದೇ ವ್ಯಕ್ತಿ ಕೆಲಸದಿಂದ ನಿವೃತ್ತಿ ಹೊಂದಿದ 30 ದಿನದೊಳಗೆ ಭವಿಷ್ಯ ನಿಧಿ ಹಣ ಪಡೆಯಬಹುದು ಎಂದೂ ಅವರು ಸ್ಪಷ್ಟೀಕರಣ ನೀಡಿದ್ದಾರೆ. ಭವಿಷ್ಯ ನಿಧಿಯ ಹಣ ಹಿಂದಕ್ಕೆ ಪಡೆಯುವ ನಿಯಮಾವಳಿಯಲ್ಲಿ ಯಾವುದೇ ಬದಲಾವಣೆ ಮಾಡಲಾಗಿಲ್ಲ ಎಂದು ರಾಜ್ಯ ಕಾರ್ಮಿಕ ಸಚಿವ ಹಿಂಡಸಗೇರಿ ಸಹ ಸ್ಪಷ್ಟನೆ ನೀಡಿದ್ದಾರೆ.