ನಾಳೆ ಮಂಗಳೂರು ವಿ.ವಿ. ಪದವಿ ಪರೀಕ್ಷಾ ಫಲಿತಾಂಶ
ಮಂಗಳೂರು : ಮಂಗಳೂರು ವಿಶ್ವವಿದ್ಯಾಲಯವು ಕಳೆದ ಏಪ್ರಿಲ್ - ಮೇ ತಿಂಗಳಿನಲ್ಲಿ ನಡೆಸಿದ್ದ ಪದವಿ ಪರೀಕ್ಷೆಗಳ ಫಲಿತಾಂಶ ಜೂನ್ 19ರ ಮಂಗಳವಾರ ಪ್ರಕಟವಾಗಲಿದೆ. ಈ ಸಾಲಿನಲ್ಲಿ ಪರೀಕ್ಷೆಗೆ ಹಾಜರಾಗಿದ್ದ 7279 ವಿದ್ಯಾರ್ಥಿಗಳ ಪೈಕಿ 4757 ವಿದ್ಯಾರ್ಥಿಗಳು ಉತ್ತೀರ್ಣರಾಗುವುದರೊಂದಿಗೆ ಶೇ. 65.35ರಷ್ಟು ಫಲಿತಾಂಶ ದಾಖಲಾಗಿದೆ.
ಮಂಗಳೂರಿನ ಸಂತ ಅಲೋಷಿಯಸ್ ಸಂಜೆ ಕಾಲೇಜು ಈ ಬಾರಿ ರ್ಯಾಂಕ್ಗಳಿಸುವ ಮೂಲಕ ದಾಖಲೆ ಸಾಧಿಸಿದೆ. ಉಜಿರೆಯ ಎಸ್.ಡಿ.ಎಂ. ಕಾಲೇಜು 7 ರ್ಯಾಂಕ್ ಹಾಗೂ ಉಡುಪಿಯ ಎಂಜಿಎಂ ಕಾಲೇಜು ಆರು ರ್ಯಾಂಕ್ಗಳನ್ನು ಪಡೆದಿವೆ.
ಪರೀಕ್ಷೆಗೆ ಕುಳಿತ 2831 ಬಾಲಕರ ಪೈಕಿ 1572 ಮಂದಿ ಉತ್ತೀರ್ಣರಾಗಿದ್ದರೆ, 4448 ವಿದ್ಯಾರ್ಥಿನಿಯರ ಪೈಕಿ 3185 ಬಾಲಕಿಯರು ತೇರ್ಗಡೆಯಾಗಿದ್ದಾರೆ. ಈ ವಿಷಯವನ್ನು ಮಂಗಳೂರು ವಿ.ವಿ. ಪರೀಕ್ಷಾಂಗ ವಿಭಾಗದ ಕುಲಸಚಿವರು ತಿಳಿಸಿದ್ದಾರೆ.
ಕಲಾ ವಿಭಾಗದಲ್ಲಿ ಕಟೀಲು ಕಾಲೇಜಿನ ರಜನಿ ಕೆ., ವಿಜ್ಞಾನ ವಿಭಾಗದಲ್ಲಿ ಉಡುಪಿಯ ಎಂಜಿಎಂ ಕಾಲೇಜಿನಿ ಸವಿತಾ, ವಾಣಿಜ್ಯ ವಿಭಾಗದಲ್ಲಿ ಶಿರ್ವ ಕಾಲೇಜಿನ ಕೆರೋಲಿನ್ ಅಂಜುಲಿನ್ ಪ್ರಥಮ ರ್ಯಾಂಕ್ ಪಡೆದಿದ್ದಾರೆ. ಬಿ.ಎಸ್. ಡಬ್ಲ್ಯೂ. ವಿಭಾಗದ ಪ್ರಥಮ ರ್ಯಾಂಕ್ ರೋಶಿನಿ ನಿಲಯದ ತೃಶಿಯಮ್ಮ ಅವರ ಪಾಲಾಗಿದೆ.
(ಮಂಗಳೂರು ಪ್ರತಿನಿಧಿಯಿಂದ)