ಬಳ್ಳಾರಿ ಜಿಲ್ಲೆಯ 289 ಗ್ರಾಮಗಳಲ್ಲಿ ಕುಡಿವ ನೀರನ ಸಮಸ್ಯೆ

ಬಳ್ಳಾರಿ : ಕರ್ನಾಟಕದಲ್ಲಿ ಬಳ್ಳಾರಿ ಬಿಸಿಲೇ ಬಿಸಿಲು. ಬೀಚಿ ಅವರ ಸಾಹಿತ್ಯ ಪರಿಚಯ ಇರುವವರಿಗೆ ಬಳ್ಳಾರಿಯ ಬಿಸಿಲಿನ ಪರಿಚಯವೂ ಆಗಿರುತ್ತದೆ. ಬೇಸಿಗೆ ಬಂತೆಂದರೆ ಬಳ್ಳಾರಿ ಜಿಲ್ಲೆಯಲ್ಲಿ ಬಿಸಿಲು ಏರುತ್ತದೆ, ನೀರಿನ ಒರತೆ ಕುಗ್ಗುತ್ತಲೇ ಇರುತ್ತದೆ. ಕುಡಿಯುವ ನೀರಿಗೂ ಬರ ಬರುತ್ತದೆ.

ಈಗಾಗಲೇ ಮುಂದಿನ ದಿನಗಳಲ್ಲಿ ಬಳ್ಳಾರಿಯ ಯಾವ ಪ್ರದೇಶಗಳು ಹೆಚ್ಚು ಕುಡಿವ ನೀರಿನ ಸಮಸ್ಯೆಯಿಂದ ತತ್ತರಿಸುತ್ತವೆ ಎಂಬುದನ್ನು ಪಟ್ಟಿ ಮಾಡಲಾಗಿದೆ. ಜಿಲ್ಲೆಯ 289 ಗ್ರಾಮಗಳು ಈ ಪಟ್ಟಿಯಲ್ಲಿ ಸೇರಿವೆ. ತೀವ್ರ ಕುಡಿವ ನೀರಿನ ಸಮಸ್ಯೆ ಎದುರಿಸುವ ಈ ಗ್ರಾಮಗಳಿಗೆ ಕುಡಿಯುವ ನೀರು ಸರಬರಾಜು ಮಾಡಲು 220.64 ಲಕ್ಷ ರುಪಾಯಿ ಅಂದಾಜಿನ ಕ್ರಿಯಾ ಯೋಜನೆ ತಯಾರಿಸಿ ಮಂಜೂರಾತಿಗಾಗಿ ಸಲ್ಲಿಸಲಾಗಿದೆ.

ಈ ಯೋಜನಾ ಧನದಿಂದ ಕುಡಿವ ನೀರಿನ ಯೋಜನೆಗಳ ಪುನಶ್ಚೇತನಕ್ಕೆ ಹಾಗೂ ಈಗಾಗಲೇ ಕೈಗೆತ್ತಿಕೊಂಡಿರುವ ಯೋಜನಗೆಳನ್ನು ಪೂರ್ಣಗೊಳಿಸಲು ಬಳಸಲು ಉದ್ದೇಶಿಸಲಾಗಿದೆ. ಈಗಾಗಲೇ ಜಿಲ್ಲಾಡಳಿತ ಬಳ್ಳಾರಿಯ 89, ಸಂಡೂರಿನ 14, ಸಿರುಗುಪ್ಪದ 92, ಹೊಸಪೇಟೆಯ 32, ಹಡಗಲಿಯ 9, ಹಗರಿಬೊಮ್ಮನಹಳ್ಳಿಯ 7, ಕೂಡ್ಲಿಗಿಯ 40 ಹಳ್ಳಿಗಳು ನೀರಿನ ಸಮಸ್ಯೆ ಎದುರಿಸುತ್ತಿವೆ ಎಂದು ಪಟ್ಟಿ ಮಾಡಿದೆ.

(ಬಳ್ಳಾರಿ ಪ್ರತಿನಿಧಿಯಿಂದ)