ಮುಂದುವರಿದ ಒಣಹವೆ, ಬೆವರ ಬಿಸಿಲು

ಹಗಲು ಮೋಡ ಕವಿದ ಆಕಾಶದೊಂದಿಗೇ ಬೆಂಗಳೂರಿನಲ್ಲಿ ವಾರದ ಮೊದಲ ದಿನ ಆರಂಭವಾಯಿತು. ಕಳೆದೊಂದು ತಿಂಗಳಿಂದಲೂ ದಿನೆ ದಿನೆ ಏರುತ್ತಿರುವ ಬಿಸಿಲಿನಿಂದಾಗಿ ಕಂಗೆಟ್ಟವರಿಗೆ ಸೋಮವಾರದ ಮೋಡ ಕವಿದಿದ್ದ ವಾತಾವರಣ ಖುಷಿ ತಂದಿತು. ಆದರೆ, ಹನಿ ಮಾತ್ರವೂ ನೆಲ ಸೇರಲಿಲ್ಲ . ಅಂದಹಾಗೆ ಇದು ಮಳೆಗಾಲವಲ್ಲ .

ರಾಜ್ಯಾದ್ಯಂತ ಸೋಮವಾರವೂ ಒಣಹವೆ ಮುಂದುವರಿದಿತ್ತು . ಕೆಲವೆಡೆ ತಾಪಮಾನದಲ್ಲಿ ವ್ಯತ್ಯಾಸ ಕಂಡು ಬಂದಿತ್ತು . ಉತ್ತರ ಕರ್ನಾಟಕದ ಒಳನಾಡು- ಕರಾವಳಿ ಮತ್ತು ದಕ್ಷಿಣ ಕರ್ನಾಟಕದ ಕೆಲವು ಪ್ರದೇಶಗಳಲ್ಲಿ ತಾಪಮಾನದಲ್ಲಿ ವ್ಯತ್ಯಾಸವಿತ್ತು .

ಮುಂದಿನ ಎರಡು ದಿನಗಳಲ್ಲೂ ಬೆಂಗಳೂರು ಸೇರಿದಂತೆ ರಾಜ್ಯಾದ್ಯಂತ, ಒಣಹವೆಯದ್ದೇ ಕಾರುಭಾರು ಎಂದು ಹವಾಮಾನ ಇಲಾಖೆಯ ಮಾಹಿತಿಯನ್ನಾಧರಿಸಿ ಯುಎನ್‌ಐ ವರದಿ ಮಾಡಿದೆ. ಮಂಗಳವಾರ ಬೆಂಗಳೂರಲ್ಲಿ 20 ಡಿ.ಸೆ. ಆಸುಪಾಸಿನಲ್ಲಿ ಕನಿಷ್ಠ ಉಷ್ಣಾಂಶ ಸುಳಿದಾಡುತ್ತಿರುತ್ತದೆ. ಅಲ್ಲಿಗೆ ನಿಮ್ಮ ನಿದ್ದೆ ಅಷ್ಟೇನೂ ಸುಖದಾಯಕವಲ್ಲ ಎಂದು ತಿಳಿಸಲು ವಿಷಾದಿಸುತ್ತೇವೆ.