ಸಿಡ್ನಿ ಟೆಸ್ಟ್‌ : ಆಸ್ಟ್ರೇಲಿಯಾಗೆ 180 ರನ್‌ ಮೊದಲ ಇನ್ನಿಂಗ್ಸ್‌ ಮುನ್ನಡೆ

ಸಿಡ್ನಿ : ನಾಯಕ ಸ್ಟೀವ್‌ ವಾ ಶತಕ (103), ಸ್ಲೇಟರ್‌ (96), ಗಿಲ್‌ಕ್ರಿಸ್ಟ್‌ (87) ಹಾಗೂ ಪಾಂಟಿಂಗ್‌ (51) ಅರ್ಧ ಶತಕಗಳ ನೆರವಿನಿಂದ ವಿಂಡೀಸ್‌ ವಿರುದ್ಧದ ಅಂತಿಮ ಟೆಸ್ಟ್‌ನ 3ನೇ ದಿನ ತನ್ನ ಮೊದಲ ಇನ್ನಿಂಗ್ಸ್‌ನಲ್ಲಿ ಆಸ್ಟ್ರೇಲಿಯಾ 180 ರನ್‌ ಮುನ್ನಡೆ ಗಳಿಸಿತು. ಇದಕ್ಕೆ ಉತ್ತರವಾಗಿ ದಿನದಾಟ ಮುಗಿದಾಗ ವಿಂಡೀಸ್‌ 1 ವಿಕೆಟ್‌ ನಷ್ಟಕ್ಕೆ 98 ರನ್‌ ಗಳಿಸಿ, ಇನಿಂಗ್ಸ್‌ ಸೋಲಿನಿಂದ ತಪ್ಪಿಸಿಕೊಳ್ಳುವ ಸೂಚನೆ ಕೊಟ್ಟಿದೆ.

ಟೆಸ್ಟ್‌ ಕ್ರಿಕೆಟ್‌ನಲ್ಲಿ ತಮ್ಮ 24ನೇ ಶತಕ ದಾಖಲಿಸುವ ಮೂಲಕ ಅತಿ ಹೆಚ್ಚು ಟೆಸ್ಟ್‌ ಶತಕ ಗಳಿಸಿದವರ ಯಾದಿಯ 5ನೇ ಸ್ಥಾನಕ್ಕೆ ಆಸ್ಟ್ರೇಲಿಯಾದ ಸ್ಟೀವ್‌ ವಾ ಸೇರಿದರು. ಅವರು ಭಾರತದ ಸಚಿನ್‌ ತೆಂಡೂಲ್ಕರ್‌ ಹಾಗೂ ವಿಂಡೀಸ್‌ನ ವಿವಿಯನ್‌ ರಿಚರ್ಡ್ಸ್‌ ಇರುವ ಸ್ಥಾನಕ್ಕೀಗ ಹೊಸ ಅಭ್ಯರ್ಥಿ.

ಎರಡನೇ ದಿನ 4 ವಿಕೆಟ್‌ ನಷ್ಟಕ್ಕೆ 284 ರನ್‌ ಗಳಿಸಿದ್ದ ಆಸ್ಟ್ರೇಲಿಯಾ ಗುರುವಾರ ತನ್ನ ಆಟ ಮುಂದುವರೆಸಿ 452 ರನ್‌ಗಳಿಗೆ ಮೊದಲ ಇನ್ನಿಂಗ್ಸ್‌ ಆಟ ಮುಗಿಸಿತು. ವಿಂಡೀಸ್‌ ಪರ ನಾಗಮುತ್ತು ತಮ್ಮ ಜೀವಮಾನದ ಅತ್ಯುತ್ತಮ ಸಾಧನೆ ಮಾಡಿ 119ಕ್ಕೆ 3 ವಿಕೆಟ್‌ ಗಳಿಸಿದರು. ಸ್ಟುವರ್ಟ್‌ 2 ಹಾಗೂ ಮೆಕ್‌ಲೀನ್‌ 1 ವಿಕೆಟ್‌ ಕಿತ್ತರು.

ಇನ್ನಿಂಗ್ಸ್‌ ಸೋಲಿನಿಂದ ಪಾರಾಗಲು 180 ರನ್‌ ಗಳಿಸಬೇಕಿದ್ದ ವಿಂಡೀಸ್‌ ಮೊದಲ ಇನ್ನಿಂಗ್ಸ್‌ನಂತೆಯೇ ಉತ್ತಮ ಆರಂಭ ಕಂಡಿತು. ಮೆಕ್‌ಗ್ರಾತ್‌ಗೆ ಹಿಂಡ್ಸ್‌ (46) ಕ್ಲೀನ್‌ ಬೌಲ್ಡ್‌ ಆಗುವ ಮುನ್ನ ಅದು 98 ರನ್‌ ಕಲೆ ಹಾಕಿತ್ತು. ಫಾರ್ಮ್‌ ಕಂಡುಕೊಂಡಿರುವ ಶರ್ವಿನ್‌ ಕ್ಯಾಂಪ್‌ಬೆಲ್‌ 46 ರನ್‌ ಗಳಿಸಿ ಅಜೇಯರಾಗಿದ್ದಾರೆ. ಇನ್ನೂ 2 ದಿನಗಳ ಆಟ ಬಾಕಿ ಇದ್ದು, ಆಸ್ಟ್ರೇಲಿಯಾದ ಸ್ಕೋರಿಗೆ ಸಮನಾಗಲು ವಿಂಡೀಸ್‌ಗೆ ಇನ್ನೂ 82 ರನ್‌ ಬೇಕಿದೆ.

(ಯುಎನ್‌ಐ)