ಫೆ.1,2 : ವಾಷಿಂಗ್ಟನ್‌ನಲ್ಲಿ ಇಂಡಿಯಾ ಇನ್‌ವೆಸ್ಟ್‌ಮೆಂಟ್‌ ಸ್ಟ್ರಾಟಜೀಸ್‌ 2001

*ಇಳಾ ದತ್‌

ನ್ಯೂಯಾರ್ಕ್‌ : ಬರುವ ವರ್ಷ ಫೆಬ್ರವರಿ 1 ಹಾಗೂ 2 ರಂದು ವಾಷಿಂಗ್ಟನ್‌ ಡಿಸಿಯಲ್ಲೊಂದು, ಭಾರತದ ಮಾಹಿತಿ ತಂತ್ರಜ್ಞಾನಕ್ಷೇತ್ರದಲ್ಲಿ ಎಷ್ಟು ಹಣ ಹೂಡಬೇಕೆಂದು ತೀರ್ಮಾನಿಸುವ ಸಮ್ಮೇಳನ ‘ಇಂಡಿಯಾ ಇನ್‌ವೆಸ್ಟ್‌ಮೆಂಟ್‌ ಸ್ಟ್ರಾಟಜೀಸ್‌ 2001’ ನಡೆಯಲಿದೆ. ಸುಮಾರು 500 ಪ್ರಾದೇಶಿಕ ಮತ್ತು ಅಂತರರಾಷ್ಟ್ರೀಯ ಕಂಪನಿಗಳ ಹಣ ಹೂಡಿಕೆ ತಂತ್ರ ಈ ಸಮ್ಮೇಳನದ ಚರ್ಚೆಯ ವಸ್ತು.

ಸಮ್ಮೇಳನದಲ್ಲಿ ಕೇವಲ ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಷ್ಟೇ ಅಲ್ಲದೆ ದೂರಸಂಪರ್ಕ ಕ್ಷೇತ್ರದಲ್ಲೂ ಹಣ ಹೂಡುವ ಬಗೆಗೆ ಕಂಪನಿಗಳು ಚರ್ಚಿಸಲಿವೆ. ಇಂಟರ್‌ ನ್ಯಾಷನಲ್‌ ಎಡ್ಜ್‌, ಎಲ್‌ಎಲ್‌ಸಿ, ಎ ರಾಕ್‌ವಿಲ್ಲೆ, ಮೇರಿಲ್ಯಾಂಡ್‌ ಮೂಲದ ಮಾರ್ಕೆಟಿಂಗ್‌, ಪಾಲಿಸಿ ರಿಸರ್ಚ್‌ ಮತ್ತು ಕನ್ಸಲ್ಟಿಂಗ್‌ ಕಂಪನಿಗಳು ಸಮ್ಮೇಳನವನ್ನು ಪ್ರಾಯೋಜಿಸಲಿವೆ.

‘ಭಾರತ ಹಿಂದಿನ ಮಡಿವಂತಿಕೆ ಬಿಟ್ಟಿದೆ. ತನ್ನಲ್ಲಿನ ಅವಕಾಶಗಳಿಗೆ ವೀದೇಶೀ ಕಂಪನಿಗಳಿಗೆ, ಅದರಲ್ಲೂ ವಿಶೇಷವಾಗಿ ಅಮೆರಿಕದ ಕಂಪನಿಗಳಿಗೆ ಕಾರ್ಪೆಟ್‌ ಹಾಸಿದೆ. ಹಿಂದಿನ ನಿಯಂತ್ರಣಗಳು ಈಗ ಮಾಯವಾಗಿವೆ. ಮಾರುಕಟ್ಟೆಗೆ ತಕ್ಕಂತೆ ಪ್ರಗತಿಯತ್ತ, ಉತ್ಪಾದನೆಯತ್ತ ಕಣ್ಣು ಹರಿಸಿ ಯೋಚನೆ- ದೃಷ್ಟಿಕೋನ ಬದಲಿಸಿಕೊಳ್ಳುವ ಚಾಕಚಕ್ಯರು ಹೆಚ್ಚಾಗಿದ್ದಾರೆ. ಭಾರತದಂಥ ಐಟಿ ಫಲವತ್ತತೆ ಭೂಮಿಯ ಮೇಲೆ ಕಾಸಿನ ಬೀಜ ಚೆಲ್ಲಿ, ಹೊನ್ನಿನ ಬೆಳೆ ತೆಗೆಯಲು ನಾವೂ ಉತ್ಸುಕರಾಗಿದ್ದೇವೆ’ ಎನ್ನುತ್ತಾರೆ ಎಲ್‌ಎಲ್‌ಸಿಯ ವ್ಯವಸ್ಥಾಪಕ ನಿರ್ದೇಶಕ ರಾಜೇಶ್‌ ಶಹಾನಿ.

ಸರ್ಕಾರದ ಯೋಜನೆ- ಧೋರಣೆಗಳು, ಪ್ರಸ್ತುತ ಬಂಡವಾಳ ಮಾರುಕಟ್ಟೆ, ಜಂಟಿ ವೆಂಚರ್‌ಗಳು, ಇ- ವ್ಯಾಪಾರ ತಂತ್ರ, ದೂರಸಂಪರ್ಕ ನಿಯಂತ್ರಣ ರಚನೆ, ನಿಸ್ತಂತು ಮಾರುಕಟ್ಟೆ, ‘ಇಂಟರ್‌ನೆಟ್‌ ಈ ಹೊತ್ತು’ ಮುಂತಾದ ಭಾರತಕ್ಕೆ ಸಂಬಂಧಿಸಿದ ಹಾಗೂ ಅದರಿಂದ ಅಮೆರಿಕೆಗೆ ಏನು ಲಭ್ಯ ಎಂಬ ವಿಷಯಗಳ ಬಗ್ಗೆ ಸಮ್ಮೇಳನದಲ್ಲಿ ಚರ್ಚಿಸಲಾಗುವುದು.

(ಐಎಎನ್‌ಎಸ್‌)