ಮಾರುತಿ ಉದ್ಯೋಗ್ ಭಾಗಶಃ ಮಾರಾಟ
ನವದೆಹಲಿ : ಮಾರುತಿ ಉದ್ಯೋಗ್ ಸಂಸ್ಥೆಯಲ್ಲಿ ತಾನು ತೊಡಗಿಸಿರುವ ಬಂಡವಾಳದ ಒಂದು ಭಾಗವನ್ನು ತತ್ವಶಃ ಮಾರಾಟ ಮಾಡಲು ಕೇಂದ್ರ ಸರಕಾರ ಶನಿವಾರ ನಿರ್ಧರಿಸಿತು. ಕೇಂದ್ರ ಸಚಿವ ಸಂಪುಟ ಈ ನಿಟ್ಟಿನಲ್ಲಿ ಕೈಗೊಂಡಿರುವ ತೀರ್ಮಾನವು ಮಹತ್ವವಾದ ಒಂದು ‘ನಾಟಕೀಯ ಬೆಳವಣಿಗೆ ’ . ಬಂಡವಾಳ ಮಾರಾಟದ ವಿಧಿವಿಧಾನಗಳನ್ನು ರೂಪಿಸಲು ಸರಕಾರ ಒಂದು ಸಮಿತಿಯನ್ನೂ ರಚಿಸಿದೆ.
ಇಂಡಿಯಾದ ಅತಿದೊಡ್ಡ ಕಾರು ಉತ್ಪಾದಕ ಸಂಸ್ಥೆ ಎನಿಸಿರುವ ಮಾರುತಿ ಕಂಪನಿಯಲ್ಲಿ ಸರಕಾರದ ಪಾಲು ಶೇ 50. ಉಳಿದರ್ಧ ಪಾಲು ಜಪಾನಿನ ಸುಜುಕಿ ಕಂಪನಿಯದು.
ಸರಕಾರದ ಈ ನಿರ್ಧಾರದಿಂದಾಗಿ ಮಾರುತಿ ಕಂಪನಿಯು ಇನ್ನು ಮುಂದೆ ಖಾಸಗಿ ಕ್ಷೇತ್ರದ ಪಾಲಾಗಲಿದೆ. ಸ್ವಾರಸ್ಯದ ಸಂಗತಿ ಎಂದರೆ ಭಾರತ ಸರಕಾರ ಮಾರಾಟ ಮಾಡುವ ಬಹುತೇಕ ಎಲ್ಲ ಶೇರುಗಳನ್ನು ಸುಜುಕಿ ಕಂಪನಿಯೇ ಕೊಂಡುಕೊಳ್ಳುವ ನಿರೀಕ್ಷೆ ಇದೆ. ಆಟೋ- ಉತ್ಪಾದಕ ಪ್ರಪಂಚದ ದಿಗ್ಗಜ ಎನಿಸಿರುವ ಜನರಲ್ ಮೋಟಾರ್ಸ್ ಕಂಪನಿ, ಮಾರುತಿ ಕಂಪನಿಯನ್ನು ತಾನೇ ಖರೀದಿಸುವುದಾಗಿಯೂ ಈ ಹಿಂದೆ ಹೇಳಿಕೊಂಡಿತ್ತು.
ಸುಜುಕಿ ಕಂಪನಿಯಲ್ಲಿ ಜನರಲ್ ಮೋಟಾರ್ಸ್ ಅಲ್ಪ ಪ್ರಮಾಣದ ಬಂಡವಾಳವನ್ನು ಹೊಂದಿದೆ ಎನ್ನುವುದು ಬೇರೆ ಮಾತು.
ಭಾರತದ ಕಾರು ಮಾರುಕಟ್ಟೆಯಲ್ಲಿ ನ ತೀವ್ರ ಪೈಪೋಟಿಯಿಂದಾಗಿ ಮಾರುತಿ ಉದ್ಯೋಗ್ನ ಮಾರುಕಟ್ಟೆ ಮೌಲ್ಯ ಈ ದಿನಗಳಲ್ಲಿ ಕುಸಿದಿದೆ. ಅದೇನೇ ಇದ್ದರೂ , ಮಾರಾಟ ನಿರ್ಧಾರದಿಂದ ಕೇಂದ್ರ ಸರಕಾರ ಭಾರೀ ಲಾಭ ಮಾಡಿಕೊಳ್ಳುವುದಂತೂ ನಿಜ.
(ಇಂಡಿಯಾ ಇನ್ಫೋ ವರದಿ)
ವಾರ್ತಾ
ಸಂಚಯ
ಮುಖಪುಟ
/
ಇವತ್ತು...
ಈ
ಹೊತ್ತು...