ಅವ್ಯವಹಾರ: ಬಾಗಿಲು ಮುಚ್ಚಿದಎಂಎಸ್‌ಐಎಲ್‌ ಲಂಡನ್‌ ಕಚೇರಿ

ಬೆಂಗಳೂರು : ಕರ್ನಾಟಕ ಸರಕಾರದ ಒಡೆತನದ ದಿ. ಮೈಸೂರು ಸೇಲ್ಸ್‌ ಇಂಟರ್‌ನ್ಯಾಷನಲ್‌ ಲಿಮಿಟೆಡ್‌ (ಎಂ.ಎಸ್‌.ಐ.ಎಲ್‌) ನ ಲಂಡನ್‌ ಕಚೇರಿಯನ್ನು ಮುಚ್ಚಲಾಗಿದೆ. ಈ ಕಚೇರಿಯಲ್ಲಿ ಅವ್ಯವಹಾರ ತಾಂಡವವಾಡುತ್ತಿದ್ದರಿಂದ ಇತ್ತೀಚೆಗೆ ಕಚೇರಿಯನ್ನು ಮುಚ್ಚಲಾಯಿತು ಎಂದು ಬೃಹತ್‌ ಕೈಗಾರಿಕಾ ಸಚಿವ ಆರ್‌.ವಿ. ದೇಶಪಾಂಡೆ ತಿಳಿಸಿದ್ದಾರೆ.

ಲಂಡನ್‌ ಎಂಎಸ್‌ಐಎಲ್‌ ಕಚೇರಿ ಅಧಿಕಾರಿಗಳ ಕರ್ತವ್ಯ ಲೋಪದಿಂದಾಗಿ ಸಂಸ್ಥೆ ಭಾರಿ ನಷ್ಟ ಅನುಭವಿಸಿದೆ ಎಂದು ಮಂಗಳವಾರ ವಿಧಾನಸಭೆಯಲ್ಲಿ ಅವರು ತಿಳಿಸಿದರು. ಲಂಡನ್‌ ಕಚೇರಿಯಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ರೆಡ್ಡಿ ಎಂಬ ಅಧಿಕಾರಿಯನ್ನು ಸೇವೆಯಿಂದ ಅಮಾನತು ಗೊಳಿಸಲಾಗಿದೆ. ಆ ಅಧಿಕಾರಿ ರಫ್ತುದಾರರ ಜತೆ ಷಾಮೀಲಾಗಿ ಸಂಸ್ಥೆಗೆ ಭಾರಿ ನಷ್ಟ ಉಂಟು ಮಾಡಿದ್ದಾರೆ ಎಂದು ಸಚಿವರು ತಿಳಿಸಿದರು.

ಈಗ ಅಮಾನತುಗೊಂಡಿರುವ ಆ ಅಧಿಕಾರಿ ತಮ್ಮ ಹುದ್ದೆಗೆ ರಾಜೀನಾಮೆ ನೀಡಿದ್ದಾರೆ. ಅವರ ವಿರುದ್ಧ ಕ್ರಿಮಿನಲ್‌ ಮೊಕದ್ದಮೆ ಹೂಡಲಾಗಿದೆ ಎಂದು ಪ್ರಶ್ನೋತ್ತರ ಅವಧಿಯಲ್ಲಿ ದೇಶಪಾಂಡೆ ತಿಳಿಸಿದರು. ಎಂಎಸ್‌ಐಎಲ್‌ ಸಂಸ್ಥೆ ಜೆಕೋಸ್ಲೋವಾಕಿಯಾದ ಮೆಸರ್ಸ್‌ ರೆಡ್ಡಿ ಎಸ್‌.ಆರ್‌.ಓ. ಪ್ರಾಗ್‌ ಕಂಪನಿಗೆ 1992ರಲ್ಲಿ ಸುಮಾರು 75 ಲಕ್ಷ ರುಪಾಯಿಯಷ್ಟು ಎಂಎಸ್‌ಐಎಲ್‌ ಉತ್ಪನ್ನಗಳನ್ನು ರಫ್ತು ಮಾಡಿತ್ತು, ಆದರೆ ಸಂಸ್ಥೆಗೆ ಕೇವಲ 37 ಲಕ್ಷ ರುಪಾಯಿಗಳು ಮಾತ್ರ ಸಂದಾಯವಾಗಿದೆ. ಎಂಎಸ್‌ಐಎಲ್‌ನಿಂದ ಸರಕು ಪಡೆದ ವ್ಯಕ್ತಿಯ ಹೆಸರೂ ರೆಡ್ಡಿ. ಅವರು ಈಗ ದಿವಾಳಿಯಾಗಿದ್ದಾರೆ ಎಂದು ಅಲ್ಲಿನ ನ್ಯಾಯಾಲಯ ಘೋಷಿಸಿದೆ ಇದರಿಂದ ಉಳಿದ ಹಣ ಸಂಸ್ಥೆಗೆ ಬಂದಿಲ್ಲ ಎಂದು ಸಚಿವರು ತಿಳಿಸಿದರು.