ಜನರಿಗೆ ನಿರಾಸೆ ತಂದ ಕ್ರೋನಿಯೆ ಟಿವಿ ಸಂದರ್ಶನ

ಜೋಹಾನ್ಸ್‌ಬರ್ಗ್‌ : ಕಿಂಗ್‌ ಆಯೋಗದ ಮುಂದೆ ಹಾಜರಾದ ನಂತರ ಕ್ರೋನಿಯೆ ನೀಡಿದ ಮೊದಲ ಟಿವಿ ಸಂದರ್ಶನ ಜನರಿಗೆ ನಿರೀಕ್ಷಿಸಿದಷ್ಟು ಮುದ ನೀಡಲಿಲ್ಲ.

ಗುರುವಾರ ರಾತ್ರಿ ಪ್ರಸಾರವಾದ ಸಂದರ್ಶನದಲ್ಲಿ , ಇಂಥ ಕೆಲಸ ಮಾಡಿದ್ದಕ್ಕೆ ನಿಮಗೆ ವಿಷಾದವಿದೆಯೇ, ಜನ ನಿಮ್ಮ ತಪ್ಪನ್ನು ಹೊಟ್ಟೆಗೆ ಹಾಕಿಕೊಂಡು ಕ್ಷಮಿಸಿದ್ದೇವೆ ಎಂದು ನಿಮ್ಮಲ್ಲಿಗೆ ಬಂದು ಹೇಳುತ್ತಿರುವುದು ನಿಜವೇ ಎಂಬಿತ್ಯಾದಿ ಸವಕಲು ಪ್ರಶ್ನೆಗಳೇ ಕೇಳಿಬಂದವು. ಸಂದರ್ಶಕ, ಆಸ್ಟ್ರೇಲಿಯಾದ ಮಾಜಿ ಆಟಗಾರ ಮೈಕ್‌ ಹೇಸ್‌ಮನ್‌ ಬಹುದಿನಗಳ ನಿರೀಕ್ಷೆ ಹೊತ್ತು ಟಿವಿ ಮುಂದೆ ಕೂತ ಪ್ರೇಕ್ಷಕರ ಉತ್ಸಾಹಕ್ಕೆ ತಣ್ಣೀರೆರಚಿದರು. ಮ್ಯಾಚ್‌ಫಿಕ್ಸಿಂಗ್‌ನಿಂದ ಬೇರೆಯೇ ದಾರಿಗೆ ಹೋದ ಸಂದರ್ಶನ ಕ್ರೋನಿಯೆ ಕ್ರಿಕೆಟ್‌ ಪ್ರೋಫೈಲಾಯಿತು.

ಕಿಂಗ್‌ ಆಯೋಗದ ವಿಚಾರಣೆಯ ನಂತರ ಕ್ರೋನಿಯೆ ಬಗೆಗಿನ ಜನಾಭಿಪ್ರಾಯವೇ ಬೇರೆಯಾಯಿತು. ಆತನ ವಿರುದ್ಧ ಕೆಂಡ ಕಾರುತ್ತಿದ್ದ ಜನ ಅವನನ್ನು ಕ್ಷಮಿಸಿ ಎನ್ನತೊಡಗಿದರು. ಕ್ರಿಕೆಟ್‌ ನೀತಿ ಬಗೆಗೆ ಪಾಠ ಹೇಳೋ ಕೆಲಸ ಕೊಡಲೂ ಪ್ರಿಟೋರಿಯಾ ವಿಶ್ವವಿದ್ಯಾಲಯ ಮುಂದಾಯಿತು. ಕಿಂಗ್‌ ಆಯೋಗದ ಮುಂದೆ ಹೇಳಿರದ ಕೆಲ ವಿಷಯಗಳನ್ನು ಸಂದರ್ಶನದಲ್ಲಿ ಕ್ರೋನಿಯೆ ಬಾಯಿಬಿಡುವಂತೆ ಮಾಡಬಹುದು ಎಂದು ಜನ ನಿರೀಕ್ಷಿಸಿದ್ದರು. ಆದರೆ ಅವರ ನಿರೀಕ್ಷೆ ಈಡೇರಲಿಲ್ಲ.

(ಐಎಎನ್‌ಎಸ್‌)