ಮನೆಗೆಲಸ ಮಾಡುತ್ತಲೇ ಗಂಟೆಗೆ ₹250 ಗಳಿಸೋ ಟ್ರಿಕ್ ಹೇಳಿಕೊಡ್ತಾರೆ ನೋಡಿ ಈ ಗೃಹಿಣಿ
ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನದ ಜಗತ್ತಿನಲ್ಲಿ ಭಾರತೀಯ ಗೃಹಿಣಿಯರ ಮನೆಗೆಲಸಕ್ಕೆ ಈಗ ಭಾರಿ ಬೇಡಿಕೆ ಬಂದಿದೆ. ಹೌದು, ಭವಿಷ್ಯದ ಹ್ಯೂಮನಾಯ್ಡ್ (ಮಾನವರಂತೆ ಕಾಣುವ) ರೋಬೋಟ್ಗಳಿಗೆ ತರಬೇತಿ ನೀಡಲು ಭಾರತದ ಸಾವಿರಾರು ಮಹಿಳೆಯರು ತಮ್ಮ ದೈನಂದಿನ ಮನೆಗೆಲಸದ ವಿಡಿಯೋಗಳನ್ನು ರೆಕಾರ್ಡ್ ಮಾಡಿ ಜಾಗತಿಕ ಟೆಕ್ ಕಂಪನಿಗಳಿಗೆ ಮಾರಾಟ ಮಾಡುತ್ತಿದ್ದಾರೆ. ಈ ಮೂಲಕ ಗಂಟೆಗೆ ಬರೋಬ್ಬರಿ 250 ರೂಪಾಯಿ ಸಂಭಾವನೆ ಪಡೆಯುತ್ತಿದ್ದಾರೆ.
ತಲೆಗೆ ಸ್ಮಾರ್ಟ್ಫೋನ್ ಕಟ್ಟಿ ಕೆಲಸ
ತಮಿಳುನಾಡಿನ ಚೆನ್ನೈನ 25 ವರ್ಷದ ಗೃಹಿಣಿ ನಾಗಿರೆಡ್ಡಿ ಶ್ರೀರಾಮಚಂದ್ರ ಅವರು ತಮ್ಮ ತಲೆಗೆ ಸ್ಮಾರ್ಟ್ಫೋನ್ ಒಂದನ್ನು ಪಟ್ಟಿಯ ಮೂಲಕ ಕಟ್ಟಿಕೊಂಡು ಅಡುಗೆಮನೆಯಲ್ಲಿ ಮಾವಿನಕಾಯಿ ಹೆಚ್ಚುವ, ಪಾತ್ರೆ ತೊಳೆಯುವ ಕೆಲಸಗಳನ್ನು ಮಾಡುತ್ತಾರೆ. ಅವರು ಮಾಡುವ ಪ್ರತಿ ಹಂತದ ಕೆಲಸವೂ ರೆಕಾರ್ಡ್ ಆಗುತ್ತದೆ. ಇಂತಹ ಸಾಮಾನ್ಯ ವಿಡಿಯೋಗಳು ಜಾಗತಿಕ ತಂತ್ರಜ್ಞಾನ ಸಂಸ್ಥೆಗಳಿಗೆ ಅತ್ಯಂತ ಮೌಲ್ಯಯುತವಾದ ದತ್ತಾಂಶಗಳಾಗಿವೆ. ಮಾನವರು ನೈಜ ಜಗತ್ತಿನಲ್ಲಿ ಹೇಗೆ ಕೈಕಾಲುಗಳನ್ನು ಚಲಿಸುತ್ತಾರೆ, ವಸ್ತುಗಳನ್ನು ಹೇಗೆ ಹಿಡಿಯುತ್ತಾರೆ ಎಂಬುದನ್ನು ರೋಬೋಟ್ಗಳಿಗೆ ಕಲಿಸಲು ಈ ವಿಡಿಯೋಗಳನ್ನು ಬಳಸಲಾಗುತ್ತಿದೆ.
ಬಟ್ಟೆ ಮಡಚುವುದು, ಸ್ಯಾಂಡ್ವಿಚ್ ಮಾಡುವುದು ಈಗ ರೋಬೋಟ್ ಕೆಲಸ
"ಮನೆಗೆಲಸ ಮಾಡಿದ್ದಕ್ಕೆ ಗಂಟೆಗೆ 250 ರೂಪಾಯಿ ಯಾರು ಕೊಡ್ತಾರೆ? ಭವಿಷ್ಯದಲ್ಲಿ ನಾನೇ ಒಂದು ರೋಬೋಟ್ ಕೊಂಡುಕೊಂಡರೂ ಆಶ್ಚರ್ಯವಿಲ್ಲ" ಎಂದು ಶ್ರೀರಾಮಚಂದ್ರ ಖುಷಿಯಿಂದ ಹೇಳುತ್ತಾರೆ.
ಭಾರತ ಮತ್ತು ಅಮೆರಿಕದಲ್ಲಿ ಕಚೇರಿ ಹೊಂದಿರುವ 'ಆಬ್ಜೆಕ್ಟ್ವೇಸ್' (Objectways) ನಂತಹ ದೊಡ್ಡ ದತ್ತಾಂಶ ಕಂಪನಿಗಳು ಇಂತಹ ವಿಡಿಯೋಗಳನ್ನು ಅಮೆಜಾನ್ ಸೇಜ್ಮೇಕರ್ನಂತಹ ಬೃಹತ್ ಮಷಿನ್ ಲರ್ನಿಂಗ್ ಪ್ಲಾಟ್ಫಾರ್ಮ್ಗಳಿಗೆ ಪೂರೈಸುತ್ತಿವೆ. ಅಮೆರಿಕ ಮೂಲದ ಹೂಡಿಕೆ ಬ್ಯಾಂಕ್ 'ಮೋರ್ಗನ್ ಸ್ಟಾನ್ಲಿ' ವರದಿಯ ಪ್ರಕಾರ, 2050ರ ವೇಳೆಗೆ ಜಗತ್ತಿನಲ್ಲಿ 100 ಕೋಟಿಗೂ ಹೆಚ್ಚು ಹ್ಯೂಮನಾಯ್ಡ್ ರೋಬೋಟ್ಗಳು ಬಳಕೆಗೆ ಬರಲಿವೆ. ಗ್ರಾಹಕರ ಬೇಡಿಕೆಗೆ ತಕ್ಕಂತೆ ಬಟ್ಟೆ ಮಡಚುವುದು, ಕಾಫಿ ಮಾಡುವುದು, ನಿರ್ದಿಷ್ಟ ಅಡುಗೆ ಮಾಡುವುದು ಹಾಗೂ ಸ್ಯಾಂಡ್ವಿಚ್ ತಯಾರಿಸುವ ವಿಡಿಯೋಗಳನ್ನು ಈ ಗೃಹಿಣಿಯರಿಂದ ಸಂಗ್ರಹಿಸಲಾಗುತ್ತಿದೆ.
ಫೇಕ್ ಅಪಾರ್ಟ್ಮೆಂಟ್ಗಳಲ್ಲಿ ಶೂಟಿಂಗ್
ಕೇವಲ ಮನೆಗಳಲ್ಲಷ್ಟೇ ಅಲ್ಲದೆ, ವಿಶೇಷ ಸ್ಟುಡಿಯೋಗಳಲ್ಲಿ ನಕಲಿ ಅಪಾರ್ಟ್ಮೆಂಟ್ಗಳನ್ನು ನಿರ್ಮಿಸಿ ಅಲ್ಲಿಯೂ ಇಂತಹ ಶೂಟಿಂಗ್ ನಡೆಸಲಾಗುತ್ತಿದೆ. ಆಂಧ್ರಪ್ರದೇಶದ 'ಖಾನಾತ್ ಕನ್ಸಲ್ಟಿಂಗ್ ಸರ್ವಿಸಸ್' ನಂತಹ ಸಂಸ್ಥೆಗಳು ಸಾವಿರಾರು ಜನರನ್ನು ಈ ಕೆಲಸಕ್ಕೆ ಬಳಸಿಕೊಳ್ಳುತ್ತಿವೆ. ಇಂಜಿನಿಯರಿಂಗ್ ಪದವೀಧರೆಯಾಗಿರುವ 21 ವರ್ಷದ ರಾಣಿ ಎನ್. ಎಂಬುವವರು ದಿನಕ್ಕೆ ಸುಮಾರು 90 ವಿಡಿಯೋಗಳನ್ನು ರೆಕಾರ್ಡ್ ಮಾಡುತ್ತಾರೆ. ಪ್ರತಿಯೊಂದು ವಿಡಿಯೋ 4 ನಿಮಿಷ ಇರುತ್ತದೆ. ಬಟ್ಟೆ ಮಡಚುವ ಕೆಲಸವನ್ನು ಅವರು ಪದೇ ಪದೇ ಮಾಡುತ್ತಾರೆ. ಕೆಲವು ಕಡೆಗಳಲ್ಲಿ ಕೈ ಮತ್ತು ಕಾಲುಗಳಿಗೆ ಮೋಷನ್-ಸೆನ್ಸರ್ ಬ್ಯಾಂಡ್ಗಳನ್ನು ಕಟ್ಟಿ ನಿಖರವಾದ ಚಲನವಲನಗಳನ್ನು ಸಹ ದಾಖಲಿಸಲಾಗುತ್ತಿದೆ.
ಭವಿಷ್ಯದ ಉದ್ಯೋಗ ನಷ್ಟದ ಆತಂಕ
ಭಾರತವು ಪ್ರಸ್ತುತ ಇಡೀ ವಿಶ್ವಕ್ಕೆ ಎಐ ಡೇಟಾ ಒದಗಿಸುವ ಪ್ರಮುಖ ಕೇಂದ್ರವಾಗಿ ಹೊರಹೊಮ್ಮುತ್ತಿದೆ. ಆದರೆ, ಈ ತಂತ್ರಜ್ಞಾನದ ಬೆಳವಣಿಗೆಯು ಭವಿಷ್ಯದಲ್ಲಿ ಉದ್ಯೋಗ ನಷ್ಟದ ಭೀತಿಯನ್ನು ತಂದೊಡ್ಡಿದೆ. ಭಾರತ ಸರ್ಕಾರದ 'ನೀತಿ ಆಯೋಗ' ತನ್ನ ವರದಿಯಲ್ಲಿ, "ಸಾಮಾನ್ಯವಾಗಿ ಎಐ ತಂತ್ರಜ್ಞಾನದಿಂದ ಕಚೇರಿ ನೌಕರರ ಉದ್ಯೋಗಗಳು ನಷ್ಟವಾಗುತ್ತವೆ ಎಂಬ ಚರ್ಚೆ ನಡೆಯುತ್ತದೆ. ಆದರೆ ಭಾರತದ ಆರ್ಥಿಕತೆಯ ಬೆನ್ನೆಲುಬಾಗಿರುವ 49 ಕೋಟಿ ಅನೌಪಚಾರಿಕ ವಲಯದ ಕಾರ್ಮಿಕರ ಮೇಲೆ ಇದು ಹೇಗೆ ಪರಿಣಾಮ ಬೀರಬಹುದು ಎಂಬ ಬಗ್ಗೆ ಗಂಭೀರ ಚರ್ಚೆ ನಡೆಯುತ್ತಿಲ್ಲ" ಎಂದು ಕಳವಳ ವ್ಯಕ್ತಪಡಿಸಿದೆ.
ಬೆಂಗಳೂರಿನ ರಸ್ತೆಬದಿಯಲ್ಲಿ ಕಳೆದ ಹತ್ತು ವರ್ಷಗಳಿಂದ ಹೂವಿನ ಹಾರ ಕಟ್ಟುವ 55 ವರ್ಷದ ಪೊನ್ನಿ ಎಂಬುವವರಿಗೂ ಫೋನ್ ಕಟ್ಟಿ ವಿಡಿಯೋ ರೆಕಾರ್ಡ್ ಮಾಡಿಕೊಳ್ಳಲು ಹಣ ನೀಡಲಾಗಿದೆ. "ನಮ್ಮ ಮುಂದಿನ ಪೀಳಿಗೆಯವರು ಇಂತಹ ಕೆಲಸಗಳನ್ನು ಮಾಡಬೇಕಾಗಿ ಬಂದರೆ, ಅವರಿಗೆ ಖಂಡಿತ ಉದ್ಯೋಗದ ಸಮಸ್ಯೆ ಎದುರಾಗಲಿದೆ" ಎಂದು ಅವರು ಆತಂಕ ವ್ಯಕ್ತಪಡಿಸುತ್ತಾರೆ. ಆದರೆ, ಕೆಲವು ತಜ್ಞರ ಪ್ರಕಾರ ರೋಬೋಟ್ಗಳು ಮಾನವರ ಕೆಲಸವನ್ನು ಕಸಿದುಕೊಳ್ಳುವುದಿಲ್ಲ, ಬದಲಿಗೆ ಭವಿಷ್ಯದಲ್ಲಿ ಮನುಷ್ಯರು ಮತ್ತು ರೋಬೋಟ್ಗಳು ಒಟ್ಟಾಗಿ ಕೆಲಸ ಮಾಡುವ ಹೊಸ ಪದ್ಧತಿ ಜಾರಿಗೆ ಬರಲಿದೆ ಎನ್ನುತ್ತಾರೆ.
Click it and Unblock the Notifications
Sign in with Google