ಐಐಟಿ ಬಿಟ್ಟು ಯೋಗ ಹಿಡಿದ ಯುವಕ; ಇಂದು 169 ದೇಶಗಳಲ್ಲಿ 1.26 ಕೋಟಿ ಜನರಿಗೆ ಗುರು!
ದೇಶದ ಅತ್ಯಂತ ಪ್ರತಿಷ್ಠಿತ ಶಿಕ್ಷಣ ಸಂಸ್ಥೆಗಳಲ್ಲಿ ಒಂದಾದ ಐಐಟಿಯಿಂದ ಪದವಿ ಪಡೆದ ಯುವಕನೊಬ್ಬ ಲಕ್ಷಾಂತರ ರೂಪಾಯಿ ಸಂಬಳದ ಉದ್ಯೋಗವನ್ನು ಬಿಟ್ಟು ಯೋಗ ಶಿಕ್ಷಕನಾಗಲು ನಿರ್ಧರಿಸಿದರೆ, ಬಹುತೇಕರು ಅದನ್ನು ಹುಚ್ಚುತನ ಎಂದು ಕರೆಯಬಹುದು. ಆದರೆ ಮಹಾರಾಷ್ಟ್ರದ ಸೌರಭ್ ಬೋತ್ರಾ ಅವರ ಕಥೆ ಅದೇ ನಿರ್ಧಾರ ಹೇಗೆ ಕೋಟ್ಯಂತರ ಜನರ ಜೀವನದಲ್ಲಿ ಬದಲಾವಣೆ ತರಬಹುದು ಎಂಬುದಕ್ಕೆ ಜೀವಂತ ಉದಾಹರಣೆಯಾಗಿದೆ.
ಇಂದು ಸೌರಭ್ ಬೋತ್ರಾ ಎಂಬ ಹೆಸರು ಯೋಗ ಪ್ರಪಂಚದಲ್ಲಿ ದೊಡ್ಡ ಬ್ರ್ಯಾಂಡ್. ಅವರು ಸ್ಥಾಪಿಸಿದ "ಹ್ಯಾಬಿಲ್ಡ್" (Habuild) ಎಂಬ ಆನ್ಲೈನ್ ಯೋಗ ವೇದಿಕೆ ಮೂಲಕ 169 ದೇಶಗಳ 1.26 ಕೋಟಿಗೂ ಹೆಚ್ಚು ಜನರು ಯೋಗಾಭ್ಯಾಸ ಮಾಡುತ್ತಿದ್ದಾರೆ. ಅವರ ಸಂಸ್ಥೆ ಈಗಾಗಲೇ ಆರು ವಿಶ್ವ ದಾಖಲೆಗಳನ್ನು ನಿರ್ಮಿಸಿದ್ದು, ಪ್ರತಿದಿನ ಲಕ್ಷಾಂತರ ಜನರು ಅವರ ಯೋಗ ತರಗತಿಗಳಿಗೆ ಸೇರುತ್ತಿದ್ದಾರೆ.
ಹಳ್ಳಿಯಿಂದ ಆರಂಭವಾದ ಪಯಣ
ಸೌರಭ್ ಬೋತ್ರಾ ಅವರ ಕುಟುಂಬ ಮೂಲತಃ ರಾಜಸ್ಥಾನದವರು. ಅವರು ಮಹಾರಾಷ್ಟ್ರದ ವಾಶಿಂ ಜಿಲ್ಲೆಯ ಧನಾಜ್ ಎಂಬ ಪುಟ್ಟ ಹಳ್ಳಿಯಲ್ಲಿ ಬೆಳೆದರು. ಅವರ ಜೀವನದ ಮೇಲೆ ಅಜ್ಜ ಡಾ. ಲಕ್ಷ್ಮೀಚಂದ್ ಬೋತ್ರಾ ಅವರ ಪ್ರಭಾವ ಬಹಳ ದೊಡ್ಡದು.
1955ರಲ್ಲಿ ವೈದ್ಯಕೀಯ ಪದವಿ ಪಡೆದಿದ್ದ ಲಕ್ಷ್ಮೀಚಂದ್ ಅವರು ನಗರದಲ್ಲಿ ಸುಖ ಜೀವನ ನಡೆಸುವ ಅವಕಾಶವಿದ್ದರೂ, ಮೂಲಸೌಕರ್ಯಗಳೇ ಇಲ್ಲದ ಹಳ್ಳಿಯಲ್ಲಿ ಸೇವೆ ಮಾಡಲು ನಿರ್ಧರಿಸಿದರು. ಅಲ್ಲಿನ ಜನರಿಗಾಗಿ ಆಸ್ಪತ್ರೆ, ರಸ್ತೆ ಮತ್ತು ಶಾಲೆಗಳನ್ನು ನಿರ್ಮಿಸಲು ಶ್ರಮಿಸಿದರು. ಈ ಸೇವಾ ಮನೋಭಾವವೇ ಸೌರಭ್ ಅವರ ಮನಸ್ಸಿನ ಮೇಲೆ ಆಳವಾದ ಪ್ರಭಾವ ಬೀರಿತು.
ಐಐಟಿ ಪದವಿ, ಆದರೆ ಬೇರೆ ಕನಸು
ಸೌರಭ್ ಅವರು ಐಐಟಿ-ಬಿಎಚ್ಯುನಲ್ಲಿ ಎಂಜಿನಿಯರಿಂಗ್ ಪದವಿ ಪಡೆದರು. ಸಾಮಾನ್ಯವಾಗಿ ಐಐಟಿ ವಿದ್ಯಾರ್ಥಿಗಳು ಬಹುರಾಷ್ಟ್ರೀಯ ಕಂಪನಿಗಳಲ್ಲಿ ಉದ್ಯೋಗ ಪಡೆದು ಲಕ್ಷಾಂತರ ರೂಪಾಯಿ ಸಂಬಳ ಗಳಿಸುತ್ತಾರೆ. ಆದರೆ ಸೌರಭ್ ಅವರ ಮನಸ್ಸು ಆ ದಿಕ್ಕಿನಲ್ಲಿ ಇರಲಿಲ್ಲ.
ಕಾಲೇಜಿನ ಎರಡನೇ ವರ್ಷದಲ್ಲಿದ್ದಾಗ ಅಜ್ಜ ಕೊಟ್ಟ ಆಧ್ಯಾತ್ಮಿಕ ಪುಸ್ತಕವೊಂದು ಅವರ ಚಿಂತನೆ ಬದಲಿಸಿತು. ಬಳಿಕ ಧ್ಯಾನ ಮತ್ತು ಯೋಗದತ್ತ ಆಸಕ್ತಿ ಬೆಳೆಸಿಕೊಂಡರು. ಬಾಲ್ಯದಿಂದಲೇ ಇದ್ದ ಅಸ್ತಮಾ ಸಮಸ್ಯೆ ಧ್ಯಾನದ ಮೂಲಕ ಕಡಿಮೆಯಾಗುತ್ತಿರುವುದನ್ನು ಕಂಡ ಅವರು, ಇದೇ ಮಾರ್ಗವನ್ನು ಇತರರಿಗೂ ತಲುಪಿಸಬೇಕು ಎಂದು ನಿರ್ಧರಿಸಿದರು.
2014ರಲ್ಲಿ ಪದವಿ ಮುಗಿದ ಬಳಿಕ ಕುಟುಂಬದ ವ್ಯವಹಾರಕ್ಕೆ ಸೇರಿದ್ದರೂ, ಕೇವಲ ಮೂರು ತಿಂಗಳಲ್ಲೇ ಅದನ್ನು ಬಿಟ್ಟು ಯೋಗ ಮತ್ತು ಧ್ಯಾನ ಬೋಧನೆಗೆ ತಮ್ಮನ್ನು ಸಂಪೂರ್ಣವಾಗಿ ಅರ್ಪಿಸಿಕೊಂಡರು.
ಆರು ವರ್ಷ ಆದಾಯವಿಲ್ಲ!
ಯೋಗ ಬೋಧನೆ ಆರಂಭಿಸಿದ ಸೌರಭ್ ಅವರಿಗೆ ಆರಂಭಿಕ ವರ್ಷಗಳಲ್ಲಿ ಯಾವುದೇ ಆದಾಯ ಇರಲಿಲ್ಲ. ಆರು ವರ್ಷಗಳ ಕಾಲ ಅವರು ಹಣ ಗಳಿಸದೇ ಜನರಿಗೆ ಯೋಗ ಕಲಿಸುತ್ತಿದ್ದರು. ಇದು ಅವರ ಪೋಷಕರಿಗೆ ಆತಂಕದ ವಿಷಯವಾಗಿತ್ತು.
ಆದರೆ ಸೌರಭ್ ತಮ್ಮ ದಾರಿಯನ್ನು ಬದಲಿಸದೆ ಮುಂದುವರಿದರು. 2020ರ ಕೊರೊನಾ ಲಾಕ್ಡೌನ್ ವೇಳೆ ಅವರು ಆನ್ಲೈನ್ ಯೋಗ ತರಗತಿಗಳನ್ನು ಆರಂಭಿಸಿದರು. ಮೊದಲ ದಿನ ಕೇವಲ ಮೂವರು ಮಾತ್ರ ತರಗತಿಗೆ ಸೇರಿದ್ದರು. ಬಹುತೇಕರಿಗೆ ಇದು ನಿರಾಶೆಯ ಕ್ಷಣವಾಗಿರಬಹುದಿತ್ತು. ಆದರೆ ಸೌರಭ್ ಮಾತ್ರ ಅದನ್ನೇ ಅವಕಾಶವಾಗಿ ಕಂಡರು.
ಮೂವರಿಂದ ಲಕ್ಷಾಂತರ ಜನರವರೆಗೆ
ಆರಂಭದಲ್ಲಿ ಉಚಿತವಾಗಿ ತರಗತಿ ನಡೆಸುತ್ತಿದ್ದ ಸೌರಭ್, ನಂತರ ತಿಂಗಳಿಗೆ ಕೇವಲ 100 ರೂಪಾಯಿ ಶುಲ್ಕ ನಿಗದಿಪಡಿಸಿದರು. ಇದರಿಂದ ವಿದ್ಯಾರ್ಥಿಗಳ ಬದ್ಧತೆ ಹೆಚ್ಚಾಯಿತು. ನಂತರ ಅವರ ಸ್ನೇಹಿತ ಹಾಗೂ ಐಐಟಿ ಸಹಪಾಠಿ ಅಂಶುಲ್ ಅಗ್ರವಾಲ್, ಕಾರ್ಯಕ್ರಮವನ್ನು ದೊಡ್ಡ ಮಟ್ಟಕ್ಕೆ ತೆಗೆದುಕೊಂಡು ಹೋಗುವಂತೆ ಸಲಹೆ ನೀಡಿದರು. ಅದರ ಫಲವಾಗಿ ನಡೆದ ಮೊದಲ ದೊಡ್ಡ ಆನ್ಲೈನ್ ಯೋಗ ಕಾರ್ಯಕ್ರಮಕ್ಕೆ ಒಂದು ಲಕ್ಷಕ್ಕೂ ಹೆಚ್ಚು ಜನರು ಸೇರಿದರು. ಅಲ್ಲಿಂದ ಹ್ಯಾಬಿಲ್ಡ್ನ ಬೆಳವಣಿಗೆ ವೇಗ ಪಡೆದುಕೊಂಡಿತು.
2023ರಲ್ಲಿ ಹ್ಯಾಬಿಲ್ಡ್ ಅತಿದೊಡ್ಡ ವರ್ಚುವಲ್ ಯೋಗ ತರಗತಿ ನಡೆಸಿ ವಿಶ್ವ ದಾಖಲೆ ನಿರ್ಮಿಸಿತು. 1.34 ಲಕ್ಷ ಜನರು ಒಂದೇ ಸಮಯದಲ್ಲಿ ಭಾಗವಹಿಸಿದ್ದರು. 2024ರಲ್ಲಿ ಯೂಟ್ಯೂಬ್ನಲ್ಲಿ ನಡೆದ ಯೋಗ ಲೈವ್ ಕಾರ್ಯಕ್ರಮಕ್ಕೆ 2.46 ಲಕ್ಷಕ್ಕೂ ಹೆಚ್ಚು ಜನರು ಸೇರಿ ಗಿನ್ನೆಸ್ ವಿಶ್ವ ದಾಖಲೆ ನಿರ್ಮಿಸಲಾಯಿತು.
ಇದಾದ ಬಳಿಕ ಮತ್ತಷ್ಟು ದಾಖಲೆಗಳು ಬಂದವು. 2025ರ ಅಂತರರಾಷ್ಟ್ರೀಯ ಯೋಗ ದಿನಾಚರಣೆಯಂದು ನಡೆದ ಕಾರ್ಯಕ್ರಮದಲ್ಲಿ 7.52 ಲಕ್ಷಕ್ಕೂ ಹೆಚ್ಚು ಜನರು ನೇರವಾಗಿ ಭಾಗವಹಿಸಿ ವಿಶ್ವದ ಅತಿದೊಡ್ಡ ಸಮನ್ವಯಿತ ಆನ್ಲೈನ್ ಯೋಗ ಕಾರ್ಯಕ್ರಮ ಎಂಬ ಹೆಗ್ಗಳಿಕೆ ಪಡೆದುಕೊಂಡಿತು.
ತಾಯಿಯ ಸಲಹೆ ತಂದ ಮಹತ್ತರ ಬದಲಾವಣೆ
ಸೌರಭ್ ಅವರ ಯಶಸ್ಸಿನ ಹಿಂದೆ ಅವರ ತಾಯಿಯ ಪಾತ್ರವೂ ಮಹತ್ವದ್ದಾಗಿದೆ. ಒಮ್ಮೆ ಮೊಣಕಾಲು ನೋವಿನಿಂದ ಬಳಲುತ್ತಿದ್ದ ತಾಯಿ ಯೋಗ ಕಲಿಯಲು ಬಂದಾಗ, ಸೌರಭ್ ಬಳಸುತ್ತಿದ್ದ ತಾಂತ್ರಿಕ ಪದಗಳು ಮತ್ತು ಕಠಿಣ ಆಸನಗಳು ಹಿರಿಯರಿಗೆ ಸೂಕ್ತವಲ್ಲ ಎಂದು ತಿಳಿಸಿದರು.
ಈ ಸಲಹೆಯನ್ನು ಗಂಭೀರವಾಗಿ ಪರಿಗಣಿಸಿದ ಸೌರಭ್, 40 ವರ್ಷ ಮೇಲ್ಪಟ್ಟ ಮಹಿಳೆಯರಿಗೆ ಸರಳ ಯೋಗ ಕಾರ್ಯಕ್ರಮಗಳನ್ನು ರೂಪಿಸಿದರು. ಸುಲಭ ಭಾಷೆ, ಸರಳ ಆಸನಗಳು ಮತ್ತು ಅನುಕೂಲಕರ ಸಮಯಗಳನ್ನು ಪರಿಚಯಿಸಿದರು. ಇದರಿಂದ ಸಾವಿರಾರು ಗೃಹಿಣಿಯರು ಮತ್ತು ಹಿರಿಯ ಮಹಿಳೆಯರು ಯೋಗದತ್ತ ಆಕರ್ಷಿತರಾದರು.
300 ಮಂದಿಗೆ ಉದ್ಯೋಗ ನೀಡಿದ ಸಂಸ್ಥೆ
ಬಾಲ್ಯದಲ್ಲಿ ತಂದೆಯಂತೆ ಕನಿಷ್ಠ 100 ಮಂದಿಗೆ ಉದ್ಯೋಗ ನೀಡಬೇಕು ಎಂಬ ಕನಸು ಸೌರಭ್ ಅವರಿಗಿತ್ತು. ಇಂದು ಆ ಕನಸು ನಿಜವಾಗಿದೆ.
ನಾಲ್ವರು ಸದಸ್ಯರೊಂದಿಗೆ ಆರಂಭವಾದ ಹ್ಯಾಬಿಲ್ಡ್ ಸಂಸ್ಥೆಯಲ್ಲಿ ಈಗ 300ಕ್ಕೂ ಹೆಚ್ಚು ಉದ್ಯೋಗಿಗಳು ಕೆಲಸ ಮಾಡುತ್ತಿದ್ದಾರೆ. ಪ್ರತಿದಿನ ಬೆಳಗ್ಗೆ ಲಕ್ಷಾಂತರ ಜನರಿಗೆ "ಗುಡ್ ಮಾರ್ನಿಂಗ್, ಯೋಗ ಶುರು ಮಾಡೋಣ" ಎಂದು ಹೇಳುತ್ತಾ ಸೌರಭ್ ಆರೋಗ್ಯಕರ ಜೀವನಶೈಲಿಯ ಚಳವಳಿಯ ನಾಯಕರಾಗಿದ್ದಾರೆ.
ಐಐಟಿ ಪದವಿ, ದೊಡ್ಡ ಸಂಬಳದ ಉದ್ಯೋಗ ಮತ್ತು ಸಾಂಪ್ರದಾಯಿಕ ಯಶಸ್ಸಿನ ಹಾದಿಯನ್ನು ಬಿಟ್ಟು, ಜನರ ಆರೋಗ್ಯಕ್ಕಾಗಿ ಬದುಕು ಸಮರ್ಪಿಸಿದ ಸೌರಭ್ ಬೋತ್ರಾ ಅವರ ಕಥೆ ಲಕ್ಷಾಂತರ ಯುವಕರಿಗೆ ಪ್ರೇರಣೆದಾಯಿ. ಕೆಲವೊಮ್ಮೆ ಜೀವನದಲ್ಲಿ ದೊಡ್ಡ ಯಶಸ್ಸು ಇತರ ಜನರ ಬದುಕಿನಲ್ಲಿ ಮಾಡುವ ಬದಲಾವಣೆಯಿಂದ ಸಿಗುತ್ತದೆ ಎಂಬುದನ್ನು ಅವರು ಸಾಬೀತುಪಡಿಸಿದ್ದಾರೆ.
(ಬರಹ: ಭವಾನಿ ಭಟ್)
Click it and Unblock the Notifications
Sign in with Google