• search
  • Live TV
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
For Daily Alerts

ಬೆಳಗಾವಿ ಮೇಯರ್‌ಗೆ ಸನ್ಮಾನವೆಂಬ ಸಂತಸ,ಸಂಕಟ

By Staff
|

Rani Chennammaದಿ ಕಾನ್ ಕ್ವೆಸ್ಟ್ ಆಫ್ ಕಳಿಂಗ, ದಿ ಕಾನ್ ಕ್ವೆಸ್ಟ್ ಆಫ್ ವಿದರ್ಭ ಮುಂತಾದ ಐತಿಹಾಸಿಕ ಯುದ್ಧ ಕಥೆಗಳನ್ನು ನಾವೆಲ್ಲ ಚರಿತ್ರೆಯ ಪಠ್ಯದಲ್ಲಿ ಓದಿದ್ದೆವು. ಈಗ ಕನ್ನಡಿಗರ 'ಬೆಳಗಾವಿ ಪಾಲಿಕೆಯ ಆಕ್ರಮಣ ಮತ್ತು ದಿಗ್ವಿವಿಜಯ'ದ ವರದಿಗಳನ್ನು ಓದುವಂತಾಗಿದೆ. ಪರಿಸ್ಥಿತಿಯ ಪಿತೂರಿ ಫಲ ಮತ್ತು ಸಮಕಾಲೀನ ಚರಿತ್ರೆ ಎಂದರೆ ಇದೇ ಅಲ್ಲವೇನು ?

ವಿಶ್ವೇಶ್ವರ ಭಟ್

ಅದೊಂದು ಅಪರೂಪದ ಸನ್ಮಾನ ಸಮಾರಂಭ. ಅದರಲ್ಲಿ ಪಾಲ್ಗೊಳ್ಳಲೇಬೇಕೆಂದು ಒತ್ತಾಯಿಸಿದಾಗ ಇಲ್ಲವೆನ್ನಲು ಆಗಲಿಲ್ಲ. ನಮ್ಮಲ್ಲಿ ಸನ್ಮಾನ ಮಾಡುವ ವರಿಗೆ, ಮಾಡಿಸಿಕೊಳ್ಳುವವರಿಗೇನೂ ಕೊರತೆಯಿಲ್ಲ. ಕೆಲವು ಮಂದಿಗೆ ಅದೊಂದು ಪೂರ್ಣಾವಧಿ ಕೆಲಸ. ನಾವು ಪತ್ರಿಕೆಯವರು ಸಹ ಇದನ್ನು ನಮ್ಮ ಕರ್ತವ್ಯವೆಂಬಂತೆ ವರದಿ ಮಾಡುತ್ತೇವೆ, ಫೋಟೊ ಪ್ರಕಟಿಸುತ್ತೇವೆ. ಇದೇನೇ ಇರಲಿ, ಸನ್ಮಾನಗಳು ಕೆಲವರಿಗೆ ಉದ್ಯೋಗ ಒದಗಿಸಿಕೊಟ್ಟಿದೆ, ಅನೇಕರನ್ನು ಬಿಜಿಯಾಗಿಟ್ಟಿದೆ. ಸಮಾಜದಲ್ಲಿ ಒಳ್ಳೆಯ ಕೆಲಸ ಮಾಡಿದವರನ್ನು ಗುರುತಿಸಿ ಸನ್ಮಾನಿಸುವಂತೆ, ಕೆಟ್ಟ ಕೆಲಸ ಮಾಡಿದವರನ್ನೂ ಗುರುತಿಸಿ ಅವರನ್ನು ವೇದಿಕೆ ಮೇಲೆ ಕರೆದು ಟೀಕಿಸುವ, ಉಗಿದು 'ಸನ್ಮಾನ" ಮಾಡುವ ಕಾರ್ಯಕ್ರಮ ಮಾಡುವ ಸಂಪ್ರದಾಯವಿದ್ದಿದ್ದರೆ ಅನೇಕರಿಗೆ ಅದೇ ಫುಲ್‌ಟೈಮ್ ಕೆಲಸವಾಗುತ್ತಿತ್ತು. ಇನ್ನು ನಾವು ಪತ್ರಿಕೆ ತುಂಬಾ ಆ ಚಿತ್ರಗಳನ್ನೇ ಪ್ರಕಟಿಸಬೇಕಾಗುತ್ತಿತ್ತು. ತಮಿಳುನಾಡಿನ ಸೇಲಮ್ ಜಿಲ್ಲೆಯ ಎರಡು ತಾಲೂಕು ಗಳಲ್ಲಿ 'ಉಗಿದು ಸನ್ಮಾನ" ಮಾಡುವ ಸಂಪ್ರದಾಯ ಜಾರಿಯಲ್ಲಿದೆಯಂತೆ. ಸನ್ಮಾನವೆಂಬುದು ಅನೇಕರ ತಲೆಗೆ ಮೈಸೂರುಪೇಟ ಧರಿಸುವಂತೆ ಮಾಡಿದ್ದರೆ, ಇನ್ನು ಕೆಲವರ ಹೊಟ್ಟೆ ಹೊರೆಯುತ್ತಿದೆ. ಇವೆರಡೂ ಇರುವ ತನಕ ಸನ್ಮಾನಗಳು ನಡೆಯುತ್ತಿರುತ್ತವೆ ಬಿಡಿ.

ಆದರೆ ಅದು ಅಂಥ ಕಾರ್ಯಕ್ರಮವಾಗಿರಲಿಲ್ಲ. ಹದಿನೆಂಟು ವರ್ಷಗಳ ನಂತರ ಬೆಳಗಾವಿಯ ಮಹಾನಗರ ಪಾಲಿಕೆ ಮೇಲೆ ಕನ್ನಡದ ಧ್ವಜ ಹಾರಿಸಿದ ಮಹಾಪೌರ ಹಾಗೂ ಉಪಮಹಾಪೌರರನ್ನು ಸನ್ಮಾನಿಸುವ ಕಾರ್ಯಕ್ರಮ. ಇದನ್ನು ಕರ್ನಾಟಕ ರಕ್ಷಣಾ ವೇದಿಕೆ ಸಂಘಟಿಸಿತ್ತು. ಕನ್ನಡ ಪತ್ರಿಕೆಯ ಸಂಪಾದಕನಾಗಿ ಈ ಸಮಾರಂಭದಲ್ಲಿ ಪಾಲ್ಗೊಳ್ಳುವುದು ಕರ್ತವ್ಯವೆಂದು ಭಾವಿಸಿ ಒಪ್ಪಿಕೊಂಡೆ. ಯಾಕೆಂದರೆ ಲಂಡನ್ ಟೈಮ್ಸ್, ಮಹಾರಾಷ್ಟ್ರ ಟೈಮ್ಸ್ ಪತ್ರಿಕೆಗಳ ಸಂಪಾದಕರನ್ನು ಇಂಥ ಕಾರ್ಯಕ್ರಮಗಳಿಗೆ ಆಹ್ವಾನಿಸುತ್ತಾರಾ? ಅಲ್ಲದೇ ಅವರು ಬರುತ್ತಾರಾ?

ಬೆಳಗಾವಿ ಪಾಲಿಕೆಗೆ ಕನ್ನಡ ಮಹಾಪೌರರು, ಉಪಮಹಾಪೌರರು ಆಯ್ಕೆಯಾಗಲು ಕಾರಣಕರ್ತರಾದ ಕರವೇ ಅಧ್ಯಕ್ಷ ನಾರಾಯಣಗೌಡರು ಬಹಳ ಸಂತಸ, ಸಂಭ್ರಮದಿಂದ ಈ ಸಮಾರಂಭ ಆಯೋಜಿಸಿದ್ದು ಸಹಜವೇ ಆಗಿತ್ತು. ಬೆಳಗಾವಿಯಲ್ಲಿ ಕನ್ನಡದ ಸ್ಥಿತಿಗತಿ ಹೇಗಿದೆಯೆಂಬುದು ನಮಗೆಲ್ಲ ಗೊತ್ತೇ ಇದೆ. ಎಲ್ಲೆಡೆ ಮರಾಠಿ ಹಾಗೂ ಮರಾಠಿಗರ ಪ್ರಾಬಲ್ಯ. ಬೆಳಗಾವಿ ನಮಗೆ ಬೇಕೇ ಬೇಕು ಎಂದು ಮಹಾರಾಷ್ಟ್ರವಂತೂ ಕಾಲಕಾಲಕ್ಕೆ ಗುಟುರು ಹಾಕುತ್ತಿರುತ್ತದೆ. ಬೆಳಗಾವಿಯಲ್ಲಿ ಕರ್ನಾಟಕ ವಿಧಾನಮಂಡಲದ ಐತಿಹಾಸಿಕ ವಿಶೇಷ ಅಧಿವೇಶನ ನಡೆಯುತ್ತಿದ್ದರೆ, ಕೇವಲ ಮೂರ್ನಾಲ್ಕು ಕಿ.ಮೀ. ದೂರದಲ್ಲಿ ಮರಾಠಿಗರು 'ಮಹಾಮೇಳಾವ" ಸಂಘ ಟಿಸಿದ್ದರು. ಐವತ್ತು ಸಾವಿರಕ್ಕೂ ಹೆಚ್ಚು ಮಂದಿ ಸೇರಿದ್ದ ಮಹಾಮೇಳಾವದಲ್ಲಿ ಖುದ್ದಾಗಿ ಮಹಾರಾಷ್ಟ್ರದ ಉಪಮುಖ್ಯಮಂತ್ರಿ ಹಾಜರಾಗಿದ್ದಲ್ಲದೇ ಕನ್ನಡಿಗರ ಕೆಣಕುವ ಮಾತನ್ನಾಡಿದ್ದರು. ರಾಜ್ಯ ಸರಕಾರದ ಮೂಗಿನ ಕೆಳಗೇ ಕುಳಿತು ಕನ್ನಡಿಗರನ್ನು ಅವಮಾನಿಸಿ ಹೋಗಿದ್ದರು. ಸರಕಾರಕ್ಕೆ ಸರಕಾರವೇ ಅಧಿವೇಶನ ಮಾಡಲಿ, ನಾವು ನಿಮಗಿಂತ ದೊಡ್ಡ ಸಮಾರಂಭ ಮಾಡುತ್ತೇವೆಂಬ ಅರ್ಥದಲ್ಲಿ ಮರಾಠಿಗರು ಸಡ್ಡು ಹೊಡೆದು ತಮ್ಮ ಬಲಪ್ರದರ್ಶಿಸಿದ್ದರು.

ಒಂದರ್ಥದಲ್ಲಿ ಅಂದು ಮರಾಠಿಗರು ತಮ್ಮ ತಂಟೆಗೆ ಬಂದರೆ ಹುಷಾರ್ ಎಂಬ ಸಂದೇಶವನ್ನು ನೇರವಾಗಿ ರಾಜ್ಯ ಸರಕಾರಕ್ಕೆ ಕಳಿಸಿದ್ದರು. ನಮ್ಮ ಸರಕಾರ ಇವನ್ನೆಲ್ಲ ತೆಪ್ಪಗೆ ನೋಡಿತು. ರಾಜ್ಯಸರಕಾರವಿದ್ದರೇನಂತೆ ನಾವು ನಿಮ್ಮನ್ನು ಕೇರ್ ಮಾಡುವವರಲ್ಲ ಎಂಬ ಧಿಮಾಕನ್ನೂ ಮರಾಠಿಗರು ಪ್ರದರ್ಶಿಸಿದರು. ಕನ್ನಡ ಹಾಗೂ ಕನ್ನಡಿಗರ ವಿಷಯದಲ್ಲಿ ಮರಾಠಿಗರು ಇಂದಿಗೂ ಇದೇ ನಿಲುವನ್ನು ತಳೆದಿದ್ದಾರೆ. ಕಳೆದ ಮೂರು ದಶಕಗಳಿಂದ ಬೆಳಗಾವಿ ಮಹಾನಗರಪಾಲಿಕೆ ಮಹಾರಾಷ್ಟ್ರ ಏಕೀಕರಣ ಸಮಿತಿ(ಎಂಇಎಸ್)ಯ ಭದ್ರಮುಷ್ಟಿಯಲ್ಲಿದೆ. ಪಾಲಿಕೆ ಯಲ್ಲಿ ಮರಾಠಿಗರದೇ ಮೇಲುಗೈ. ಪಾಲಿಕೆಯ ಕಲಾಪ ಗಳೆಲ್ಲ ಮರಾಠಿಯಲ್ಲಿಯೇ ನಡೆಯುತ್ತಿದ್ದವು. ಸದಸ್ಯರು ಕೇಳುತ್ತಿದ್ದ ಪ್ರಶ್ನೆಗಳಿಗೆ ಆಯುಕ್ತರು ಕನ್ನಡದಲ್ಲಿ ಉತ್ತರ ನೀಡಿದರೆಂದು ಗಲಾಟೆಯಾಗಿತ್ತು. ಮರಾಠಿಯಲ್ಲಿ ಉತ್ತರ ನೀಡುವ ಆಯುಕ್ತರನ್ನು ಕೊಡಿ ಎಂದು ಮರಾಠಿ ಸದಸ್ಯ ಸರಕಾರವನ್ನು ಒತ್ತಾಯಿಸಿದ್ದ. ಮಹಾಪೌರರಂತೂ ಮರಾಠಿ ಯಲ್ಲಿಯೇ ಕಲಾಪಕ್ಕೆ ತಾಕೀತು ಮಾಡುತ್ತಿದ್ದರು. ಎರಡು ದಶಕಗಳ ಕಾಲ ಮರಾಠಿಗರು, ಕನ್ನಡಿಗರು ಪಾಲಿಕೆಯ ಉನ್ನತ ಸ್ಥಾನಕ್ಕೇರದಂತೆ ನೋಡಿಕೊಂಡಿದ್ದರು. ಆದರೆ ಆಗ ತಾನೆ ಕ್ರಿಕೆಟ್ ಆಡಲು ಆರಂಭಿಸಿದವರು ವಿಶ್ವಕಪ್ ಗೆದ್ದಂತೆ ಕನ್ನಡಿಗರು ಪಾಲಿಕೆಯ ಮಹಾಪೌರ ಹಾಗೂ ಉಪಮಹಾಪೌರರಾಗಿದ್ದಾರೆ. ಹೀಗಾಗಿ ಇದು ನಿಜಕ್ಕೂ ಸಂತಸ, ಸಂಭ್ರಮಪಡುವ ಸಂದರ್ಭವೇ.

ಆದರೆ ಇನ್ನೊಂದು ಮಗ್ಗುಲಿಗೆ ಹೊರಳಿ ನೋಡಿ. ವಿಪರೀತ ಸಂಕಟವಾಗುತ್ತದೆ. ಬೆಳಗಾವಿಯೇನು ಮಹಾರಾಷ್ಟ್ರ ದಲ್ಲಿದೆಯಾ? ಮಧ್ಯಪ್ರದೇಶದಲ್ಲಿದೆಯಾ? ಬೆಳಗಾವಿ ಮರಾಠಿಗರ ಆಸ್ತಿಯಾ? ಅಷ್ಟಕ್ಕೂ ಬೆಳಗಾವಿಯಿರುವುದು ಕನ್ನಡ ನೆಲದಲ್ಲಿ, ಕನ್ನಡನಾಡಿನಲ್ಲಿ, ಕರ್ನಾಟಕದಲ್ಲಿ ಅಲ್ಲವಾ? ಕರ್ನಾಟಕದಲ್ಲಿ ಕನ್ನಡಿಗರದೇ ಪ್ರಾಬಲ್ಯವಾಗಬೇಕು ತಾನೆ? ಅದರಲ್ಲಿ ಸಂಭ್ರಮಿಸುವುದೇನು ಬಂತು? ಅದು ತೀರಾತೀರ ಸಹಜ. ಮಹಾರಾಷ್ಟ್ರದಲ್ಲಿ ಕನ್ನಡಿಗನೊಬ್ಬ ಮಹಾಪೌರನಾದರೆ, ಕಾರ್ಪೊರೇಟರ್ ಆದರೆ, ನಾವು ಇಲ್ಲಿ ಸಂತಸಪಡಬಹುದು, ಸನ್ಮಾನ ಮಾಡಬಹುದು. ಆದರೆ ಕರ್ನಾಟಕದಲ್ಲಿ ಕನ್ನಡಿಗನೊಬ್ಬ ಗೆದ್ದರೆ ಸಂಭ್ರಮಿಸಬೇಕಾದ ಪರಿಸ್ಥಿತಿ ಉದ್ಭವವಾಗಿದೆಯೆಂದರೆ ಕನ್ನಡ ಹಾಗೂ ಕನ್ನಡಿಗನಿಗೇನಾಗಿದೆ ಎಂಬ ಪ್ರಶ್ನೆಯೂ ಉದ್ಭವವಾಗುತ್ತದೆ.

ಹಾಗೇ ನೋಡಿದರೆ ಅದು ಸಂಭ್ರಮಿಸುವ ಸಂದರ್ಭ ಅಲ್ಲವೇ ಅಲ್ಲ. ಸಂಕಟಪಡುವ ಕಾಲ. ಯಾವುದು ಸಹಜವಾಗ ಬೇಕಿತ್ತೋ, ಅದು ನಮಗೆ ಅಸಹಜವಾಗುತ್ತಿದೆ. ಯಾವುದು ನೈಸರ್ಗಿಕವಾಗಬೇಕಿತ್ತೋ, ಅದು ಅನೈಸರ್ಗಿಕವಾಗುತ್ತಿದೆ. ಕರ್ನಾಟಕದಲ್ಲಿ ಕನ್ನಡಿಗರಿಗೆ ಎಂಥ ದುರ್ಗತಿ ಬರುತ್ತಿದೆ ಯೆಂಬುದಕ್ಕೆ ಇದು ಎಚ್ಚರಿಕೆ ಗಂಟೆ!

ಕರ್ನಾಟಕದಲ್ಲಿ ಮಹಾರಾಷ್ಟ್ರದವರು ಗೆಲ್ಲುವ ವಾತಾವರಣ ನಿರ್ಮಾಣವಾದಾಗಲೇ ನಾವು ಎಚ್ಚೆತ್ತು ಕೊಳ್ಳಬೇಕಿತ್ತು. ಎಂಇಎಸ್‌ನವರು ಹೆಜ್ಜೆಹೆಜ್ಜೆಗೆ ಕನ್ನಡಿಗ ರನ್ನು ಅವಮಾನಿಸಲು ಶುರುಮಾಡಿದಾಗಲೇ ನಾವು ಎದ್ದೇಳಬೇಕಿತ್ತು. ಆಗ ನಾವು ಸುಮ್ಮನೆ ಕುಳಿತಿದ್ದರ ಫಲವಾಗಿ ಈಗ ನಮ್ಮ ಪುಟ್ಟ ಗೆಲುವು ಸಹ ದಿಗ್ವಿಜಯದಂತೆ ಕಾಣುತ್ತಿದೆ. ಕನ್ನಡದ ನೆಲದಲ್ಲಿ ಕನ್ನಡಿಗನೊಬ್ಬ ಅನ್ಯಭಾಷಿಕನ ಮುಂದೆ ಸೋತಾಗ ನಾವೇನು ಮಾಡಿದೆವು? ಏನೂ ಇಲ್ಲ. ಸರಿ, ಆ ಸೋಲಿಗೆ ಮುಂದಿನ ಸಲವಾದರೂ ಮುಯ್ಯಿ ತೀರಿಸಿಕೊಂಡೆವಾ? ಅದೂ ಇಲ್ಲ. ಆದರೆ ಈಗ, ಹದಿನೆಂಟು ವರ್ಷಗಳ ನಂತರ, ಅದನ್ನು ಮಹಾನ್ ಸಾಧನೆಯೆಂಬಂತೆ ವಿಜಯೋತ್ಸವ ಮಾಡಿ ಆಚರಿಸುತ್ತಿದ್ದೇವೆ. ಬೆಳಗಾವಿಯ ಮಹಾಪೌರರನ್ನು ಬೆಂಗಳೂರಿಗೆ ಕರೆತಂದು ಸನ್ಮಾನ ಮಾಡುವಂತೆ, ಬೇರೆ ನಗರಗಳ ಮಹಾಪೌರರನ್ನೂ ರಾಜಧಾನಿಯಲ್ಲಿ ಸನ್ಮಾನ ಮಾಡುತ್ತಿಲ್ಲವಲ್ಲ. ಹೀಗಾಗಿ ಇದು ಸಂತಸಕ್ಕಿಂತ ಸಂಕಟದ ವಿಷಯ. ಆದರೆ ಹದಿನೆಂಟು ವರ್ಷಗಳ ನಂತರವಾದರೂ ಕನ್ನಡಿಗನೊಬ್ಬ ಮಹಾಪೌರನಾಗಿದ್ದಾನಲ್ಲ ಎಂದು ಕಾಟಾಚಾರಕ್ಕೆ ಸಂತಸ ಪಡಬೇಕಷ್ಟೆ.

ಇಲ್ಲೊಂದು ಪ್ರಸಂಗ ನೆನಪಿಗೆ ಬರುತ್ತಿದೆ. ಎರಡು ವರ್ಷಗಳ ಹಿಂದೆ ಬೆಂಗಳೂರಿನ ಸ್ವಯಂಸೇವಾಸಂಸ್ಥೆಯೊಂದು ಸನ್ಮಾನ ಕಾರ್ಯಕ್ರಮವನ್ನು ಏರ್ಪಡಿಸಿತ್ತು. ಐವರು ಕಂಡಕ್ಟರ್ ಹಾಗೂ ಡ್ರೈವರ್‌ಗಳನ್ನು ಸನ್ಮಾನಿಸುವ ಕಾರ್ಯಕ್ರಮವದು. ಅವರಿಗೆ ಸನ್ಮಾನ ಯಾಕೆಂದರೆ ಅವರು ತಮ್ಮ ಇಪ್ಪತ್ತು ವರ್ಷಗಳ ಸುದೀರ್ಘ ಸೇವಾ ಅವಧಿಯಲ್ಲಿ ಇಂಗ್ಲಿಷ್ ಪದಗಳನ್ನೇ ಬಳಸಿಲ್ಲದಿರುವುದಕ್ಕೆ. ಅಂದರೆ ಅಪ್ಪಟ ಕನ್ನಡದಲ್ಲಿಯೇ ಅವರು ಮಾತಾಡುವುದರಿಂದ ಅವರ ಕನ್ನಡಪ್ರೇಮವನ್ನು ಗುರುತಿಸಿ ಪ್ರೋತ್ಸಾಹಿಸುವುದು ಉದ್ದೇಶ. ಆ ಕಂಡಕ್ಟರ್, ಡ್ರೈವರ್‌ಗಳ ಕನ್ನಡಪ್ರೀತಿಯನ್ನು ನಿಜಕ್ಕೂ ಗೌರವಿಸಬೇಕಾದುದು ಸಹಜವೇ.

ಆದರೆ ಇದರ ಇನ್ನೊಂದು ಮಗ್ಗುಲನ್ನು ಗಮನಿಸಬೇಕು. ನಮಗೆ ಯಾವನೊಬ್ಬ ಶುದ್ಧ ಕನ್ನಡದಲ್ಲಿ ಮಾತಾಡುವುದೂ ಅಚ್ಚರಿಯೆನಿಸುತ್ತದೆ. ಯಾಕೆಂದರೆ ನಮ್ಮ ಕನ್ನಡ ಕಲ್ಮಷವಾಗಿಬಿಟ್ಟಿದೆ. ಯಾಕೆಂದರೆ ನಮ್ಮ ನಾಲಗೆ ಮೇಲೆ ಇಂಗ್ಲಿಷ್ ಪದಗಳು ಬಂದು ಕುಳಿತುಬಿಟ್ಟಿವೆ. ಯಾಕೆಂದರೆ ನಮಗೆ ಮಧ್ಯೆ ಮಧ್ಯೆ ಇಂಗ್ಲಿಷ್ ಪದಗಳನ್ನು ಬಳಸದೇ ಅಥವಾ ಮಧ್ಯೆ ಮಧ್ಯೆ ಕನ್ನಡ ಪದಗಳನ್ನು ಬಳಸದೇ ಮಾತಾಡಲು ಆಗುವುದಿಲ್ಲವೆಂದು ಅನಿಸಿಬಿಟ್ಟಿದೆ. ಒಂಥರ ಎಫ್‌ಎಂ ಕನ್ನಡದಲ್ಲಿ ನಾವು ಮಾತಾಡುವುದನ್ನು ರೂಢಿಸಿಕೊಂಡುಬಿಟ್ಟಿದ್ದೇವೆ. “ಬೆಂಗಳೂರಿನ ಟ್ರಾಫಿಕ್ ಜಾಮ್‌ನಲ್ಲಿ ಲೈಫ್ ಲೀಡ್ ಮಾಡೋದೂ ಅಂದ್ರೆ ಎಷ್ಟು ಡಿಫಿಕಲ್ಟು ಅಂತೀರಾ, ಐ ಕಾಂಟ್ ಟಾಲರೇಟ್ ದಿ ಟೆನ್‌ಶನ್, ಐ ಆಮ್ ಸಿಕ್ ಆಫ್ ಬ್ಲಡಿ ಟ್ರಾಫಿಕ್" ಎಂಬ ಧಾಟಿಯಲ್ಲಿ ಮಾತುಕತೆ ಸಾಗಿರುತ್ತದೆ.

ಈ ಮಧ್ಯೆ ಯಾರಾದರೂ “ಬೆಂಗಳೂರಿನ ರಸ್ತೆ ಸಂಚಾರ ವ್ಯವಸ್ಥೆಯನ್ನು ಸುಗಮಗೊಳಿಸಲು ಸಂಚಾರಿ ಆರಕ್ಷಕ ದಳದವರು ಅಹೋರಾತ್ರಿ ಗಸ್ತು ತಿರುಗುವ ವ್ಯವಸ್ಥೆಯನ್ನು ಶೀಘ್ರವೇ ಜಾರಿಗೊಳಿಸಲು ನಿರ್ಧರಿಸಿದ್ದಾರೆ" ಎಂದು ಪರಿಶುದ್ಧ ಕನ್ನಡದಲ್ಲಿ ಮಾತಾಡಿದರೆ ನಮಗೇ ಕಸಿವಿಸಿ, ಕಿರಿಕಿರಿಯಾಗುತ್ತದೆ. ಕನ್ನಡದಲ್ಲೇ ಮಾತಾಡಬೇಕು ಎಂದು ಯಾರಾದರೂ ಕಟ್ಟಾಜ್ಞೆ ಹೊರಡಿಸಿದರೆ ಅದನ್ನು ಗತಿಯಿಲ್ಲದೇ ಪಾಲನೆ ಮಾಡಲೇಬೇಕೆಂದು ನಿರ್ಧರಿಸಿದವನ ಮಾತಿನಂತೆ ಅದು ಕೇಳುತ್ತದೆ. ಪರಿಶುದ್ಧ ಕನ್ನಡದಲ್ಲಿ ಮಾತಾಡಿದರೆ ನಮ್ಮ ಕಿವಿಗೂ ಏನೋ ಹೊಸಭಾಷೆ ಕೇಳುತ್ತಿರಬಹುದಾ ಎಂಬ ಸಂದೇಹ. ಇಂಗ್ಲಿಷ್ ಪದಗಳನ್ನು ದಂಡಿಯಾಗಿ ಬಳಸಿ ಕನ್ನಡದಲ್ಲಿ ಮಾತಾಡಿದರೆ ಎಲ್ಲರಿಗೂ ಅರ್ಥವಾಗುತ್ತದೆ, ಕನ್ನಡೇತರರಿಗೂ.

ಇನ್ನು ಕೆಲವು ಕನ್ನಡಿಗರು ಇಂಗ್ಲಿಷ್‌ನಲ್ಲಿ ಮಾತಾಡಿದರೇ ಒಳ್ಳೆಯದು ಎಂದೆನಿಸುತ್ತದೆ. ಯಾಕೆಂದರೆ ಅವರ ಕನ್ನಡ ಅಷ್ಟೊಂದು ಕೊಳಕು. ಕನ್ನಡದ ನೆತ್ತಿಯ ಮೇಲೆ ಮಾತು ಮಾತಿಗೂ ಹೊಡೆದು ಕನ್ನಡಾಂಬೆಯನ್ನು ನೋಯಿಸುತ್ತಾರಲ್ಲ ಎಂದು ಅತೀವ ಸಂಕಟವಾಗುತ್ತದೆ. ಕರ್ನಾಟಕ ರಕ್ಷಣಾ ವೇದಿಕೆಯ ನಾರಾಯಣಗೌಡರು ಮಾತಾಡಲಾರಂಭಿಸಿದರೆ ಅವರು ತಮ್ಮ ಸಂಘಟನೆಯ ಹೆಸರನ್ನು 'ಕನ್ನಡ ರಕ್ಷಣಾ ವೇದಿಕೆ" ಎಂದಿಟ್ಟುಕೊಂಡಿದ್ದರೇ ಒಳ್ಳೆಯದಿತ್ತೆಂದು ಅನಿಸುತ್ತದೆ. ಅಷ್ಟರ ಮಟ್ಟಿಗೆ ಕನ್ನಡಕ್ಕೆ ರಕ್ಷಣೆ ಸಿಗುತ್ತಿತ್ತೇನೋ? ಕಾರಣ ಅವರ ಬಾಯಲ್ಲಿ ಬಿದ್ದ ಕನ್ನಡದ ಅನೇಕ ಪದಗಳು ಬೇರೆ ರೀತಿಯಾಗಿ ಕೇಳಿಸುತ್ತವೆ. ಹಾತ್ಮೀಯ, ಹಾಂಧ್ರ, ಹಪ್ಪ, ಹಮ್ಮ, ಹಾಯ್ಕೆ ಎಂದು ಅವರು ಎಗ್ಗಿಲ್ಲದೇ ಹೇಳುವುದನ್ನು ಕೇಳಿದರೆ ಕನ್ನಡಕ್ಕೆ ಬಂದಿರುವ 'ಹಪಾಯ"ವನ್ನು ಗುರುತಿಸಬಹುದು. 'ಕನ್ನಡಕೆ ಹೋರಾಡು ಕನ್ನಡದ ಕಂದ/ಕನ್ನಡವ ಕಾಪಾಡು ಕನ್ನಡಿಗರಿಂದ" ಎಂಬ ಕವಿವಾಣಿ ನೆನಪಾಗುತ್ತದೆ.

ಇಬ್ಬರು ಕನ್ನಡಿಗರು ಮುಖಾಮುಖಿಯಾದರೆ ಸಂಭಾ ಷಣೆ ನಿರಾತಂಕವಾಗಿ ಇಂಗ್ಲಿಷಿನಲ್ಲಿ ಸಾಗುತ್ತದೆ. ಇಬ್ಬರಿಗೂ ಗೊತ್ತಿರುತ್ತದೆ, ಮತ್ತೊಬ್ಬನಿಗೆ ಕನ್ನಡ ಚೆನ್ನಾಗಿ ಬರುವುದೆಂದು. ಆದರೂ ಕನ್ನಡದಲ್ಲಿ ಮಾತಾಡುವುದಿಲ್ಲ. ಮಾತಾಡಿದರೂ ಎಫ್‌ಎಂ ಕನ್ನಡ!ಪರಿಸ್ಥಿತಿ ಹೀಗಿರುವಾಗ... ಶುದ್ಧ ಕನ್ನಡದಲ್ಲಿ ಮಾತಾಡುವುದು ಸಹ ವಿಶೇಷವೇ ಅನಿಸುತ್ತದೆ. ಅದಕ್ಕಾಗಿ ಅಂಥವರನ್ನು ಗುರುತಿಸಿ ಸನ್ಮಾನಿಸಲು ಮುಂದಾಗುತ್ತಾರೆ. ಕೊರತೆಯಿರುವುದಕ್ಕೆಲ್ಲ ಬೇಡಿಕೆ ಹೆಚ್ಚುತ್ತದೆ. ಅಪರೂಪದ ಸಾಧನೆ ಸನ್ಮಾನ ಬಯಸುತ್ತದೆ.

ಕೆಲ ವರ್ಷಗಳ ಹಿಂದೆ ಬೆಂಗಳೂರು ಮಹಾನಗರ ಪಾಲಿಕೆಗೆ ಮುಕ್ತರುನ್ನಿಸಾ ಬೇಗಂ ಎಂಬುವವರು ಮಹಾಪೌರ ರಾಗಿದ್ದರು. ಅವರಿಗೆ ಕನ್ನಡ ಮಾತಾಡಲು ಬರುತ್ತಿರಲಿಲ್ಲ. ಅರಬ್ಬಿಗಳು, ಗ್ರೀಕರು ಎರಡು ದಿನದ ಕನ್ನಡ "crash" ಕೋರ್ಸ್ ಮಾಡಿದರೆ ಹೇಗೆ ಮಾತಾಡಬಹುದೋ ಆ ರೀತಿ ಅವರು ಕನ್ನಡದಲ್ಲಿ ಮಾತಾಡುತ್ತಿದ್ದರು. ಕನ್ನಡದ ರಾಜಧಾನಿಯಲ್ಲಿ ಮೊದಲ ಪ್ರಜೆಯ ಭಾಷೆಯೇ ಹಾಗಿದ್ದರೆ ಏನಾಗಬಹುದು? ಬೆಳಗಾವಿಯಂತೆ ಬೆಂಗಳೂರಿನಲ್ಲಿ ಪರಿಸ್ಥಿತಿ ಭಿನ್ನವಾಗಿಲ್ಲ. ಇಲ್ಲಿ ಆರಿಸಿ ಬರುವ ಬಹುತೇಕ ಕಾರ್ಪೊರೇಟರ್‌ಗಳು ಕನ್ನಡೇತರರೇ. ಮುಂದೊಂದು ದಿನ ಬರುತ್ತದೆ, ಬೆಂಗಳೂರಿನ ಮಹಾಪೌರರು ಕನ್ನಡಿಗರು ಎಂಬ ಕಾರಣಕ್ಕೆ ಸನ್ಮಾನ ಮಾಡುವ ಪರಿಸ್ಥಿತಿ!

ಬೆಳಗಾವಿ ಮಹಾರಾಷ್ಟ್ರದಲ್ಲಿ ಇದ್ದಿದ್ದರೆ, ಆಗ ಅಲ್ಲಿನ ಪಾಲಿಕೆಗೆ ಕನ್ನಡಿಗರು ಮಹಾಪೌರರಾದರೆ ಸನ್ಮಾನ ಮಾಡುವುದು ಸರಿ. ಕನ್ನಡ ನಾಡಲ್ಲಿ ಕನ್ನಡಿಗರಿಗೆ ಸನ್ಮಾನ ಮಾಡುವಂಥ ಕಾಲ ಬಂದರೆ ಕನ್ನಡದ, ಕನ್ನಡಿಗರ ಮಾನಕ್ಕೇನಾಗಿದೆ?

(ಸ್ನೇಹಸೇತು : ವಿಜಯಕರ್ನಾಟಕ)

ಕನ್ನಡ ಮ್ಯಾಟ್ರಿಮೋನಿಯಲ್ಲಿ - ಉಚಿತ ನೋಂದಣಿ !

ತಾಜಾ ಸುದ್ದಿ ತಕ್ಷಣ ಪಡೆಯಿರಿ
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X
We use cookies to ensure that we give you the best experience on our website. This includes cookies from third party social media websites and ad networks. Such third party cookies may track your use on Oneindia sites for better rendering. Our partners use cookies to ensure we show you advertising that is relevant to you. If you continue without changing your settings, we'll assume that you are happy to receive all cookies on Oneindia website. However, you can change your cookie settings at any time. Learn more