ಶೀಘ್ರವೇ ಆನ್ ಲೈನ್ ಸೇವೆಗೆ ತೆರೆದುಕೊಳ್ಳಲಿರುವ ಮಿಲಿಟರಿ ಕ್ಯಾಂಟೀನ್!
ಸೇನಾ ಕ್ಯಾಂಟೀನ್ ಗಳು ಇನ್ನು ಆನ್ ಲೈನ್ ಗೆ. ಶೀಘ್ರದಲ್ಲೇ ಅಂತರ್ಜಾಲದಲ್ಲಿ ಸೇವೆ ಆರಂಭಿಸಲು ಕ್ಯಾಂಟೀನ್ ಸ್ಟೋರ್ಸ್ ಇಲಾಖೆ ನಿರ್ಧಾರ.
ನವದೆಹಲಿ, ಆಗಸ್ಟ್ 16: ರಿಯಾಯಿತಿ ದರಗಳಲ್ಲಿ ಗೃಹೋಪಯೋಗಿ ವಸ್ತುಗಳು, ದಿನಿಸುಗಳನ್ನು ಮಾರಾಟ ಮಾಡುವ ಮೂಲಕ ಮಿಲಿಟರಿ ಕ್ಯಾಂಟೀನ್ ಗಳು ಇನ್ನು ಆನ್ ಲೈನ್ ನಲ್ಲಿ ತನ್ನ ಸೇವೆಯನ್ನು ಆರಂಭಿಸಲಿದೆ. ಮಿಲಿಟರಿ ಕ್ಯಾಂಟೀನ್ ಗಳಿಗೆ ಸಾಮಾನು, ಸರಬರಾಜು ಮಾಡುವ ಕ್ಯಾಂಟೀನ್ ಸ್ಟೋರ್ಸ್ ಇಲಾಖೆಯು (ಸಿಎಸ್ ಡಿ) ಈ ವಿಚಾರವನ್ನು ಪ್ರಕಟಿಸಿದೆ.
ಭೂಸೇನೆ, ವಾಯು ಸೇನೆ ಹಾಗೂ ನೌಕಾಪಡೆಗಳ ಸುಮಾರು 1.2 ಕೋಟಿ ಗ್ರಾಹಕರಿಗೆ ಈವರೆಗೆ ತನ್ನ ಸಂಸ್ಥಾಪಿತ ಮಿಲಿಟರಿ ಕ್ಯಾಂಟೀನ್ ಗಳ ಮೂಲಕ ಸಾಮಗ್ರಿಗಳನ್ನು ಸರಬರಾಜು ಮಾಡುತ್ತಿದ್ದ ಈ ಇಲಾಖೆಯು, ಬದಲಾದ ಮಾರುಕಟ್ಟೆಗೆ ತಕ್ಕಂತೆ ಹೊಂದಿಕೊಳ್ಳಲು ನಿರ್ಧರಿಸಲಾಗಿದೆ.
ಭಾರತದ ಅತಿ ಹೆಚ್ಚಾದ ರಿಟೇಲ್ ನೆಟ್ ವರ್ಕ್ ಎಂದೇ ಪರಿಗಣಿಸಲ್ಪಟ್ಟಿರುವ ಸಿಎಸ್ ಡಿ ಸಂಸ್ಥೆಯು ದೇಶಾದ್ಯಂತ ಸುಮಾರು 17 ಸಾವಿರ ಕೋಟಿ ರು.ಗಳ ವ್ಯವಹಾರ ನಡೆಸುತ್ತದೆ. ಇದೀಗ, ಈ ವ್ಯವಸ್ಥೆಯನ್ನು ವಿಸ್ತರಿಸುವ ಮೂಲಕ ಆನ್ ಲೈನ್ ನಲ್ಲೂ ಸಾಮಗ್ರಿಗಳನ್ನು ಮಾರಾಟ ಮಾಡಲು ತೀರ್ಮಾನಿಸಿರುವುದಾಗಿ ಅದು ಹೇಳಿದೆ.
ಈ ಕುರಿತಂತೆ, ಭಾರತದ ಜನಪ್ರಿಯ ಬ್ರಾಂಡ್ ಗಳಾದ ಹಿಂದೂಸ್ತಾನ್ ಯೂನಿಲಿವರ್, ಪ್ರಾಕ್ಟರ್ ಆ್ಯಂಡ್ ಗ್ಯಾಂಬೆಲ್ ಮುಂತಾದ ಸಂಸ್ಥೆಗಳೊಂದಿಗೆ ಮಾತುಕತೆ ಸಾಗಿದ್ದು, ಶೀಘ್ರವೇ ಆನ್ ಲೈನ್ ಸೇವೆಗೆ ಸಜ್ಜಾಗಲಿದೆ ಎಂದು ಸಿಎಸ್ ಡಿಯ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.