ಕರ್ನಾಟಕದ ಈ ವಂದೇ ಭಾರತ್ ರೈಲಿಗೆ 8 ಬೋಗಿ ಸೇರ್ಪಡೆ

ಮಂಗಳೂರು, ಮೇ 12: ಕರ್ನಾಟಕದ ಕರಾವಳಿಗೆ ಆಗಮಿಸುವ ವಂದೇ ಭಾರತ್ ರೈಲಿಗೆ ಇನ್ನೂ 8 ಬೋಗಿಯನ್ನು ಅಳವಡಿಕೆ ಮಾಡಲಾಗುತ್ತದೆ. ತಿರುವನಂತಪುರಂ ಸೆಂಟ್ರಲ್-ಮಂಗಳೂರು ಸೆಂಟ್ರಲ್ ನಡುವಿನ ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲು ಮೇ 22ರಿಂದ 16 ಬೋಗಿಯ ರೈಲಾಗಿ ಸಂಚಾರವನ್ನು ನಡೆಸಲಿದೆ. ಭಾರತದಲ್ಲಿ ಅತಿ ಹೆಚ್ಚು ಪ್ರಯಾಣಿಕರ ಬೇಡಿಕೆ ಇರುವ ವಂದೇ ಭಾರತ್ ರೈಲುಗಳಲ್ಲಿ ಕರ್ನಾಟಕ ಮತ್ತು ಕೇರಳ ಸಂಪರ್ಕಿಸುವ ಈ ರೈಲು ಸಹ ಒಂದಾಗಿದೆ.

ದಕ್ಷಿಣ ರೈಲ್ವೆ ತಿರುವನಂತಪುರಂ ಸೆಂಟ್ರಲ್-ಮಂಗಳೂರು ಸೆಂಟ್ರಲ್ ನಡುವೆ 20631/ 632 ಸಂಖ್ಯೆಯ ವಂದೇ ಭಾರತ್ ರೈಲನ್ನು ಓಡಿಸುತ್ತಿದೆ. ಸದ್ಯ ರೈಲು 8 ಬೋಗಿಯನ್ನು ಒಳಗೊಂಡಿದೆ. ಆದರೆ ಈ ರೈಲಿಗೆ ಭಾರೀ ಬೇಡಿಕೆ ಇದೆ. ಆದ್ದರಿಂದ ಪ್ರಯಾಣಿಕರ ಬೇಡಿಕೆಯಂತೆ ರೈಲಿಗೆ ಇನ್ನೂ 8 ಬೋಗಿ ಸೇರಿಸಲಾಗುತ್ತಿದೆ.

ಮೇ 22ರಿಂದ ಈ ರೈಲು 16 ಬೋಗಿಯ ರೈಲಾಗಿ ಸಂಚಾರವನ್ನು ನಡೆಸಲಿದೆ. ಈ ಮೂಲಕ ಕೇರಳ ರಾಜ್ಯದಲ್ಲಿ ಸಂಚಾರ ನಡೆಸುತ್ತಿರುವ ಎರಡು ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲುಗಳು 16 ಬೋಗಿಯ ರೈಲು ಆದಂತೆ ಆಗಿದೆ. ಬೋಗಿಯ ಸಂಖ್ಯೆ ಹೆಚ್ಚಳ ಬಿಟ್ಟರೆ ನಿಲ್ದಾಣ, ವೇಳಾಪಟ್ಟಿಯಲ್ಲಿ ಯಾವುದೇ ಬದಲಾವಣೆ ಇರುವುದಿಲ್ಲ ಎಂದು ರೈಲ್ವೆ ಇಲಾಖೆ ಸ್ಪಷ್ಟಪಡಿಸಿದೆ.

ಈ ರೈಲು ಮಂಗಳೂರು ಸೆಂಟ್ರಲ್‌ನಿಂದ ಬೆಳಗ್ಗೆ 6.25ಕ್ಕೆ ಹೊರಡಲಿದೆ ಮತ್ತು ತಿರುವನಂತಪುರಂಗೆ 3.05ಕ್ಕೆ ತಲುಪಲಿದೆ. 620 ಕಿ. ಮೀ. ದೂರವನ್ನು ರೈಲು 8.40 ಗಂಟೆಯಲ್ಲಿ ಕ್ರಮಿಸಲಿದೆ. ಈ ರೈಲಿನ ಸರಾಸರಿ ವೇಗ ಗಂಟೆಗೆ 72 ಕಿ. ಮೀ. ವೇಗದಲ್ಲಿ ಸಂಚಾರವನ್ನು ನಡೆಸಲಿದೆ.

ರೈಲು ತಿರುವನಂತಪುರಂನಿಂದ ರೈಲು ಸಂಖ್ಯೆ 20632 ಸಂಜೆ 4.05ಕ್ಕೆ ಹೊರಡಲಿದೆ. ಮಧ್ಯರಾತ್ರಿ 12.40ಕ್ಕೆ ಮಂಗಳೂರು ಸೆಂಟ್ರಲ್ ತಲುಪಲಿದೆ. ರೈಲು 8.35 ಗಂಟೆಗಳಲ್ಲಿ ಉಭಯ ನಗರವನ್ನು ಸಂಪರ್ಕಿಸಲಿದೆ. ಈ ರೈಲು ಬುಧವಾರ ಹೊರತುಪಡಿಸಿ ವಾರದ ಎಲ್ಲಾ ದಿನ ಸಂಚಾರವನ್ನು ನಡೆಸುತ್ತದೆ.

ಮಂಗಳೂರು ಸೆಂಟ್ರಲ್-ತಿರುವನಂತಪುರಂ ನಡುವೆ ಚೇರ್ ಕಾರ್‌ ದರ 1,615 ರೂ. ಆಗಿದೆ. ಎಕ್ಸಿಕ್ಯುಟಿವ್ ಕ್ಲಾಸ್‌ ದರ 2,945 ರೂ. ಆಗಿದೆ. ತಿರುವನಂತಪುರಂ-ಮಂಗಳೂರು ನಡುವಿನ ದರ ಚೇರ್‌ ಕಾರ್ 1,575 ರೂ. ಮತ್ತು ಎಕ್ಸಿಕ್ಯುಟಿವ್ ಕ್ಲಾಸ್ ದರ 2,910 ರೂ. ಆಗಿದೆ.

ಮಂಗಳೂರು-ತಿರುವನಂತಪುರಂ ನಡುವೆ ಎಕ್ಸ್‌ಪ್ರೆಸ್ ರೈಲುಗಳು ಸಂಚಾರ ನಡೆಸಲು 13 ಗಂಟೆ ತೆಗೆದುಕೊಳ್ಳುತ್ತದೆ. ಆದರೆ ವಂದೇ ಭಾರತ್ ಎಕ್ಸ್‌ಪ್ರೆಸ್ ಸುಮಾರು 9 ಗಂಟೆಯಲ್ಲಿ ಸಂಪರ್ಕ ಕಲ್ಪಿಸುತ್ತದೆ. ಆದ್ದರಿಂದ ಈ ರೈಲಿಗೆ ಬೇಡಿಕೆ ಹೆಚ್ಚಾಗಿದೆ.

ಮೊದಲು ಈ ರೈಲು ಕೇರಳದಲ್ಲಿ ಮಾತ್ರ ಸಂಚಾರವನ್ನು ನಡೆಸುತ್ತಿತ್ತು. ತಿರುವನಂತಪುರಂ-ಕಾಸರಗೋಡು-ತಿರುವನಂತಪುರಂ ನಡುವೆ ಓಡುತ್ತಿತ್ತು. ಈ ರೈಲನ್ನು ಮಂಗಳೂರು ತನಕ ವಿಸ್ತರಣೆ ಮಾಡಿ ಎಂದು ಇಲಾಖೆಗೆ ಬೇಡಿಕೆ ಸಲ್ಲಿಕೆ ಮಾಡಲಾಗಿತ್ತು. ಮಾರ್ಚ್ 13, 2024ರಂದು ಈ ರೈಲನ್ನು ಮಂಗಳೂರು ತನಕ ವಿಸ್ತರಣೆ ಮಾಡಲಾಗಿತ್ತು.

ಬೋಗಿಗಳ ವಿಚಾರಕ್ಕೆ ಬಂದರೆ ಈ ರೈಲು ಪ್ರಸ್ತುತ 8 ಬೋಗಿಯನ್ನು ಹೊಂದಿದೆ. ಅದರಲ್ಲಿ ಒಂದು ಎಕ್ಸಿಕ್ಯುಟಿವ್ ಕ್ಲಾಸ್, 7 ಚೇರ್‌ ಕಾರ್‌ಗಳನ್ನು ಹೊಂದಿದೆ. 16 ಬೋಗಿಯಾಗಿ ರೈಲು ಬದಲಾದ ಬಳಿಕ 14 ಚೇರ್‌ ಕಾರ್ ಮತ್ತು 2 ಎಕ್ಸಿಕ್ಯುಟಿವ್ ಕ್ಲಾಸ್ ಬೋಗಿಯನ್ನು ರೈಲು ಹೊಂದಲಿದೆ. ಸದ್ಯ ಚೇರ್‌ ಕಾರ್‌ಗಳಲ್ಲಿ 530 ಪ್ರಯಾಣಿಕರು ಸಂಚಾರ ನಡೆಸಬಹುದು. ಬೋಗಿ ಸಂಖ್ಯೆ ಅಧಿಕವಾದ ಬಳಿಕ 1,128 ಪ್ರಯಾಣಿಕರ ಸಂಚರಿಸಬಹುದು.

English summary

Southern Railway said that Thiruvananthapuram Central and Mangaluru Central Vande Bharat express train will run with 16 coaches from May 22.