“ಪರ್ವತಗಳ ರಾಣಿ” ಎಂದೇ ಖ್ಯಾತಿ ಪಡೆದಿರುವ ನಗರ ಯಾವುದು? ಮಸ್ಸೂರಿ ಕುರಿತು ವಿಶೇಷ ಮಾಹಿತಿ
ಉತ್ತರಾಖಂಡದ ಗಢ್ವಾಲ್ ಹಿಮಾಲಯದ ಮಡಿಲಿನಲ್ಲಿ ನೆಲೆಸಿರುವ ಮಸ್ಸೂರಿ ನಗರವನ್ನು ಭಾರತದಲ್ಲಿ "ಪರ್ವತಗಳ ರಾಣಿ" ಎಂದೇ ಕರೆಯಲಾಗುತ್ತದೆ. ಸಮುದ್ರ ಮಟ್ಟದಿಂದ ಸುಮಾರು 2005 ಅಡಿ ಎತ್ತರದಲ್ಲಿರುವ ಈ ಸುಂದರ ಗಿರಿಧಾಮವು, ಒಂದು ಕಡೆ ದೂನ್ ಕಣಿವೆಯ ವಿಶಾಲ ದೃಶ್ಯವನ್ನೂ ಮತ್ತೊಂದು ಕಡೆ ಹಿಮಾಚ್ಛಾದಿತ ಹಿಮಾಲಯ ಪರ್ವತಗಳ ಮನಮೋಹಕ ನೋಟವನ್ನೂ ನೀಡುತ್ತದೆ. ಮಂಜುಮಯ ಮುಂಜಾನೆ, ಹಸಿರು ಪೈನ್ ಮರಗಳಿಂದ ಅಲಂಕೃತವಾದ ರಸ್ತೆಗಳು ಮತ್ತು ಶಾಂತ ವಾತಾವರಣವು ಮಸ್ಸೂರಿಯನ್ನು ಪ್ರವಾಸಿಗರ ಪ್ರಿಯ ತಾಣವಾಗಿಸಿದೆ.
ಬ್ರಿಟಿಷ್ ಕಾಲದಿಂದ ಆರಂಭವಾದ ಮಸ್ಸೂರಿಯ ಇತಿಹಾಸ
ಬ್ರಿಟಿಷರ ಕಾಲದ ನೆನಪುಗಳನ್ನು ಇಂದಿಗೂ ತನ್ನ ಮಡಿಲಲ್ಲಿ ಹೊತ್ತು ನಿಂತಿರುವ ಮಸ್ಸೂರಿ, ಇತಿಹಾಸ ಮತ್ತು ಪ್ರಕೃತಿಯ ಒಂದು ಸುಂದರ ಸಂಗಮ. ಇಲ್ಲಿನ ಹಳೆಯ ವಾಸ್ತುಶೈಲಿಯ ಕಟ್ಟಡಗಳು ಹಾಗೂ ಕಾಲೋನಿಯಲ್ ಕಾಲದ ವೈಭವವು ಪ್ರವಾಸಿಗರನ್ನು ಅಂದಿನ ಕಾಲಕ್ಕೆ ಕರೆದೊಯ್ಯುತ್ತವೆ. ಹಸಿರ ಸಿರಿಯ ನಡುವೆ ಮೈದಳೆದಿರುವ ಈ ಗಿರಿಧಾಮವು ತನ್ನ ಪುರಾತನ ಸೊಬಗನ್ನು ಇಂದಿಗೂ ಮಸುಕಾಗದಂತೆ ಕಾಪಾಡಿಕೊಂಡಿದೆ.
ಮಸ್ಸೂರಿಯ ಪ್ರಮುಖ ಪ್ರವಾಸಿ ಆಕರ್ಷಣೆಗಳು
ಮಸ್ಸೂರಿಯ ಪ್ರಮುಖ ಆಕರ್ಷಣೆಗಳಲ್ಲಿ ಕ್ಯಾಮೆಲ್ಸ್ ಬ್ಯಾಕ್ ರಸ್ತೆ ಪ್ರಮುಖವಾಗಿದೆ. ನಿರಾಳವಾಗಿ ನಡೆದುಕೊಂಡು ಹೋಗಲು ಸೂಕ್ತವಾದ ಈ ರಸ್ತೆ, ಪ್ರವಾಸಿಗರಿಗೆ ಹೊಸ ಅನುಭವ ಕೊಡುತ್ತದೆ. ಲ್ಯಾಂಡೌರ್ ಪ್ರದೇಶವು ಹಳೆಯ ಕಾಲದ ಶಾಂತ ವಾತಾವರಣ ಮತ್ತು ಕಾಫೆಗಳಿಗೆ ಪ್ರಸಿದ್ಧವಾಗಿದ್ದು, ಸೇಂಟ್ ಪಾಲ್ಸ್ ಚರ್ಚ್ ಮಸ್ಸೂರಿಯ ಇತಿಹಾಸದ ನೆನಪನ್ನು ಉಳಿಸಿಕೊಂಡಿದೆ.
ಮಾಲ್ ರಸ್ತೆ ಮತ್ತು ಸ್ಥಳೀಯ ಅನುಭವಗಳು
ನಗರದ ಹೃದಯಭಾಗವಾಗಿರುವ ಮಾಲ್ ರಸ್ತೆ ದಿನವಿಡೀ ಜನಜಂಗುಳಿಯಿಂದ ಕಂಗೊಳಿಸುತ್ತದೆ. ಪ್ರಮುಖ ವಾಣಿಜ್ಯ ಮತ್ತು ಪ್ರವಾಸಿಗರ ಬೀದಿಯಾಗಿದೆ. ಇಲ್ಲಿ ಸ್ಥಳೀಯ ತಿಂಡಿಗಳು, ಕೈತಯಾರಿಕೆ ವಸ್ತುಗಳು ಮತ್ತು ಉಣ್ಣೆಯ ಬಟ್ಟೆಗಳು ಪ್ರವಾಸಿಗರನ್ನು ಆಕರ್ಷಿಸುತ್ತವೆ. ಸಂಜೆ ಸಮಯದಲ್ಲಿ ಪರ್ವತಗಳ ದೃಶ್ಯವನ್ನು ನೋಡುತ್ತಾ ನಡೆದು ಹೋಗುವುದು ವಿಶೇಷ ಅನುಭವ.
ಮಸ್ಸೂರಿಯ ಅತ್ಯಂತ ಜನಪ್ರಿಯ ಜಲಪಾತ
ಮಸ್ಸೂರಿಯ ಪ್ರವಾಸೋದ್ಯಮದ ಕಿರೀಟಕ್ಕೆ ಕೆಂಪ್ಟಿ ಫಾಲ್ಸ್ ಒಂದು ಸುಂದರ ರತ್ನದಂತಿದೆ. ಸಮುದ್ರ ಮಟ್ಟದಿಂದ 4500 ಅಡಿ ಎತ್ತರದಲ್ಲಿದೆ. ಇದು 40 ಅಡಿ ಎತ್ತರದಿಂದ ಧುಮುಕುವ ಸುಂದರವಾದ ಜಲಪಾತವಾಗಿದೆ. ಇಲ್ಲಿನ ಧುಮ್ಮಿಕ್ಕುವ ನೀರು ಕಲ್ಲುಗಳ ನಡುವೆ ನೈಸರ್ಗಿಕ ಕೊಳಗಳನ್ನು ಸೃಷ್ಟಿಸಿದ್ದು, ಬೇಸಿಗೆಯ ಬಿಸಿಲಿನಿಂದ ಪಾರಾಗಲು ಪ್ರವಾಸಿಗರಿಗೆ ಇದು ನೆಚ್ಚಿನ ತಾಣ. ಇನ್ನು ಎತ್ತರದ ಲಾಲ್ ಟಿಬ್ಬಾದಿಂದ ಹಿಮಾಲಯದ ಹಿಮಚ್ಛಾದಿತ ಶಿಖರಗಳನ್ನು ಕಣ್ತುಂಬಿಕೊಳ್ಳುವುದೇ ಒಂದು ಸಂಭ್ರಮ. ಈ ಜಲಪಾತವನ್ನು 1835ರಲ್ಲಿ ಬ್ರಿಟಿಷ್ ಅಧಿಕಾರಿ ಜಾನ್ ಮೆಕಿನಾನ್ ಅವರು ಪ್ರವಾಸಿ ತಾಣವಾಗಿ ಕಂಡುಹಿಡಿದರು.
ಮಸ್ಸೂರಿಗೆ ಭೇಟಿ ನೀಡಲು ಉತ್ತಮ ಕಾಲ ಮಾರ್ಚ್ ರಿಂದ ಜೂನ್, ಜುಲೈ ರಿಂದ ಸೆಪ್ಟೆಂಬರ್ ಮತ್ತು ಚಳಿಗಾಲದ ಅಕ್ಟೋಬರ್ ರಿಂದ ಫೆಬ್ರವರಿ. ಚಳಿಗಾಲದಲ್ಲಿ ಕೆಲವೊಮ್ಮೆ ಹಿಮಪಾತವೂ ಸಂಭವಿಸುತ್ತದೆ.
ಸೂಚನೆ: ಈ ಲೇಖನದಲ್ಲಿನ ಮಾಹಿತಿ ಸಾಮಾನ್ಯ ಜ್ಞಾನ ಮತ್ತು ಪ್ರವಾಸಿ ಉದ್ದೇಶಕ್ಕಾಗಿ ಮಾತ್ರ.
Click it and Unblock the Notifications
Sign in with Google