ಗೋವಾ ಪ್ರವಾಸಕ್ಕೆ ಹೊರಟಿದ್ದೀರಾ, ಇಲ್ಲಿದೆ ಸರ್ಕಾರದ ಹೊಸ ರೂಲ್ಸ್‌

ಮುಂದಿನ ಬಾರಿ ನೀವು ಗೋವಾಕ್ಕೆ ಪ್ರವಾಸಕ್ಕೆಂದು ಹೋದಾಗ ಇತರ ಪ್ರವಾಸಿಗರೊಂದಿಗೆ ಸೆಲ್ಫಿ ತೆಗೆದುಕೊಳ್ಳಲು ಅಥವಾ ಅವರ ಚಿತ್ರಗಳನ್ನು ಕ್ಲಿಕ್ ಮಾಡುವಂತಿಲ್ಲ. ಇದು ಗೌಪ್ಯತೆಯನ್ನು ಗೌರವಿಸುವ ಸಲುವಾಗಿ ಸೆಲ್ಫಿ ಕ್ಲಿಕ್ಕಿಸುಕೊಳ್ಳುವ ಮೊದಲು ಅವರ ಅನುಮತಿ ಪಡೆಯುವುದು ಕಡ್ಡಾಯ

ಪಣಜಿ, ಜನವರಿ 28: ಗೋವಾ ಭಾರತ ಮಾತ್ರವಲ್ಲದೆ ವಿದೇಶಿತರಿಗೂ ನೆಚ್ಚಿನ ಪ್ರವಾಸಿ ತಾಣ. ಹೀಗಾಗಿ ಪ್ರವಾಸ ಸ್ಥಳದಲ್ಲಿ ನಡೆಯಬಹುದಾದ ಅಹಿತಕರ ಘಟನೆಯನ್ನು ತಡೆಗಟ್ಟಲು ಅಲ್ಲಿನ ಪ್ರವಾಸೋದ್ಯಮ ಇಲಾಖೆ ಕೆಲವು ಸೂಚನೆಗಳನ್ನು ನೀಡಿದೆ.

ಮುಂದಿನ ಬಾರಿ ನೀವು ಗೋವಾಕ್ಕೆ ಪ್ರವಾಸಕ್ಕೆಂದು ಹೋದಾಗ ಇತರ ಪ್ರವಾಸಿಗರೊಂದಿಗೆ ಸೆಲ್ಫಿ ತೆಗೆದುಕೊಳ್ಳಲು ಅಥವಾ ಅವರ ಚಿತ್ರಗಳನ್ನು ಕ್ಲಿಕ್ ಮಾಡುವಂತಿಲ್ಲ. ಇದು ಗೌಪ್ಯತೆಯನ್ನು ಗೌರವಿಸುವ ಸಲುವಾಗಿ ಸೆಲ್ಫಿ ಕ್ಲಿಕ್ಕಿಸುಕೊಳ್ಳುವ ಮೊದಲು ಅವರ ಅನುಮತಿಯನ್ನು ತೆಗೆದುಕೊಳ್ಳಿ ಎಂದು ಗೋವಾ ಸರ್ಕಾರ ನಿರ್ದೇಶನ ನೀಡಿದೆ.

ಈ ಸೂಚನೆಯು ಗೋವಾ ಪ್ರವಾಸೋದ್ಯಮ ಇಲಾಖೆಯು ಪ್ರವಾಸಿಗರಿಗೆ ನೀಡಿದ ಮತ್ತೊಂದು ಸಲಹೆಯಾಗಿದೆ. ಸರ್ಕಾರದ ಈ ನಿರ್ದೇಶನವು ಪ್ರಯಾಣಿಕರ ಗೌಪ್ಯತೆಯನ್ನು ರಕ್ಷಿಸಲು, ಅವರ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು ಮತ್ತು ಯಾವುದೇ ಅಹಿತಕರ ಘಟನೆಗಳಿಂದ ಮೋಸ ಹೋಗುವುದನ್ನು ತಪ್ಪಿಸಲು ಎಂದು ತಿಳಿಸಲಾಗಿದೆ.

ಇತರ ಪ್ರವಾಸಿಗರು, ಅಪರಿಚಿತರ ಅನುಮತಿಯಿಲ್ಲದೆ ಸೆಲ್ಫಿ ಮತ್ತು ಛಾಯಾಚಿತ್ರಗಳನ್ನು ತೆಗೆದುಕೊಳ್ಳಬೇಡಿ. ವಿಶೇಷವಾಗಿ ಸೂರ್ಯನ ಸ್ನಾನ ಮಾಡುವಾಗ ಅಥವಾ ಸಮುದ್ರದಲ್ಲಿ ಈಜುವಾಗ ಅವರ ಗೌಪ್ಯತೆಯನ್ನು ಗೌರವಿಸಲು ಸಹಕರಿಸಬೇಕು ಎಂದು ಗುರುವಾರ ಹೊರಡಿಸಿದ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.

ಅಪಘಾತಗಳನ್ನು ತಪ್ಪಿಸಲು ಕಡಿದಾದ ಬಂಡೆಗಳು ಮತ್ತು ಸಮುದ್ರ ಬಂಡೆಗಳಂತಹ ಅಪಾಯಕಾರಿ ಸ್ಥಳಗಳಲ್ಲಿ ಪ್ರವಾಸಿಗರು ಸೆಲ್ಫಿ ತೆಗೆದುಕೊಳ್ಳುವುದನ್ನು ನಿಷೇಧಿಸಲಾಗಿದೆ. ಪ್ರವಾಸೋದ್ಯಮಕ್ಕೆ ಸಂಬಂಧಿಸಿದ ಹಲವಾರು ಇತರ ಸಮಸ್ಯೆಗಳನ್ನು ತೋರಿಸಲಾಗಿದೆ. ಕರಾವಳಿ ರಾಜ್ಯವಾದ ಗೋವಾಕ್ಕೆ ಭೇಟಿ ನೀಡುವ ಪ್ರಯಾಣಿಕರು ಗೀಚುಬರಹವನ್ನು ಬರೆಯುವ ಮೂಲಕ ಪಾರಂಪರಿಕ ತಾಣಗಳನ್ನು ನಾಶಪಡಿಸಬೇಡಿ ಅಥವಾ ಹಾನಿ ಮಾಡಬೇಡಿ ಅಥವಾ ಇತರ ರೀತಿಯ ಕೃತ್ಯಗಳನ್ನು ಸ್ಮಾರಕಗಳ ಬಳಿ ಮಾಡಬೇಡಿ ಎಂದು ಇಲಾಖೆ ಸಲಹೆ ನೀಡಿದೆ.

ಅಕ್ರಮವಾಗಿರುವ ಖಾಸಗಿ ಟ್ಯಾಕ್ಸಿಗಳನ್ನು ಬಾಡಿಗೆಗೆ ಪಡೆಯಬೇಡಿ. ಮಿತಿಮೀರಿದ ಶುಲ್ಕವನ್ನು ತಪ್ಪಿಸಲು ಮೀಟರ್ ದರವನ್ನು ಹಾಕುವಂತೆ ಒತ್ತಾಯಿಸಿ ಎಂದಿರುವ ಪ್ರವಾಸೋದ್ಯಮ ಇಲಾಖೆ ಎಲ್ಲಾ ನಿಯಮಗಳನ್ನು ಶ್ರದ್ಧೆಯಿಂದ ಪಾಲಿಸುವಂತೆ ಕೇಳಿಕೊಂಡಿದ್ದಾರೆ. ಪ್ರವಾಸೋದ್ಯಮ ಇಲಾಖೆಯಲ್ಲಿ ನೋಂದಾಯಿಸಲಾದ ಕಾನೂನುಬದ್ಧ ಹೋಟೆಲ್‌ಗಳು, ವಿಲ್ಲಾಗಳು ಅಥವಾ ವಸತಿ ಸೌಲಭ್ಯಗಳೊಂದಿಗೆ ವಸತಿಗಳನ್ನು ಕಾಯ್ದಿರಿಸುವಂತೆ ಇದು ಪ್ರಯಾಣಿಕರಿಗೆ ಸಲಹೆ ನೀಡಿದೆ.

ಮದ್ಯ ಸೇವಿಸುವಾಗ ಜವಬ್ದಾರಿ ಇರಲಿ

ಬೀಚ್‌ಗಳು, ಇತ್ಯಾದಿ ತೆರೆದ ಪ್ರದೇಶಗಳಲ್ಲಿ ಮದ್ಯಪಾನವನ್ನು ನಿಷೇಧಿಸಲಾಗಿದೆ. ಅಲ್ಲದೆ ಶಿಕ್ಷಾರ್ಹ ಅಪರಾಧವಾಗಿದೆ. ಆದಾಗ್ಯೂ, ಕಾನೂನುಬದ್ಧವಾಗಿ ಪರವಾನಗಿ ಪಡೆದ ಆವರಣಗಳು, ರೆಸ್ಟೋರೆಂಟ್‌ಗಳು, ಹೋಟೆಲ್‌ಗಳು ಇತ್ಯಾದಿಗಳಲ್ಲಿ ಮದ್ಯವನ್ನು ತಮ್ಮ ಇಚ್ಚೆಯಂತೆ ಜವಾಬ್ದಾರಿಯಿಂದ ಸೇವಿಸಬಹುದು ಎಂದು ತಿಳಿಸಲಾಗಿದೆ.

ನೋಂದಣಿಯಾಗಿಲ್ಲದ ಕ್ಯಾಬ್‌ ಬಳಸಬೇಡಿ

ಭಾರತ ಮತ್ತು ವಿದೇಶಗಳಿಂದ ಪ್ರತಿವರ್ಷ ಲಕ್ಷಗಟ್ಟಲೆ ಪ್ರವಾಸಕ್ಕೆ ಬರುವ ಪ್ರವಾಸಿಗರು ಗೋವಾದಲ್ಲಿ ಮಾನ್ಯ ಪರವಾನಗಿ ಇಲ್ಲದ ಖಾಸಗಿ ವಾಹನಗಳನ್ನು ಬಾಡಿಗೆಗೆ ಪಡೆಯುವುದನ್ನು ತಡೆಯಬೇಕು. ಸಾರಿಗೆ ಇಲಾಖೆಯಲ್ಲಿ ನೋಂದಣಿಯಾಗಿಲ್ಲದ ಕ್ಯಾಬ್‌ಗಳು, ಮೋಟರ್‌ಬೈಕ್‌ಗಳನ್ನು ಬಾಡಿಗೆಗೆ ಪಡೆಯಬಾರದು ಎಂದು ಇಲಾಖೆ ತಿಳಿಸಿದೆ.

ನೋಂದಾಯಿತ ಟ್ರಾವೆಲ್ ಏಜೆಂಟ್‌ ಬಳಸಿ

ವಾಟರ್ ಸ್ಪೋರ್ಟ್ಸ್ ಮತ್ತು ರಿವರ್ ಕ್ರೂಸ್‌ಗಳನ್ನು ಕಾಯ್ದಿರಿಸಲು ಪ್ರವಾಸಿಗರು ಕಾನೂನುಬಾಹಿರ ಟೌಟ್‌ಗಳು ಅಥವಾ ಏಜೆಂಟ್‌ಗಳನ್ನು ಸಂಪರ್ಕಿಸಬಾರದು ಎಂದು ಸೂಚಿಸಲಾಗಿದೆ. ಪ್ರವಾಸಿಗರು ಅಂತಹ ಸೇವೆಗಳನ್ನು ಕಾಯ್ದಿರಿಸುವಾಗ ಪ್ರವಾಸೋದ್ಯಮ ಇಲಾಖೆ ನೀಡುವ ನೋಂದಣಿ ಪ್ರಮಾಣಪತ್ರವನ್ನು ಗಮನಿಸಬೇಕು. ಅಂತಹ ಸೇವೆಗಳನ್ನು ನೋಂದಾಯಿತ ಟ್ರಾವೆಲ್ ಏಜೆಂಟ್‌ಗಳು ಅಥವಾ ನೋಂದಾಯಿತ ಆನ್‌ಲೈನ್ ಪೋರ್ಟಲ್‌ಗಳಿಂದ ಮಾತ್ರ ಕಾಯ್ದಿರಿಸಬೇಕು ಎಂದು ತಿಳಿಸಲಾಗಿದೆ.

50,000 ರೂ.ವರೆಗೆ ದಂಡ

ಅಲ್ಲದೆ ಗೋವಾದಲ್ಲಿ ತೆರೆದ ಪ್ರದೇಶಗಳಲ್ಲಿ ಅಡುಗೆ ಮಾಡುವುದನ್ನು ನಿಷೇಧಿಸಲಾಗಿದೆ. ಈ ನಿಯಮವನ್ನು ಉಲ್ಲಂಘಿಸಿದರೆ ಅಡುಗೆ ವಸ್ತುಗಳನ್ನು ವಶಪಡಿಸಿಕೊಳ್ಳುವುದರ ಜೊತೆಗೆ 50,000 ರೂ.ವರೆಗೆ ದಂಡ ವಿಧಿಸುವ ಜೊತೆಗೆ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಗೋವಾ ಸರ್ಕಾರದ ಪ್ರವಾಸೋದ್ಯಮ ಇಲಾಖೆ ಹೇಳಿದೆ.

English summary

Next time you go on a trip to Goa don't take selfies with other tourists or click their pictures. Goa government has directed to take their permission before clicking selfies to respect their privacy.