ಉಡುಪಿಯಲ್ಲಿ ಪತ್ತೆಯಾಯಿತು ಮನುಷ್ಯ ಮುಖ ಆಕಾರದ ಕೀಟ!

By ಉಡುಪಿ ಪ್ರತಿನಿಧಿ

Updated: Friday, April 29, 2022, 10:11 [IST]

ಕೆಂಪು, ಹಳದಿ, ಕಿತ್ತಳೆ, ಕಂದು ಬಣ್ಣದಲ್ಲಿರುವ ಈ ಕೀಟ, ಬೆಳಗ್ಗೆ 7ರಿಂದ 8ರ ಅವಧಿಯಲ್ಲಿ ಸೂರ್ಯನ ಎಳೆ ಬಿಸಿಲ ಶಾಖ ಹೀರುತ್ತಾ ಗಿಡಗಳಲ್ಲಿ ಹೆಚ್ಚಾಗಿ ವಿಹರಿಸುತ್ತದೆ. ಮಕ್ಕಳಲ್ಲಿ ಕುತೂಹಲ ಮೂಡಿಸುತ್ತವೆ. ಫೆಬ್ರವರಿಯಿಂದ ಮೇ ತನಕದ ಅವಧಿಯಲ್ಲಿ ಹೆಚ್ಚಾಗಿ ಕಂಡುಬರುವ ಈ ಕೀಟವು ಚಿಗುರು, ಕಾಂಡ, ಹಣ್ಣಿನಿಂದ ರಸ ಹೀರುತ್ತವೆ. ತಾಳೆ ಗರಿಗಳಲ್ಲಿ ಸ್ವಚ್ಛಂದವಾಗಿ ವಿಹರಿಸುತ್ತಾ ಆಟವಾಡುವ ಮ್ಯಾನ್ ಫೇಸ್ಡ್ ಬಗ್ ನಿರುಪದ್ರವಿಯಾಗಿದೆ.

ರೈತರು ಈ ಕೀಟದ ಬಗ್ಗೆ ಯಾವುದೇ ರೀತಿಯಲ್ಲೂ ಗಾಬರಿಯಾಗಬೇಕಿಲ್ಲ, ಕೃಷಿಗೂ ಯಾವ ಹಾನಿಯನ್ನೂ ಮಾಡುವುದಿಲ್ಲ. ಗಂಡು ಗಾತ್ರದಲ್ಲಿ ಚಿಕ್ಕದಾದರೆ, ಹೆಣ್ಣು ಸ್ವಲ್ಪ ದೊಡ್ಡದು. ಕಳೆ ಗಿಡಗಳಲ್ಲಿ ಹೆಚ್ಚಾಗಿರುವ ಈ ಕೀಟಗಳು ಗುಂಪಲ್ಲಿ ಮೊಟ್ಟೆ ಇಡುತ್ತವೆ. 25ರಿಂದ 30 ದಿನವಷ್ಟೇ ಆಯುಷ್ಯವಿರುತ್ತದೆ. ಹವಾಮಾನ, ತಾಪಮಾನದ ಏರಿಳಿತಕ್ಕೆ ತಕ್ಕಂತೆ ಕೀಟದ ಸಂತಾನದಲ್ಲೂ ಏರಿಳಿತವಾಗುತ್ತದೆ.

ತಂಪು ಹವಾಮಾನವಿದ್ದರೆ ಈ ಕೀಟದ ಜೀವನ ಚಕ್ರ ಕೆಲ ದಿನ ದೀರ್ಘವಾಗಿರುತ್ತದೆ. ಕೃತಕ ಒತ್ತಡ ನಿರ್ಮಾಣವಾದರೆ (ರಾಸಾಯನಿಕ) ಸಂತತಿ ಹೆಚ್ಚಬಹುದು. ಬಾಯಿ ಕೊಳವೆಯಾಕಾರದಲ್ಲಿದ್ದು, ಚುಚ್ಚಿ ರಸ ಹೀರುವ ಈ ಕೀಟವನ್ನು ವೈಜ್ಞಾನಿಕವಾಗಿ "ಕೆಟಕ್ಯಾಂಥಸ್ ಇನ್‍ಕಾರ್ನೇಟಸ್' ಎಂದು ಕರೆಯಲಾಗುತ್ತಿದೆ.

ಪೆಂಟಟೊಮಿಡೆ ಜಾತಿಗೆ ಸೇರಿದ್ದು, ಕೀಟಶಾಸ್ತ್ರಜ್ಞರಿಗಿದು ಆಸಕ್ತಿಕರ ವಿಷಯವಾಗಿದೆ. ಉಡುಪಿ ಸಹಿತ ಕರ್ನಾಟಕ ಕರಾವಳಿಯಲ್ಲಿ ವಿರಳವಾಗಿದ್ದರೂ ಎಲ್ಲಿಂದ, ಹೇಗೆ, ಯಾಕೆ ಬಂತೆನ್ನುವ ಕುತೂಹಲ ಮೂಡಿಸಿದೆ.

ಕರಾವಳಿಯಲ್ಲಿ ಈ ಕೀಟದ ಇರವಿನ ಬಗ್ಗೆ ಈ ತನಕ ಮಾಹಿತಿ ಬಂದಿಲ್ಲ. ಕಾಣ ಸಿಕ್ಕಿದ್ದೇ ವಿರಳ. ಗಿಡ, ಬಳ್ಳಿಯ ಚಿಗುರು ಭಾಗದ ರಸ ಹೀರುವ ಈ ಕೀಟ ರೈತ, ಕೃಷಿಗೆ ಉಪದ್ರಕಾರಿಯಲ್ಲ, ಇದೊಂದು ನಿರುಪದ್ರವಿ ಜೀವಿ.

ಯಾವುದೇ ಕೀಟ ನೈಸರ್ಗಿಕವಾಗಿ ನಿಯಂತ್ರಣವಾಗುತ್ತದೆ. ಕೀಟನಾಶಕ ಬಳಸಿ ನಿಯಂತ್ರಣಕ್ಕೆ ಹೊರಟರೆ ಹೆಚ್ಚಲೂಬಹುದು ಎನ್ನುವುದು ಉಡುಪಿಯ ಬ್ರಹ್ಮಾವರ ಕೃಷಿ ವಿಜ್ಞಾನ ಕೇಂದ್ರದ ಸಸ್ಯ ಸಂರಕ್ಷಣಾ ವಿಜ್ಞಾನಿ ಡಾ. ಸಚಿನ್ ಯು.ಎಸ್ ಅವರ ಅಭಿಪ್ರಾಯವಾಗಿದೆ.