ಚೆಸ್ ವಿಶ್ವಚಾಂಪಿಯನ್ ಮ್ಯಾಗ್ನಸ್ ಕಾರ್ಲ್ಸನ್ಗೆ ಮತ್ತೊಮ್ಮೆ ಶಾಕ್ ಕೊಟ್ಟ ಪ್ರಜ್ಞಾನಂದ
ನವದೆಹಲಿ, ಮೇ 21: ವಿಶ್ವನಾಥನ್ ಆನಂದ್ ಅವರಂಥ ದಿಗ್ಗಜರಿಗೆ ಸೋಲಿಸಲು ಕಬ್ಬಿಣದ ಕಡಲೆಯಾಗಿರುವ ವಿಶ್ವ ಚೆಸ್ ಚಾಂಪಿಯನ್ ಮ್ಯಾಗ್ನಸ್ ಕಾರ್ಲ್ಸನ್ಗೆ ಭಾರತದ 16 ವರ್ಷದ ಪ್ರತಿಭೆಯೊಬ್ಬ ಎರಡೆರಡು ಬಾರಿ ಸೋಲಿನ ಆಘಾತ ನೀಡಿದ್ದಾನೆ. ಭಾರತದ ಗ್ರ್ಯಾಂಡ್ ಮಾಸ್ಟರ್ ಪ್ರಜ್ಞಾನಂದ ರಮೇಶ್ ಬಾಬು (R Praggnanandha) ಚೆಸಬಲ್ ಮಾಸ್ಟರ್ಸ್ (Chessable Masters) ಆನ್ಲೈನ್ ರ್ಯಾಪಿಡ್ ಚೆಸ್ ಟೂರ್ನಿಯ ಐದನೇ ಸುತ್ತಿನಲ್ಲಿ ನಾರ್ವೇ ದೇಶದ ವಿಶ್ವ ನಂಬರ್ ಒನ್ ಚೆಸ್ ಆಟಗಾರ ಮ್ಯಾಗ್ನಸ್ ಕಾರ್ಲ್ಸನ್ ಅವರನ್ನು ಸೋಲಿಸಿದರು.
ಇದು ಈ ವರ್ಷದಲ್ಲಿ ಆರ್ ಪ್ರಜ್ಞಾನಂದಗೆ ಕಾರ್ಲ್ಸನ್ ಎದುರು ಸಿಕ್ಕ ಎರಡನೇ ಗೆಲುವಾಗಿದೆ. ಮೂರೇ ತಿಂಗಳ ಅಂತರದಲ್ಲಿ ನಂಬರ್ ಒನ್ ಆಟಗಾರನಿಗೆ ಸೋಲಿನ ಆಘಾತ ಕೊಟ್ಟ ಶ್ರೇಯಸ್ಸು ಆರ್ ಪ್ರಜ್ಞಾನಂದಗೆ ಸಿಕ್ಕಿದಂತಾಗಿದೆ.
ಆರ್ ಪ್ರಜ್ಞಾನಂದ ಮತ್ತು ಮ್ಯಾಗ್ನಸ್ ಕಾರ್ಲ್ಸನ್ ನಡುವಿನ ಐದನೇ ಸುತ್ತಿನ ಪಂದ್ಯ ನೀರಸ ಡ್ರಾನತ್ತ ಸಾಗುತ್ತಿತ್ತು ಈ ವೇಳೆ, ವಿಶ್ವಚಾಂಪಿಯನ್ ಆಟಗಾರ ಒಂದು ಕೆಟ್ಟ ನಡೆ ಇಟ್ಟರು. ಇದನ್ನು ಸರಿಯಾಗಿ ಉಪಯೋಗಿಸಿಕೊಂಡು ಪ್ರಜ್ಞಾನಂದ ಜಾಣ್ಮೆಯ ನಡೆ ಇಟ್ಟು ಗೆಲುವು ಪಡೆದರು.
ಗೆಲುವು ಹೇಗೇ ಬರಲಿ, ವಿಶ್ವ ಚಾಂಪಿಯನ್ನನ್ನು ಸೋಲಿಸಿದ್ದು ಯಾರಿಗಾದರೂ ಸಂತಸ ತರಬೇಕು. ಆದರೆ, ಪ್ರಜ್ಞಾನಂದಗೆ ಈ ಗೆಲುವು ಸಮಾಧಾನ ತರಲಿಲ್ಲವಂತೆ. ಕಾರ್ಲ್ಸನ್ನ ಕೆಟ್ಟ ನಡೆಯಿಂದ ತನಗೆ ಗೆಲುವು ಸಿಕ್ಕಿತೇ ಹೊರತು ತಾನು ಜಾಣ್ಮೆಯಿಂದ ಗೆಲುವು ಪಡೆಯಲಾಗಲಿಲ್ಲವಲ್ಲ ಎಂಬ ಕೊರಗು ಈ 16 ವರ್ಷದ ಪೋರನದ್ದು.
"ನನಗೆ ಈ ರೀತಿಯ ಗೆಲುವು ಬೇಕಿಲ್ಲ" ಎಂದು ಈ ಹುಡುಗ ನೇರವಾಗಿ ಹೇಳುತ್ತಾನೆ. "ನಮ್ಮ ಆಟದ ಗುಣಮಟ್ಟದ ಬಗ್ಗೆ ಸಮಾಧಾನ ಇಲ್ಲ. ಕೆಲ ತಂತ್ರಗಳನ್ನು ಬಳಸಲು ಸಾಧ್ಯವಾಗಲಿಲ್ಲ. ನಾನು ಇನ್ನಷ್ಟು ಚುರುಕಾಗಿರಬೇಕು" ಎಂದನ್ನುತ್ತಾನೆ. ಅಚ್ಚರಿ ಎಂದರೆ, ಈ ಆನ್ಲೈನ್ ಚೆಸ್ ಟೂರ್ನಿ ಆಡಾಡುತ್ತಲೇ ಈ ಬಾಲಕ ತನ್ನ ಶಾಲಾ ಪರೀಕ್ಷೆಗಳನ್ನೂ ಬರೆದನಂತೆ. ಹಾಗಂತ ಸಂದರ್ಶನವೊಂದರಲ್ಲಿ ಆತ ಹೇಳಿಕೊಂಡಿದ್ದಾನೆ.
ಐದನೇ ಸುತ್ತಿನಲ್ಲಿ ಮ್ಯಾಗ್ನಸ್ ಕಾರ್ಲ್ಸನ್ ವಿರುದ್ಧ ಗೆಲುವು ಸಾಧಿಸಿದ ಬಳಿಕ ಇಂಗ್ಲೆಂಡ್ನ ಗೆವೇನ್ ಜೋನ್ಸ್ ಅವರನ್ನೂ ಪ್ರಜ್ಞಾನಂದ ಸೋಲಿಸಿದರು. ಏಳನೇ ಸುತ್ತಿನಲ್ಲಿ ಭಾರತದ ಪಿ ಹರಿಕೃಷ್ಣ ವಿರುದ್ಧದ ಪಂದ್ಯವನ್ನು ಡ್ರಾ ಮಾಡಿಕೊಂಡರು. ಏಳು ಸುತ್ತುಗಳ ಬಳಿಕ ಈ ಟೂರ್ನಿಯಲ್ಲಿ ಪ್ರಜ್ಞಾನಂದ 12 ಅಂಕಗಳೊಂದಿಗೆ ಐದನೇ ಸ್ಥಾನದಲ್ಲಿದ್ದಾರೆ.
ಫೆಬ್ರವರಿಯಲ್ಲೂ ಕಾರ್ಲ್ಸನ್ಗೆ ಸೋಲುಣಿಸಿದ್ದ ಪ್ರಜ್ಞಾನಂದ:
ಇದೇ ವರ್ಷದ ಫೆಬ್ರವರಿ ತಿಂಗಳಲ್ಲಿ ಆನ್ಲೈನ್ನಲ್ಲಿ ನಡೆದಿದ್ದ ಏರ್ಥಿಂಗ್ಸ್ ಮಾಸ್ಟರ್ಸ್ (Airthings Masters) ಚೆಸ್ ಟೂರ್ನಿಯಲ್ಲಿ ಆರ್ ಪ್ರಜ್ಞಾನಂದ ಎಂಟನೇ ಸುತ್ತಿನ ಪಂದ್ಯವೊಂದರಲ್ಲಿ ಮ್ಯಾಗ್ನಸ್ ಕಾರ್ಲ್ಸನ್ರನ್ನು ಸೋಲಿಸಿದ್ದರು. ಆವರೆಗೆ ಸತತ ಮೂರು ಗೆಲುವು ಸಾಧಿಸಿ ಅಪಾಯಕಾರಿ ಎನಿಸಿದ್ದ ಕಾರ್ಲ್ಸನ್ ಕೇವಲ 39 ನಡೆಗಳಲ್ಲಿ ಸೋಲಪ್ಪಿದ್ದರು.
ಕಾರ್ಲ್ಸನ್ ಸಾಮಾನ್ಯನಲ್ಲ:
31 ವರ್ಷದ ಮ್ಯಾಗ್ನಸ್ ಕಾರ್ಲ್ಸನ್ ಕಳೆದ 11 ವರ್ಷಗಳಿಂದಲೂ ವಿಶ್ವದ ನಂಬರ್ ಒನ್ ಚೆಸ್ ಆಟಗಾರನಾಗಿ ಉಳಿದಿದ್ದಾರೆ. ಕೇವಲ 14ನೇ ವಯಸ್ಸಿನಲ್ಲಿ ಚೆಸ್ ಗ್ರ್ಯಾಂಡ್ ಮಾಸ್ಟರ್ ಆದ ಕಾರ್ಲ್ಸನ್ ಕೇವಲ 19ನೇ ವಯಸ್ಸಿನಲ್ಲಿ ನಂಬರ್ ಒನ್ ಸ್ಥಾನಕ್ಕೆ ಏರಿದರು. ಅತಿ ಕಿರಿಯ ವಯಸ್ಸಿನಲ್ಲಿ ನಂಬರ್ ಒನ್ ಚೆಸ್ ಆಟಗಾರನಾದ ದಾಖಲೆ ಅವರದ್ದು. ಅಷ್ಟೇ ಅಲ್ಲ, ಅಂತಾರಾಷ್ಟ್ರೀಯ ಚೆಸ್ನಲ್ಲಿ ಸತತವಾಗಿ ಅತಿ ಹೆಚ್ಚು ಪಂದ್ಯಗಳನ್ನು ಗೆದ್ದ ದಾಖಲೆ ಅವರದ್ದು.
ಅವರು ಒಮ್ಮೆ 2882 ಇಲೋ ರೇಟಿಂಗ್ ಗಡಿ ಮುಟ್ಟಿದ್ದರು. ಚೆಸ್ ಇತಿಹಾಸದಲ್ಲಿ ಯಾರೂ ಕೂಡ ಇಷ್ಟು ರೇಟಿಂಗ್ ಪಡೆದಿರಲಿಲ್ಲ. ವಿಶ್ವದ ಅನಭಿಷಿಕ್ತ ಚೆಸ್ ದೊರೆ ಎನಿಸಿದ್ದ ಗ್ಯಾರಿ ಕ್ಯಾಸ್ಪರೋವ್ಗೂ ಇದು ಸಾಧ್ಯವಾಗಿರಲಿಲ್ಲ. 2013ರಲ್ಲಿ ಭಾರತದ ವಿಶ್ವನಾಥನ್ ಆನಂದ್ ಅವರನ್ನು ಸೋಲಿಸುವ ಮೂಲಕ ವಿಶ್ವ ಚೆಸ್ ಚಾಂಪಿಯನ್ ಎನಿಸಿದರು. ಮುಂದಿನ ವರ್ಷವೂ ಆನಂದ್ರನ್ನು ಸೋಲಿಸಿ ಮತ್ತೆ ಚಾಂಪಿಯನ್ ಪಟ್ಟ ಉಳಿಸಿಕೊಂಡರು. ಒಟ್ಟು ಐದು ಬಾರಿ ಅವರು ವರ್ಲ್ಡ್ ಚೆಸ್ ಚಾಂಪಿಯನ್ ಎನಿಸಿದ್ದಾರೆ.
ಆದರೆ ಕಳೆದ ಒಂದು ವರ್ಷದಿಂದ ಕಾರ್ಲ್ಸನ್ ಅಷ್ಟೇನೂ ಉತ್ತಮ ಫಾರ್ಮ್ನಲ್ಲಿಲ್ಲ. ಗೋಲ್ಡ್ ಮನಿ ಏಷ್ಯನ್ ರ್ಯಾಪಿಡ್ ಚೆಸ್ ಟೂರ್ನಿಯಲ್ಲಿ ಅವರು ಸತತ ಮೂರು ಗೇಮ್ಗಳನ್ನು ಸೋತಿದ್ದರು. ಈ ವರ್ಷದಲ್ಲಿ ಅವರು ಪ್ರಜ್ಞಾನಂದಗೆ ಎರಡು ಬಾರಿ ಸೋಲಪ್ಪಿದ್ದಾರೆ.ಇದು ಅವರ ವಿಶ್ವ ನಂಬರ್ ಒನ್ ಪಟ್ಟಕ್ಕೆ ಕುತ್ತು ತರುತ್ತದಾ ನೋಡಬೇಕು.
(ಒನ್ಇಂಡಿಯಾ ಸುದ್ದಿ)
-
Gold Price: ಏಪ್ರಿಲ್ನಲ್ಲಿ ಚಿನ್ನದ ದರ ಭವಿಷ್ಯ: ಹೇಗಿರುತ್ತದೆ ಮುಂದಿನ ತಿಂಗಳು ಚಿನ್ನದ ಬೆಲೆ? ವಿಶ್ಲೇಷಣೆ -
ಅಡುಗೆ ಮನೆಗಳಿಗೆ ಇನ್ನು ನೇರ ಗ್ಯಾಸ್ ಸಂಪರ್ಕ: ಪೈಪ್ಲೈನ್ ವಿಸ್ತರಣೆಗೆ ಕೇಂದ್ರದಿಂದ ಹೊಸ ಆದೇಶ ಜಾರಿ -
Gold Rate: ಬೆಂಗಳೂರು ಸೇರಿದಂತೆ ವಿವಿಧ ನಗರಗಳಲ್ಲಿ ಎಷ್ಟಿದೆ 22 ಕ್ಯಾರಟ್ ಚಿನ್ನದ ದರ? -
Love Mocktail 3: ಕ್ರಿಪ್ಟೋಮ್ನೇಶಿಯಾ ಯಾರದ್ದೋ ಕಥೆ ಯಾರದ್ದೋ ಹೆಸರು ರೂಪಾ ರಾವ್ ಬರಹ -
ತಿಂಗಳಿಗೆ 10 ಸಾವಿರ ರೂ. ಥೆರಪಿಗೆ, 3 ಸಾವಿರ ನೇಲ್ ಆರ್ಟ್ಗೆ! ಬೆಂಗಳೂರು ಯುವತಿಯ 'Gen Z’' ಖರ್ಚಿನ ಪಟ್ಟಿ Viral -
Jobs: ಕಂದಾಯ ಇಲಾಖೆಯಲ್ಲಿ 500 ಹೊಸ ಗ್ರಾಮ ಆಡಳಿತ ಅಧಿಕಾರಿ ಹುದ್ದೆಗಳಿಗೆ ಶೀಘ್ರದಲ್ಲೇ ನೇಮಕಾತಿ -
ಕೂಲಿಗೆ ಹೋಗಿದ್ದ ವಿದ್ಯಾರ್ಥಿನಿಯನ್ನು ದ್ರಾಕ್ಷಿ ತೋಟದಿಂದಲೇ ಕರೆತಂದು SSLC ಪರೀಕ್ಷೆ ಬರೆಸಿದ ಗದಗ ಬಿಇಒ -
Bengaluru: ಬೆಳ್ಳಂಬೆಳಗ್ಗೆ ಬೆಂಗಳೂರಿನ ಸಮಸ್ಯೆಗಳು: ಬೇರೆ ಊರುಗಳಿಂದ ಬಂದ ಮೆಜೆಸ್ಟಿಕ್ನಲ್ಲಿ ಸಂಕಷ್ಟ, 7 ಪ್ರಮುಖ ಸಂಕಷ್ಟಗಳು -
Ananya Birla: ಆರ್ಸಿಬಿ ಅಭಿಮಾನಿಗಳು ಹಾಗೂ ಸಹೋದರನಿಗೆ ಅನನ್ಯಾ ಬಿರ್ಲಾ ವಿಶೇಷ ಸಂದೇಶ -
Karnataka Weather: ಬಿಸಿಲಿನಿಂದ ಕಂಗೆಟ್ಟಿದ್ದ ಕರುನಾಡಿಗೆ ತಂಪೆರೆಯಲಿದ್ದಾನೆ ವರುಣ; ಎಲ್ಲೆಲ್ಲಿ ಮಳೆ? ಇಲ್ಲಿದೆ ಮಾಹಿತಿ -
Karnataka Weather: ಇಂದು ರಾಜ್ಯದ ಈ ಜಿಲ್ಲೆಗಳಲ್ಲಿ ಗುಡುಗು, ಬಿರುಗಾಳಿ ಸಹಿತ ಮಳೆಯಾಗುವ ಮುನ್ಸೂಚನೆ -
ಕಾಂತಾರ ವಿವಾದ: ಮೈಸೂರು ಚಾಮುಂಡಿ ಬೆಟ್ಟಕ್ಕೆ ಬರ್ತೀನಿ, ಕ್ಷಮೆಯೂ ಕೇಳ್ತೀನಿ ಎಂದ ನಟ ರಣವೀರ್ ಸಿಂಗ್
Click it and Unblock the Notifications
Sign in with Google