'ರಫೇಲ್ ರಾದ್ಧಾಂತದ ತನಿಖೆಯಾದರೆ ಮೋದಿ ಕತೆ ಅಷ್ಟೇ ಎಂದ ರಾಹುಲ್!'

Updated: Friday, November 2, 2018, 14:34 [IST]

ನವದೆಹಲಿ, ನವೆಂಬರ್ 02: ರಫೇಲ್ ಒಪ್ಪಂದದಲ್ಲಿ ನಡೆದ ಅವ್ಯವಹಾರದ ಕುರಿತು ಚರ್ಚೆಯೇನಾದರೂ ಆದರೆ ನರೇಂದ್ರ ಮೋದಿ ಅಧಿಕಾರ ಕಳೆದುಕೊಳ್ಳುವುದು ಖಂಡಿತ ಎಂದು ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ಹೇಳಿದ್ದಾರೆ.

ನವದೆಹಲಿಯಲ್ಲಿ ಶುಕ್ರವಾರ ಏರ್ಪಡಿಸಿದ್ದ ಪತ್ರಿಕಾಗೋಷ್ಠಿಯೊಂದರಲ್ಲಿ ಮಾತನಾಡಿದ ರಾಹುಲ್ ಗಾಂಧಿ, ರಫೇಲ್ ಒಪ್ಪಂದದ ಕುರಿತಂತೆ ಮೋದಿ ಸರ್ಕಾರವನ್ನು ಮತ್ತೊಮ್ಮೆ ತರಾಟೆಗೆ ತೆಗೆದುಕೊಂಡರು.

ಅನಿಲ್ ಅಂಬಾನಿಯವರಿಗೆ 30000 ಕೋಟಿ ರೂ.ಗಳನ್ನು ನೀಡಿ ಸ್ವತಃ ಪ್ರಧಾನಿ ನರೇಂದ್ರ ಮೋದಿಯವರೇ ಮಾಡಿದ 'ಡೀಲ್' ಇದು ಎಂದು ರಾಹುಲ್ ಗಾಂಧಿ ಆರೋಪಿಸಿದರು.

ರಾಹುಲ್ ಪತ್ರಿಕಾಗೋಷ್ಠಿಯ ಪ್ರಮುಖ ಅಂಶಗಳು ಇಲ್ಲಿವೆ...

ಮೋದಿ ಅಂಬಾನಿ ಪಾಲುದಾರಿಕೆ!

ರಫೇಲ್ ಡೀಲ್ ಎಂಬುದು ಸಂಪೂರ್ಣವಾಗಿ ನರೇಂದ್ರ ಮೋದಿ ಮತ್ತು ಅನಿಲ್ ಅಂಬಾನಿ ಅವರ ಪಾಲುದಾರಿಕೆಯ ಹಗರಣವಷ್ಟೇ. ಯಾವ ದೇಶಕ್ಕೂ ಸಂಬಂಧಿಸಿದ್ದಲ್ಲ! ಡಸಾಲ್ಟ್ ಕಂಪನಿಯು ರಿಲಯನ್ಸ್ ಕಂಪನಿಗೆ ಮೊದಲ ಇನ್ ಸ್ಟಾಲ್ ಮೆಂಟ್ ಎಂಬಂತೆ 284 ಕೋಟಿ ರೂ.ಗಳ ಕಿಕ್ ಬ್ಯಾಕ್ ನೀಡಿದೆ- ರಾಹುಲ್ ಗಾಂಧಿ

ತನಿಖೆಯಾದರೆ....

ಅಕಸ್ಮಾತ್ ರಫೇಲ್ ಡಿಲ್ ಕುರಿತು ಸರಿಯಾದ ತನಿಖೆ ನಡೆದರೆ ಮೋದಿ ಮನೆಗೆ ಹೋಗುವುದು ಖಂಡಿತ! ನಾನು ವಿಶ್ವಾಸದಿಂದ ಹೇಳಬಲ್ಲೆ! ಒಂದು ಭ್ರಷ್ಟಾಚಾರಕ್ಕಾಗಿ ಮತ್ತು ಅನಿಲ್ ಅಂಬಾನಿಯವರಿಗೆ ಈ ವ್ಯವಹಾರಕ್ಕಾಗಿ 30000 ಕೋಟಿ ರೂ.ಗಳನ್ನು ನೀಡಿದ್ದಕ್ಕಾಗಿ ಮೋದಿ ಅಧಿಕಾರ ಕಳೆದುಕೊಳ್ಳುತ್ತಾರೆ- ರಾಹುಲ್ ಗಾಂಧಿ

ಏನಿದು ರಫೇಲ್ ಡೀಲ್?

ಯುದ್ಧ ವಿಮಾನ ಖರೀದಿಗಾಗಿ ಫ್ರಾನ್ಸ್ ಸರ್ಕಾರದೊಂದಿಗೆ ಭಾರತ ಮಾಡಿಕೊಂಡ ಒಪ್ಪಂದವೇ ರಫೇಲ್ ಡೀಲ್. ಈ ಡೀಲ್ ನಲ್ಲಿ ಅವ್ಯವಹಾರ ನಡೆದಿದೆ ಎಂದು ಕಾಂಗ್ರೆಸ್ ಆರೋಪಿಸಿದ್ದು, ರಫೇಲ್ ಯುದ್ಧ ವಿಮಾನಗಳ ಬಿಡಿ ಭಾಗಗಳ ತಯಾರಿಕೆಯ ಹೊಣೆಯನ್ನು ಎಚ್ ಎಎಲ್ ಗೆ ಬದಲಾಗಿ ರಿಲಯನ್ಸ್ ಇಂಡಸ್ಟ್ರೀಸ್ ಗೆ ನೀಡಿದ್ದು ಸಾಕಷ್ಟು ವಿವಾದ ಸೃಷ್ಟಿಸಿದೆ.

ಸಿಬಿಐ ವಿವಾದಕ್ಕೂ ರಫೇಲ್ ನಂಟು!

ಇತ್ತೀಚೆಗೆ ಸಿಬಿಐ ನಿರ್ದೇಶಕ ಮತ್ತು ವಿಶೇಷ ನಿರ್ದೇಶಕರಾದ ಅಲೋಕ್ ವರ್ಮಾ ಮತ್ತು ತಾಕೇಶ್ ಆಸ್ಥಾನ ಅವರನ್ನು ಕಡ್ಡಾಯ ರಜೆಯ ಮೇಲೆ ಕಳಿಸಿದ್ದು ಸಹ ರಫೇಲ್ ಡೀಲ್ ನೊಂದಿಗೆ ನಂಟು ಹೊಂದಿದೆ ಎಂದು ಕಾಂಗ್ರೆಸ್ ಆರೋಪಿಸಿತ್ತು. ರಫೇಲ್ ಡಿಲ್ ಗೆ ಸಂಬಂಧಿಸಿದಂತೆ ತನುಖೆ ನಡೆಸುತ್ತಿದ್ದ ಕಾರಣದಿಂದಲೇ ನಿರ್ದೇಶಕರನ್ನು ರಜೆಯ ಮೇಲೆ ಕಳಿಸಲಾಗಿದೆ ಎಂದು ಕಾಂಗ್ರೆಸ್ ದೂರಿದೆ.