ಮೈಸೂರು ದಸರಾದಲ್ಲಿದೆ ಸಂಚಾರಿ ಎಟಿಎಂ

ಮೈಸೂರು, ಅ.8 : ಮೈಸೂರು ದಸರಾ ನೋಡಲು ಹೋಗಿದ್ದೀರಿ, ನಗರದಲ್ಲಿ ಎಟಿಎಂಗಳು ಎಲ್ಲಿವೆ? ಎಂದು ತಿಳಿದಿಲ್ಲವೆ. ಚಿಂತೆ ಬಿಡಿ ಮೊಟ್ಟಮೊದಲ ಬಾರಿಗೆ ಮೈಸೂರು ದಸರಾದಲ್ಲಿ ಸಂಚಾರಿ ಎಟಿಎಂ ಕಾರ್ಯನಿರ್ವಹಿಸುತ್ತಿದೆ. ನಗರದ ಹಲವು ಪ್ರದೇಶಗಳಲ್ಲಿ ಇದು ಸಂಚರಿಸಲಿದೆ.

ಇಂಡಿಯನ್ ಓವರ್ ಸಿಸ್ ಬ್ಯಾಂಕ್ ಈ ಸಂಚಾರಿ ಎಟಿಎಂ ಕೇಂದ್ರವನ್ನು ದಸರಾಕ್ಕೆ ಆಗಮಿಸುವ ಪ್ರವಾಸಿಗರಿಗಾಗಿಯೇ ಪ್ರಾರಂಭಿಸಿದೆ. ಒಂದು ಬಸ್ ನಲ್ಲಿ ಎಟಿಎಂ ಯಂತ್ರ ಆಳವಡಿಸಲಾಗಿದ್ದು, ಇದು ನಗರ ಪ್ರದಕ್ಷಿಣೆ ಹಾಕುತ್ತದೆ.

ಸೆ.28ರಂದು ಈ ಎಟಿಎಂ ಸೇವೆಗೆ ಚಾಲನೆ ನೀಡಲಾಗಿದೆ. ಅ.15ರವರೆಗೆ ನಗರದ ವಿವಿಧ ಪ್ರದೇಶಗಳಲ್ಲಿ ಬೆಳಗ್ಗೆ 7ರಿಂದ ರಾತ್ರಿ 10 ಗಂಟೆ ವರೆಗೆ ಈ ಎಟಿಎಂ ಸಂಚರಿಸಲಿದೆ. ಸದ್ಯ ಪ್ರತಿದಿನ 60 ರಿಂದ 80 ಜನರು ಸಂಚಾರಿ ಎಟಿಎಂಗೆ ಭೇಟಿ ನೀಡುತ್ತಿದ್ದಾರೆ.

ಈ ಸಂಚಾರಿ ಎಟಿಎಂ ಬಸ್ ಗೆ ಮಾರ್ಗಸೂಚಿ ರಚಿಸಲಾಗಿದೆ. ಅದರಂತೆ ನಗರದ ಪ್ರಮುಖ ಪ್ರವಾಸಿ ಸ್ಥಳಗಳು ಸೇರಿದಂತೆ ಅಲ್ಲಲ್ಲಿ ನಿಂತಿರುತ್ತದೆ. ಒಂದು ಸ್ಥಳದಲ್ಲಿ ಎಟಿಎಂ ಸುಮಾರು ಎರಡು ಗಂಟೆ ನಿಂತಿರುತ್ತದೆ.

ಮೈಸೂರು ಮಹಾನಗರ ಪಾಲಿಕೆ ಈ ಸಂಚಾರಿ ಎಟಿಎಂ ಕೇಂದ್ರಕ್ಕೆ ನಗರದಲ್ಲಿ ಸಂಚರಿಸಲು ಅನುಮತಿ ನೀಡಿದೆ. ಮೈಸೂರು ಅರಮನೆಯ ಎಲ್ಲಾ ದ್ವಾರಗಳ ಬಳಿ ಪಾರ್ಕಿಂಗ್ ಮಾಡಲು ಅವಕಾಶ ಕಲ್ಪಿಸಿದೆ.

ಎಲ್ಲಿರುತ್ತದೆ ಎಟಿಎಂ : ಸಂಚಾರಿ ಎಟಿಎಂ ಜೆಎಲ್ ಬಿ ರಸ್ತೆ, ಧನ್ವಂತರಿ ರಸ್ತೆ, ಚಾಮರಾಜ ರಸ್ತೆ, ದೇವರಾಜ ಅರಸ್ ರಸ್ತೆ, ದಸರಾ ವಸ್ತು ಪ್ರದರ್ಶನ ಮೈದಾನ, ಚಾಮಂಡಿ ಬೆಟ್ಟದಲ್ಲಿ ಪ್ರವಾಸಿಗರಿಗೆ ಲಭ್ಯವಿದೆ.

ಪ್ರತಿ ದಿನ ಸಂಚಾರಿ ಎಟಿಎಂನಿಂದ ಸುಮಾರು 9 ಲಕ್ಷ ರೂ. ಹಣ ಪಡೆಯುವ ವ್ಯವಸ್ಥೆ ಮಾಡಬೇಕಾಗಿದೆ. ದಸರಾದಲ್ಲಿ ತುರ್ತು ಹಣ ಬೇಕಾದಾಗ ನಿಮ್ಮ ಹತ್ತಿರದಲ್ಲಿ ಸಂಚಾರಿ ಎಟಿಎಂ ಎಲ್ಲಿಗೆ ಎಂದು ಒಮ್ಮೆ ಗಮನಿಸಿ.

English summary

A public sector bank is operating a mobile automated teller machine (ATM) in the Mysore City, for the first time during Dasara festivities 2013. The initiative by Indian Overseas Bank (IOB) is intended to help visitors who throng the Cultural Capital of the State during the annual event.