ಕೈಕಾಲು ಮುರಿಸುತ್ತೇನೆ : ಪತ್ರಕರ್ತನಿಗೆ ಸಚಿವ ಬೆದರಿಕೆ

ಮೂಡುಬಿದಿರೆ, ಮೇ 3 : "ಕಾಂಗ್ರೆಸ್ ಕಾರ್ಯಕರ್ತರ ಕೈಕಾಲು ಗಟ್ಟಿಯಿದೆ. ಅವರಿಂದ ನಿಮ್ಮ ಕೈಕಾಲು ಮುರಿಸುತ್ತೇನೆ. ಮತ್ತೆ ನೀವು ಭಿಕ್ಷೆ ಬೇಡಿ ಬದುಕಬೇಕು. ಹಾಗೆ ಮಾಡುತ್ತೇನೆ..."

ಇದ್ಯಾವುದೋ ರೌಡಿ ಕರೆಯಲ್ಲ ಸ್ವಾಮೀ... ರಾಜ್ಯ ಮೀನುಗಾರಿಕೆ, ಕ್ರೀಡೆ ಮತ್ತು ಯುವಜನ ಸೇವೆ ಸಚಿವ, ಮೂಡುಬಿದಿರೆ ಶಾಸಕ ಅಭಯಚಂದ್ರ ಜೈನ್ ವಿಜಯವಾಣಿ ಮೂಡುಬಿದಿರೆ ಭಾಗದ ವರದಿಗಾರ ಯಶೋಧರ ವಿ. ಬಂಗೇರ ಅವರಿಗೆ ನೀಡಿದ ಧಮ್ಕಿ. ನಿರ್ಭಿಡೆಯಿಂದ ವರದಿ ಮಾಡುವ ಪತ್ರಕರ್ತರಿಗೆ ಅಭಯಹಸ್ತ ನೀಡಬೇಕಾದ ಸಚಿವರೇ ಬೆದರಿಕೆ ಒಡ್ಡಿದರೆ ಹೇಗೆ?

ಪತ್ರಕರ್ತ ಯಶೋಧರ ವಿ. ಬಂಗೇರ ಅವರು ಕಳೆದ ಮೂರು ದಿನಗಳಿಂದ ವಿವಿಧ ಪತ್ರಿಕೆಗಳಿಗೆ ಹಾಗೂ ಅರೆಕಾಲಿಕ ವರದಿ ಮಾಡುವ ಇತರ ವೆಬ್‌ಸೈಟ್‌ಗಳಿಗೆ ಮಾಹಿತಿ ಹಕ್ಕಿನ ಆಧಾರದಲ್ಲಿ 'ನಿಡ್ಡೋಡಿ' ಕುರಿತ ವರದಿಯನ್ನು ನೀಡುತ್ತಿದ್ದರು. ವಿಶ್ವ ಪತ್ರಿಕಾ ದಿನಾಚರಣೆಯ ಸಂದರ್ಭದಲ್ಲಿ ಪತ್ರಕರ್ತನಿಗೆ ಬೆದರಿಕೆ ಒಡ್ಡಿರುವುದು ನಿಜಕ್ಕೂ ಬೇಸರದ ಸಂಗತಿ.

ಅದರಂತೆಯೇ ಗುರುವಾರ ಸಂಜೆ 6.30ರ ವೇಳೆಗೆ ಸಚಿವ ಅಭಯಚಂದ್ರ ಜೈನ್ ಅವರಿಗೆ ಕರೆ ಮಾಡಿ ನಿಡ್ಡೋಡಿ ಸ್ಥಾವರ ವಿದ್ಯಮಾನಗಳ ಬಗ್ಗೆ ಪ್ರತಿಕ್ರಿಯಿಸುವಂತೆ ಯಶೋಧರ ಅವರು ಕರೆ ಮಾಡಿದರು. ಕರೆ ಸ್ವೀಕರಿಸಿ ಮಾತನಾಡಿದ ಜೈನ್, ಪ್ರತಿಕ್ರಿಯೆ ನೀಡುವ ಬದಲು ಬಂಗೇರ ಅವರಿಗೆ ಧಮ್ಕಿ ಹಾಕತೊಡಗಿದರು.

ನಿಡ್ಡೋಡಿ ಹೋರಾಟದ ಪರ ನಿಲ್ಲಬೇಕಾದ ಜವಾಬ್ದಾರಿಯುತ ಸಚಿವ ಅಭಯಚಂದ್ರ ಜೈನ್ ಬಾಲಿಶವಾಗಿ ಹೀಗೆ ಬೆದರಿಕೆ ಒಡ್ಡುತ್ತಿರುವ, ಪತ್ರಿಕಾ ಸ್ವಾತಂತ್ರ್ಯವನ್ನು ಹತ್ತಿಕ್ಕಲು ಪ್ರಯತ್ನ ಮಾಡುತ್ತಿರುವುದು ಸರಿಯಲ್ಲ ಎನ್ನುವುದು ಮೂಡುಬಿದಿರೆಯ ಬಹುತೇಕ ನಾಗರಿಕರ ಅಭಿಪ್ರಾಯ. [ನಳಿನ್ ವಿರುದ್ಧ ನಡೆದ ಸಂಚು]

ಸುಳ್ಯ ದಂಪತಿ ಸಾವು : ಇಲ್ಲಿನ ವಳಲಂಬೆ ಗ್ರಾಮದಲ್ಲಿ ದಂಪತಿಗಳಿಬ್ಬರನ್ನು ಬರ್ಬರವಾಗಿ ಹತ್ಯೆಗೈದ ಘಟನೆ ಶುಕ್ರವಾರ ನಡೆದಿದೆ. ಸಾವನ್ನಪ್ಪಿದವರನ್ನು ಹರಿರಾಜ್‌ ಭಟ್‌ (65) ಮತ್ತು ಸುಲೋಚನಾ ಭಟ್‌ (55). ಹರಿರಾಜ್‌ ಭಟ್‌ ಅವರ ಶವ ನೇಣು ಬಿಗದ ಸ್ಥಿತಿಯಲ್ಲಿ ಪತ್ತೆಯಾದರೆ, ಸುಲೋಚನಾ ಅವರ ಶವ ರಾಡ್‌ನಿಂದ ತಲೆಗೆ ಹೊಡೆದು ಕೊಲೆಗೈದಂತೆ ತೋರಿಬಂದಿದೆ.

ಹಣದಾಸೆಗಾಗಿ ಈ ಕೊಲೆ ನಡೆದಿದೆಯೇ ಅಥವಾ ಹರಿರಾಜ್‌ ಭಟ್‌ ಅವರೆ ಪತ್ನಿಯನ್ನು ಕೊಲೆ ಮಾಡಿ ಆತ್ಮಹತ್ಯೆ ಮಾಡಿಕೊಂಡರೆ ಎಂದು ಶಂಕೆ ವ್ಯಕ್ತವಾಗಿದೆ. ಸ್ಥಳಕ್ಕೆ ಶ್ವಾನ ದಳ ಭೇಟಿ ನೀಡಿದ್ದು, ತನಿಖೆ ಜಾರಿಯಲ್ಲಿದೆ. ಪ್ರಕರಣ ಸುಳ್ಯ ಪೊಲೀಸ್ ಠಾಣೆಯಲ್ಲಿ ದಾಖಲಾಗಿದೆ.

English summary

Abhayachandra Jain, Minister of State for Fisheries, Sports and Youth Services, has threatened Vijayavani journalist for asking his reaction on Niddodi Power Plant project. In another case in Sulia a couple were found dead at their home in a suspicious manner.