ಮಹಾಮಾರಿ ಕೋವಿಡ್-19 ತಡೆಗಟ್ಟಲು ವಿಟಮಿನ್-ಡಿ ಸಹಕಾರಿಯೇ.?

Published: Monday, May 25, 2020, 18:52 [IST]

ಲಂಡನ್, ಮೇ 25: ಮಾರಣಾಂತಿಕ ಕೋವಿಡ್-19 ವಿರುದ್ಧ ಹೋರಾಡಲು ವಿಟಮಿನ್-ಡಿ ಅತ್ಯಗತ್ಯ ಎಂಬ ಮಾತುಗಳು ಕೇಳಿಬರುತ್ತಿವೆ. ಆದರೆ, ಕೋವಿಡ್-19 ರೋಗವನ್ನು ತಡೆಗಟ್ಟಲು ವಿಟಮಿನ್-ಡಿ ಪರಿಣಾಮಕಾರಿಯೇ.? ಎಂಬ ಪ್ರಶ್ನೆಗೆ ಉತ್ತರ ಕೊಡಲು ವೈಜ್ಞಾನಿಕ ಪುರಾವೆ ಇನ್ನೂ ಲಭ್ಯವಾಗಿಲ್ಲ.

ಯಾವುದೇ ಪುರಾವೆ ಇಲ್ಲ

''ಕೋವಿಡ್-19 ತಡೆಗಟ್ಟಲು ಅಥವಾ ಚಿಕಿತ್ಸೆ ನೀಡಲು ವಿಟಮಿನ್-ಡಿ ಸಹಕಾರಿ ಎಂಬುದಕ್ಕೆ ಯಾವುದೇ ಪುರಾವೆ ಇಲ್ಲ. ಹೀಗಾಗಿ, ಅತಿಯಾಗಿ ವಿಟಮಿನ್-ಡಿ ಸಪ್ಲಿಮೆಂಟ್ಸ್ ಸೇವಿಸಬೇಡಿ. ಹೈ ಡೋಸೇಜ್ ನಿಂದ ದೇಹಕ್ಕೆ ಹಾನಿಕಾರಕ'' ಎಂದು ವಿಜ್ಞಾನಿಗಳು ಎಚ್ಚರಿಕೆ ನೀಡಿದ್ದಾರೆ.

''ದೃಢಪಟ್ಟ ವೈಜ್ಞಾನಿಕ ಪುರಾವೆಗಳು ದೊರೆಯುವವರೆಗೆ, ಅತಿಯಾಗಿ (ಹೆಚ್ಚು ಡೋಸೇಜ್) ವಿಟಮಿನ್-ಡಿ ಸಪ್ಲಿಮೆಂಟ್ಸ್ ಸೇವಿಸಬೇಡಿ'' ಎಂದು ಬಿ.ಎಂ.ಜೆ ನ್ಯೂಟ್ರಿಷನ್, ಪ್ರಿವೆನ್ಷನ್ ಅಂಡ್ ಹೆಲ್ತ್ ಎಂಬ ಜರ್ನಲ್ ನಲ್ಲಿ ಪ್ರಕಟವಾದ ವರದಿಯಲ್ಲಿ ವಿಜ್ಞಾನಿಗಳು ಉಲ್ಲೇಖಿಸಿದ್ದಾರೆ.

ವಿಟಮಿನ್-ಡಿ ಅತ್ಯಗತ್ಯ ಏಕೆ.?

ಸೂರ್ಯನ ಬೆಳಕಿಗೆ ಒಡ್ಡಿಕೊಂಡಾಗ ಚರ್ಮದಲ್ಲಿ ವಿಟಮಿನ್-ಡಿ ಉತ್ಪತ್ತಿಯಾಗುತ್ತದೆ. ವಿಟಮಿನ್-ಡಿ ಇಂದ ದೇಹದಲ್ಲಿ ಕ್ಯಾಲ್ಸಿಯಮ್ ಮತ್ತು ಫಾಸ್ಪೇಟ್ ಪ್ರಮಾಣ ನಿಯಂತ್ರಣದಲ್ಲಿರುತ್ತದೆ. ಮೂಳೆಗಳು, ಹಲ್ಲುಗಳು ಮತ್ತು ಸ್ನಾಯುಗಳು ಆರೋಗ್ಯವಾಗಿರಲು ವಿಟಮಿನ್-ಡಿ ಅತ್ಯಗತ್ಯ.

ವಿಟಮಿನ್-ಡಿ ಅತಿಯಾದರೆ.?

''ಮನುಷ್ಯ ಆರೋಗ್ಯವಾಗಿರಲು ದೇಹದಲ್ಲಿ ನಿರ್ದಿಷ್ಟ ಪ್ರಮಾಣದ ವಿಟಮಿನ್-ಡಿ ಇರಲೇಬೇಕು. ಒಂದು ವೇಳೆ ವಿಟಮಿನ್-ಡಿ ನಿರ್ದಿಷ್ಟ ಪ್ರಮಾಣಕ್ಕಿಂತ ಕಡಿಮೆಯಿದ್ದರೆ, ರಿಕೆಟ್ಸ್ ಮತ್ತು ಆಸ್ಟಿಯೋಪೊರೋಸಿಸ್ ಸಮಸ್ಯೆ ಉಂಟಾಗುತ್ತದೆ. ದೇಹದಲ್ಲಿ ಅಪ್ಪಿ-ತಪ್ಪಿ ವಿಟಮಿನ್-ಡಿ ಅಂಶ ಅತಿಯಾದರೂ ಸಮಸ್ಯೆ ತಪ್ಪಿದ್ದಲ್ಲ. ವಿಟಮಿನ್-ಡಿ ಹೆಚ್ಚಾದರೆ, ರಕ್ತದಲ್ಲಿ ಕ್ಯಾಲ್ಸಿಯಮ್ ಮಟ್ಟ ಮಿತಿಮೀರುತ್ತದೆ. ಇದರಿಂದ ಜೀವಕ್ಕೆ ಹಾನಿ ಕಟ್ಟಿಟ್ಟಬುತ್ತಿ'' ಎಂದು ಯು.ಕೆನಲ್ಲಿನ ಸರ್ರೆ ವಿಶ್ವವಿದ್ಯಾನಿಲಯದ ಸ್ಯೂ ಲನ್ಹಾಮ್ ಹೇಳಿದ್ದಾರೆ.

ವೈದ್ಯರ ಮಾರ್ಗದರ್ಶನ ಮುಖ್ಯ

''ದೇಹಕ್ಕೆ ಹೆಚ್ಚಿನ ವಿಟಮಿನ್-ಡಿ ಸಿಗುವುದು ಸೂರ್ಯನ ಬೆಳಕಿನಿಂದ. ಆದರೆ ಲಾಕ್ ಡೌನ್ ನಿಂದಾಗಿ ನ್ಯಾಚುರಲ್ ಆಗಿ ವಿಟಮಿನ್-ಡಿ ಪಡೆಯುವುದು ಸವಾಲಾಗಿರಬಹುದು. ಹೀಗಾಗಿ, ವಿಟಮಿನ್-ಡಿ ಸಪ್ಲಿಮೆಂಟ್ಸ್ ತೆಗೆದುಕೊಳ್ಳಬಹುದು. ಆದರೆ, ಅದಕ್ಕೂ ಮುನ್ನ ವೈದ್ಯರ ಮಾರ್ಗದರ್ಶನ ಮುಖ್ಯ'' ಎಂದು ಬರ್ಮಿಂಗ್ ಹ್ಯಾಮ್ ಯೂನಿವರ್ಸಿಟಿಯ ವಿಜ್ಞಾನಿ ಕ್ಯಾರೋಲಿನ್ ಗ್ರೇಗ್ ತಿಳಿಸಿದ್ದಾರೆ.

Published On May 25, 2020