ಕರ್ನಾಟಕ, ಬೆಂಗಳೂರು ಒನ್ ಕೇಂದ್ರದಲ್ಲಿ ಎಲ್ಎಲ್ಆರ್ ಲಭ್ಯ
ಬೆಂಗಳೂರು, ಜುಲೈ 22 : ಎಲ್ಎಲ್ಆರ್ ಪಡೆಯಲು ಜನರು ಇನ್ನು ಮುಂದೆ ಆರ್ಟಿಓ ಕಚೇರಿಗೆ ಅಲೆಯಬೇಕಾಗಿಲ್ಲ. ಬೆಂಗಳೂರು ಒನ್ ಮತ್ತು ಕರ್ನಾಟಕ ಒನ್ ಕೇಂದ್ರದಲ್ಲಿ ಎಲ್ಎಲ್ಆರ್ ನೀಡುವ ಸೇವೆಯನ್ನು ಆರಂಭಿಸಲಾಗುತ್ತಿದೆ.
ಆರ್ಟಿಓ ಕಚೇರಿಯಲ್ಲಿ ಉಂಟಾಗುವ ಜನರ ದಟ್ಟಣೆಯನ್ನು ಕಡಿಮೆ ಮಾಡಲು ಎಲ್ಎಲ್ಆರ್ ಪಡೆಯುವ ಸೇವೆಯನ್ನು ಬೆಂಗಳೂರು ಒನ್, ಕರ್ನಾಟಕ ಒನ್ ಕೇಂದ್ರಕ್ಕೆ ವರ್ಗಾವಣೆ ಮಾಡಲಾಗುತ್ತಿದೆ. ಆಗಸ್ಟ್ನಿಂದ ಈ ಸೇವೆ ಲಭ್ಯವಾಗುವ ನಿರೀಕ್ಷೆ ಇದೆ.
ಎಲ್ಎಲ್ಆರ್ಗೆ ಅರ್ಜಿ ಸಲ್ಲಿಕೆ, ಶುಲ್ಕ ಪಾವತಿ, ಆನ್ಲೈನ್ ಪರೀಕ್ಷೆ, ಎಲ್ಎಲ್ಆರ್ ಡೌನ್ ಲೋಡಿಂಗ್ ಸೇವೆಗಳನ್ನು ಬೆಂಗಳೂರು ಒನ್, ಕರ್ನಾಟಕ ಒನ್ ಕಚೇರಿಯಲ್ಲಿ ಆರಂಭಿಸಲಾಗುತ್ತಿದೆ. ಇದರಿಂದಾಗಿ ಜನರು ಹತ್ತಿರದ ಬೆಂಗಳೂರು ಒನ್ ಕೇಂದ್ರದಲ್ಲಿ ಸೇವೆ ಪಡೆದುಕೊಳ್ಳಬಹುದಾಗಿದೆ.
ಆನ್ಲೈನ್ ಮೂಲಕ ಅರ್ಜಿ ಸಲ್ಲಿಸಿದವರು ಆರ್ಟಿಓ ಕಚೇರಿಗಳಲ್ಲಿ ಎಲ್ಎಲ್ಆರ್ ಶುಲ್ಕ ಪಾವತಿ, ಆನ್ಲೈನ್ ಪರೀಕ್ಷೆಗಾಗಿ ಆಗಮಿಸುತ್ತಾರೆ. ಇದರಿಂದಾಗಿ ಜನರ ದಟ್ಟಣೆ ಹೆಚ್ಚುತ್ತಿದೆ. ಸಮಯವು ಸಾಕಷ್ಟು ಹಿಡಿಯುತ್ತಿದೆ.
ವೈಟ್ಬೋರ್ಡ್ ವಾಹನಗಳಿಗೆ ಎಲ್ಎಲ್ಆರ್ ಮಾಡಿಸುವವರು ಬೆಂಗಳೂರು ಒನ್, ಕರ್ನಾಟಕ ಒನ್ ಕೇಂದ್ರದಲ್ಲಿ ಸೇವಾ ಶುಲ್ಕವನ್ನು ಕಟ್ಟಿ ಆನ್ಲೈನ್ ಪರೀಕ್ಷೆ ಬರೆದು ಎಲ್ಎಲ್ಆರ್ ಪಡೆಯಬಹುದಾಗಿದೆ. ಇದರಿಂದಾಗಿ ಆರ್ಟಿಓ ಕಚೇರಿ ಹುಡುಕಿಕೊಂಡು ಅಲೆಯುವುದು ತಪ್ಪಲಿದೆ.
ಬೆಂಗಳೂರು ಒನ್ ಕೇಂದ್ರದಲ್ಲಿ ಈ ಸೇವೆಗಳು ಆರಂಭವಾದರೆ ಜನರ ಸಮಯ ಉಳಿತಾಯವಾಗಲಿದೆ. ಆರ್ಟಿಓ ಕಚೇರಿಯಲ್ಲಿ ತಾಸುಗಟ್ಟಲೇ ಸರತಿ ಸಾಲಿನಲ್ಲಿ ನಿಲ್ಲುವುದು ತಪ್ಪಲಿದೆ. ಸರ್ಕಾರ ನಿಗದಿಪಡಿಸಿದ ಶುಲ್ಕವನ್ನು ಮಾತ್ರ ಕಟ್ಟಿದರೆ ಸಾಕು ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
Click it and Unblock the Notifications
Sign in with Google